شاراينا
سەيسەنبى, 5 اقپان 2013 7:29
يزرايل سيرياعا شىنايى بەت-بەينەسىن كورسەتتى
يزرايل اسكەري اۋە كۇشتەرىنىڭ سيريا اۋماعىنا سوققى جاساۋى تاياۋ شىعىستا سوعىسقا ۇلاسۋى مۇمكىن جاڭا شيەلەنىس تۋىنداتتى.
سوققى 30 قاڭتارعا قاراعان ءتۇنى جاسالعان. وسى كۇنى كۇندىز ليۆان ارمياسىنان يزرايلدىك ۇشاقتار سوڭعى تاۋلىكتە 3 رەت اۋە كەڭىستىگىن بۇزدى دەگەن حابارلار تۇسكەن بولاتىن.
سەيسەنبى, 5 اقپان 2013 7:29
يزرايل سيرياعا شىنايى بەت-بەينەسىن كورسەتتى
يزرايل اسكەري اۋە كۇشتەرىنىڭ سيريا اۋماعىنا سوققى جاساۋى تاياۋ شىعىستا سوعىسقا ۇلاسۋى مۇمكىن جاڭا شيەلەنىس تۋىنداتتى.
سوققى 30 قاڭتارعا قاراعان ءتۇنى جاسالعان. وسى كۇنى كۇندىز ليۆان ارمياسىنان يزرايلدىك ۇشاقتار سوڭعى تاۋلىكتە 3 رەت اۋە كەڭىستىگىن بۇزدى دەگەن حابارلار تۇسكەن بولاتىن. العاشقى نىسانا رەسەيلىك عالىمداردىڭ باسشىلىعىمەن جاپپاي قىرىپ-جوياتىن قارۋ ءۇشىن جيىنتىقتار جاساۋ جۇمىستارى جۇرۋدە دەپ ەسەپتەلەتىن داماسك ماڭىنداعى CERS عىلىمي-زەرتتەۋ ورتالىعى بولدى. ەكىنشى سوققى رەسەيلىك «بۋك-م1-2» زەنيتتى راكەتالى كەشەن نەمەسە «ياحونت» كورابلگە قارسى راكەتالار بار دەلىنگەن كونۆويعا جاسالعان. وسىعان قاراپ-اق يزرايلدىك ااك شىنىمەن دە تابىستى اۋە شابۋىلىن جاسادى دەپ قورىتىندى شىعارۋعا بولاتىنداي.
كاسترو تەلەديداردان كورىندى
كۋبانىڭ ەكس-ليدەرى فيدەل كاسترو سوڭعى بىرنەشە اي ىشىندە العاش رەت تەلەديداردان كورىندى. بۇل تۋرالى «بي-بي-سي» حابارلاپ وتىر.
بۇگىندە جاسى 86-عا تولعان كاسترو ۇلتتىق اسسامبلەيا سايلاۋىنا قاتىسۋ ءۇشىن سايلاۋ ۋچاسكەسىنە كەلگەن. بۇرىنعى مەملەكەت باسشىسىنىڭ سوزىنە قاراعاندا, ول سايلاۋشىلارمەن اڭگىمەلەسىپ ۋچاسكەدە ءبىر ساعاتتاي ۋاقىت وتكىزگەن. فيدەل كاسترو ۇيىنە قايتۋ ءۇشىن ءوز ماشيناسىنا وتىرعان كەزدە جينالعان جۇرت ونىڭ اۆتوكولىگىن قورشاپ الىپ, كۋبا رەۆوليۋتسياسىنىڭ ليدەرىن قوشەمەت كورسەتىپ شىعارىپ سالعان. باق-تاردىڭ مالىمەتىنشە, كاسترو سوڭعى ءۇش جىل بويى ۇيىندە وتىرىپ داۋىس بەرگەن كورىنەدى.
ەگيپەت وپپوزيتسياسى توڭكەرىسكە دايىن
كايردەگى, پورت-سايدتەگى جانە ەگيپەتتىڭ باسقا دا قالالارىنداعى قانتوگىسكە سوقتىرعان قاقتىعىستاردان كەيىن وپپوزيتسيا پرەزيدەنت موحاممەد ءمۋرسيدىڭ دەرەۋ وتستاۆكاعا كەتۋىن تالاپ ەتىپ, ونىمەن ءۇن قاتىسۋعا بارۋدان باس تارتىپ وتىر.
وپپوزيتسيالىق «ۇلتتىق قۇتقارۋ مايدانىنىڭ» باسشىلارى نارازىلىق اكتسياسىنا قوسىلىپ قانا قويماي, سونىمەن بىرگە وعان باسشىلىق جاساۋعا دايىن ەكەنىن دە سەزدىرگەن. وپپوزيتسيونەرلەر مۇنداي باتىل ۇستانىمعا بىردەن ەمەس, ءبىرشاما تولقۋلاردان كەيىن كەلگەن كورىنەدى. ارنايى ءمالىمدەمەدە «ۇلتتىق قۇتقارۋ مايدانى» ەگيپەت حالقىنىڭ ۇندەۋلەرىنە قوسىلاتىنىن جانە قازىرگى رەجىمدى قۇلاتۋعا قول جەتكىزەتىنىن حابارلاعان.
وللاند جەڭىستى تويلاۋ ءۇشىن ماليگە كەلدى
فرانتسيا پرەزيدەنتى فرانسۋا وللاند وتكەن سەنبى كۇنى ماليگە كەلىپ, جەرگىلىكتى مەملەكەت باسشىسى ديونكۋندا تراورەمەن كەزدەسكەن جانە فرانتسۋز ارمياسى سوعىس قيمىلدارىن جۇرگىزگەن جەرلەردە بولعان.
