مۇنداعى ماقسات ءبىر – DigiGirlz جاڭا تەحنولوگيالارعا بەيىمى بار قىز بالالاردىڭ قابىلەتىن ارتتىرىپ, شەبەرلىگىن شىڭداۋدى كوزدەيدى. سول سەكىلدى IT سالاسى جانە ناقتى عىلىمداردى تاڭداۋعا جۇرەگى داۋالاماي جۇرگەن قاراكوزدەرىمىزدىڭ كوزقاراسىن وزگەرتىپ, گەندەرلىك تەڭسىزدىكتى بۇزegۋعا باعىتتالعان.
– نۇر-سۇلتان شاھارىندا قازاقستانداعى العاشقى DigiGirlz High Tech Camp چەمپيوناتىن وتكىزىپ وتىرمىز. بۇل باعدارلاما قىز بالالاردى Stem باعىتىندا, ينجەنەريادا, سىني ويلاۋدا, سونىمەن قوسا ۇجىممەن جۇمىس ىستەۋگە قولداۋعا ارنالعان. قاتىسۋشىلار Arduino-نىڭ نەگىزىندە ءتۇرلى قۇرال-جابدىقتاردى پايدالانا وتىرا جوبالارىن جاسايدى. 14-18 جاس ارالىعىنداعى ۇلكەن توپ – ەكى كۇن بويى روبوتتاندىرىلعان قولدىڭ پروتەزىن قۇراستىرادى, اۆتوماتتاندىرىلعان قولدىڭ جادىندا ساراپتامالىق مالىمەتتەر جيناقتالادى. ال 11-13 جاستاعى كىشى توپتىڭ الدىندا – اكۋلا روبوتىنا قيمىلداۋعا مۇمكىندىك بەرەتىن تەتىكتى جانە باسقارۋ قۇرىلعىسىن ويلاپ تابۋ مىندەتى تۇر, – دەيدى Microsoft قازاقستان ءبىلىم بەرۋ ءبولىمىنىڭ جەتەكشىسى نۇرلان جانىبەك.
سىنعا تۇسكەن جۇمىستاردىڭ تۇگەلى دەرلىك ەسكەرۋسىز قالمايتىنىن ناقتىلادى ۇيىمداستىرۋشىلار. ال «Hewlett Packard Enterprise» كومپانياسىنىڭ قازاقستان جانە قىرعىزستان بويىنشا باس ديرەكتورى دانا التىباەۆا ەلدەگى ءاربىر ەكىنشى ايەل ادام IT سالانى تاڭداۋعا جاسقاناتىنىن ايتادى. ول ءوز مىسالىندا بۇل باعىتتا نازىك جاندىلاردىڭ دا تابىسقا كەنەلۋگە بولاتىنىن كەلتىرىپ, جاستاردى جاڭا باعىتتا مۇمكىندىكتەرىن پىسىقتاۋعا شاقىردى. رەسمي ستاتيستيكا بويىنشا تسيفرلى تەحنولوگيالارمەن ءوز كەلەشەگىن كوبىنەسە ۇل بالالار بايلانىستىرادى ەكەن. قىز بالالاردىڭ ۇلەس سالماعى تەك – 10%. بۇل جاھاندىق ترەند.
جاقسىلىق مۇراتقالي,
«Egemen Qazaqstan»
