وتان الدىنداعى ازاماتتىق بورىشىن وتەۋ ءۇشىن ەلىمىزدىڭ ءار وڭىرىنەن ىرىكتەلگەن 285 جاس سارباز الماتىداعى 0111 اسكەري بولىمىندە سالتاناتتى تۇردە ءاسكەري انت قابىلدادى. بۇل ءراسىم اسكەريلەر ءۇشىن ەرەكشە جورالعى سانالىپ, ساربازداردىڭ بويىنداعى پاتريوتيزم, وتانعا جانە پرەزيدەنتكە ادال بولۋ, سونداي-اق قازاقستان رەسپۋبليكاسى مەملەكەتتىك كۇزەت قىزمەتىنىڭ قاتارىندا ادال قىزمەت اتقارۋ ءتارىزدى قاسيەتتەرگە تاربيەلەيدى.
قازاقستان رەسپۋبليكاسىنىڭ مەملەكەتتىك كۇزەت قىزمەتىنە مەملەكەت باسشىسىنىڭ, كۇزەتىلەتىن ادامدار مەن وبەكتىلەردىڭ قاۋىپسىزدىگىن قامتاماسىز ەتۋ, مەملەكەتتىك ەتالونداردى كۇزەتۋ جانە مەملەكەتتىك-پروتوكولدىق ءىس-شارالارعا قاتىسۋ جونىندەگى ماڭىزدى جانە جاۋاپتى ميسسيا جۇكتەلگەن. سالتاناتتى راسىمدە انت قابىلداعان سايدىڭ تاسىنداي ساربازدار بۇل مىندەتتەردىڭ سالماعىن انىق سەزىنەتىندەي.
مەملەكەتتىك كۇزەت قىزمەتى باستىعىنىڭ ورىنباسارى – وبەكتىلەر قورعاۋ قىزمەتىنىڭ باسشىسى گەنەرال لەيتەنانت مۇحتار ايۋباەۆ سالتاناتتى شارا بارىسىنداعى العى سوزىندە: «ءسىزدەردىڭ قىزمەتتەرىڭىز ءاربىر قازاقستاندىق وتباسىنىڭ تىنىشتىعى مەن ەرتەڭگى كۇنگە دەگەن سەنىمدىلىگىنىڭ كەپىلى. بۇل جەردە ناعىز جاۋىنگەر بولىپ شىڭدالاسىزدار. وتاندى رياسىز ءسۇيۋ ءدال وسى جەردەن باستاۋ الادى. سىزدەر مۇندا وتانسۇيگىشتىك, ادامگەرشىلىك سياقتى ىزگى قاسيەتتەردىڭ بارلىعىن بويلارىڭىزعا ءسىڭىرىپ, تاباندى ءارى ءتوزىمدى بولۋدى ۇيرەنەسىزدەر. الداعى ءبىر جىلدا جان اياماي قىزمەت ەتىپ, ۇلتتىق نامىسىمىزدىڭ تۋىن بيىكتەن جەلبىرەتىڭىزدەر!» دەپ, جاس ساربازدارعا جىگەر بەرىپ, اتاۋلى كۇنمەن قۇتتىقتادى.
وتە جاۋاپتى مىندەتتەردى ءمىنسىز اتقارۋ ءۇشىن اتالعان قىزمەتتە ساربازداردىڭ كەشەندى دەنە شىنىقتىرۋ جانە جاۋىنگەرلىك دايارلىعىنا باسا نازار اۋدارىلادى. ولار ساپتىق امالداردى, جاۋىنگەرلىك قارۋدان اتۋ ماشىق-داعدىسىن, سونداي-اق جاۋىنگەرلىك تەحنيكانى قۇرعاق جەردە جانە سۋدا جۇرگىزۋدى جانە تاعى باسقالاردى مەڭگەرەدى. سپورتتىق جەتىستىكتەرى بار جاۋىنگەرلەردىڭ ءارتۇرلى دەڭگەيدەگى, ونىڭ ىشىندە الەمدىك دارەجەدەگى سپورتتىق جارىستارعا قاتىسۋ مۇمكىندىگى مول.
اسكەري انت قابىلداۋ ءراسىمىنە مەملەكەتتىك كۇزەت قىزمەتىنىڭ اسكەري قىزمەتكەرلەرى وزدەرىنىڭ شەبەرلىكتەرىن, كاسىپقويلىعى مەن ءىس-قيمىلدارىنىڭ ۇيلەسىمدىگىن كورسەتىپ جيىلعانداردى ءتانتى ەتتى. ءوز كەزەگىندە جاس ساربازدار دا قىسقا مەرزىمدە العان ماشىق-داعدىلارىن, سونىڭ ىشىندە قارۋمەن جانە قارۋسىز يگەرگەن ساپتىق امالدارىن كورسەتىپ, كوپشىلىك الدىندا سالتاناتتى مارشپەن ءجۇرىپ ءوتتى. سونداي-اق پرەزيدەنتتىك ۇرمەلى اسپاپتار وركەسترى مەن قۇرمەت قاراۋىل روتاسى پلاتس-كونتسەرتتىڭ (دەفيلە) جاڭا باعدارلاماسىن كورەرمەن نازارىنا ۇسىندى.
وتان الدىندا انت قابىلداعان ساربازدار الداعى ۋاقىتتا مەملەكەتتىك كۇزەت قىزمەتىنىڭ نۇر-سۇلتان مەن الماتى قالالارىنداعى اسكەري بولىمدەرى بويىنشا تاراتىلىپ, اسكەري مەرزىم ارالىعىندا جۇكتەلگەن اسا جاۋاپتى مىندەتتەردى اتقارۋعا كىرىسەتىن بولادى.