ىشكى ىستەر ءمينيسترى لوران فابيۋس جانە قورعانىس ءمينيسترى جان-يۆ لە درياننان باسقا فرانسۋا وللاندتىڭ قاسىندا ەلدىڭ دامۋ ءمينيسترى پاسكال كانفەن دە بار كورىنەدى. ۇرىس مايدانىندا جەدەل جەڭىسكە جەتەتىنىنە تۇپكىلىكتى سەنگەن پاريج مالي اۋماعىنداعى تەررورشىلارعا ەكونوميكالىق شابۋىل جاساۋعا كوشىپ وتىر. تەررورشىلارعا قارسى سوعىستى تەك زەڭبىرەكتىڭ كومەگىمەن عانا جەڭۋ مۇمكىن ەمەس. ەلدى ەكونوميكالىق دامىتۋ عانا ءماليدىڭ سولتۇستىگىنە جيھادشىلاردىڭ قايتا ورالۋىنىڭ الدىن الاتىن بولادى, دەپ اتاپ كورسەتكەن پاريجدەگى ساياسي زەرتتەۋلەر ينستيتۋتىنىڭ مامانى كادەر ابدەرراحيم.
يسپانياداعى جاعداي قايتا شيەلەنىستى
يسپانيا پرەمەرى ماريانو راحوي وزىنە تاعىلعان جەمقورلىق تۋرالى ايىپتاۋدى تەرىسكە شىعارعان بەتتە مادريدتە جانە ەلدىڭ وزگە دە قالالارىندا ستيحيالى ەرەۋىلدەر باستالدى.
ۇكىمەت باسشىسى ەل ازاماتتارىنا ارناعان ۇندەۋىندە ءوزىنىڭ ايلىق ەڭبەكاقىسىنا بەيرەسمي ۇستەمە الماعانىن ايتقان بولاتىن. ول ءوزىنىڭ بانكتىك ەسەپشوتتارىنداعى بۇكىل مالىمەتتەردى جاريالاۋ تۋرالى ۋادە دە بەردى. ال وپپوزيتسيالىق سوتسياليستىك پارتيانىڭ ليدەرلەرى پرەمەردىڭ وتستاۆكاعا كەتۋىن تالاپ ەتۋدە. سونىمەن بىرگە, يسپانيانىڭ الەمدىك داعدارىس زارداپتارىن ءوز باسىنان وتە اۋىر جاعدايدا وتكىزىپ وتىرعان ەۋروپالىق مەملەكەتتەردىڭ ءبىرى ەكەنىن دە ايتا كەتۋ قاجەت.
وباما ايەلدەردى سوعىسقا جىبەرۋگە دايىن
اقش پرەزيدەنتى باراك وباما پەنتاگوننىڭ اسكەري قىزمەتتەگى ايەلدەردىڭ سوعىس ءىس-قيمىلدارىنا قاتىسۋىنا سالىنعان تىيىمنىڭ كۇشىن جويۋ تۋرالى تاياۋداعى باستاماسىنا تۇسىنىكتەمە بەردى.
پرەزيدەنت ايەلدەردى ۇرىس مايداندارىنا جىبەرۋ جونىندە بۇيرىق بەرۋگە دايىن ەكەنىن اتاپ كورسەتكەن. ول ايەلدەردىڭ ءىس ءجۇزىندە ۇرىستارعا بۇرىننان بەرى قاتىسىپ جۇرگەنىن ايتا كەلىپ, ونداي تاجىريبەگە ءوزىنىڭ قارسى ەمەس ەكەنىن بىلدىرگەن. وباما اسكەري ۆەدومستۆونىڭ شەشىمى دۇرىس, ويتكەنى ول نازىك جاندىلاردىڭ مۇمكىندىكتەرىن كەڭەيتە تۇسۋگە باعىتتالعان دەپ ەسەپتەيدى. ايتا كەتۋ كەرەك, بۇگىندە 1,4 ملن. امەريكالىق سولداتتاردىڭ 14 پايىزىن ايەلدەر قۇرايدى.
برازيليادا سوتتالعاندار تۇرمەدەن قاشتى
برازيليانىڭ استاناسى ريو-دە-جانەيرودا سوتتالعاندار وسىنداعى تۇرمەلەردىڭ بىرىنەن جاپپاي قاشىپ شىققان. جيىرمادان استام قىلمىسكەر تۇزەۋ مەكەمەسىنىڭ كاناليزاتسيالىق تۋننەلى ارقىلى قاشقان كورىنەدى.
تۇرمە قىزمەتكەرلەرىنىڭ ايتۋلارىنشا, وقيعانىڭ ءىزىن سۋىتپاي تۇرىپ ءتورت قاشقىندى ۇستاۋدىڭ ءساتى تۇسكەن. سونىمەن ءبىرگە قاشقىنداردىڭ كاناليزاتسيادان ءالى دە شىعىپ ۇلگىرمەۋىنە بايلانىستى قالعاندارىنىڭ دا جاقىن ارادا ۇستالاتىندىعىنا سەنىم مول. سوتتالعاندار قاشىپ شىققان تۇرمەنىڭ سىيىمدىلىعى 1700 ادامدى قۇرايتىن كورىنەدى.
ينتەرنەت ماتەريالدارى نەگىزىندە ازىرلەندى.
