شاراينا
سەنبى, 26 قاڭتار 2013 7:32
كورولدى جاقتاۋشىلار جەڭىسكە جەتتى
يوردانيادا وتكەن پارلامەنتتىك سايلاۋدا قازىرگى بيلىكتى جاقتاۋشىلاردان ۇسىنىلعان كانديداتتار پارلامەنتتە كوپ ورىن الدى. «رەيتەر» اقپارات اگەنتتىگىنىڭ حابارلاۋىنشا, سايلاۋدا الدىنا ەلدىڭ ساياسي جانە ەكونوميكالىق جۇيەلەرىن وزگەرتۋگە ەشقانداي ماقسات قويماعان «تايپالاردان كانديداتتار» باسىم ورىنعا يە بولعان.
سەنبى, 26 قاڭتار 2013 7:32
كورولدى جاقتاۋشىلار جەڭىسكە جەتتى
يوردانيادا وتكەن پارلامەنتتىك سايلاۋدا قازىرگى بيلىكتى جاقتاۋشىلاردان ۇسىنىلعان كانديداتتار پارلامەنتتە كوپ ورىن الدى. «رەيتەر» اقپارات اگەنتتىگىنىڭ حابارلاۋىنشا, سايلاۋدا الدىنا ەلدىڭ ساياسي جانە ەكونوميكالىق جۇيەلەرىن وزگەرتۋگە ەشقانداي ماقسات قويماعان «تايپالاردان كانديداتتار» باسىم ورىنعا يە بولعان.
دەگەنمەن, سايلاۋدا تاۋەلسىز كانديداتتار پارلامەنتتەگى ورىننىڭ تورتتەن ءبىرىن, ياعني 150-ءىن الىپتى. پارلامەنتتىك سايلاۋعا ەلدەگى وپپوزيتسيالىق كۇش سانالاتىن «يسلامدىق ءىس-قيمىل مايدانى» بويكوت جاريالاعان ەدى. وسى ۇيىمنىڭ مالىمەتىنشە, تىزىمگە داۋىس بەرۋگە ءتيىس سايلاۋشىلاردىڭ 50 پايىزى عانا ەنگىزىلگەن. ولاردىڭ 56 پايىزدايى سايلاۋ ۋچاسكەلەرىنە كەلگەن كورىنەدى. اتاپ وتەيىك, بىرنەشە ايدان بەرى يوردانيالىق وپپوزيتسيونەرلەر ەلدەگى سايلاۋ زاڭنامالارىن قايتا قاراۋ ماسەلەسىن تالاپ ەتىپ كەلەدى. وسىعان بايلانىستى ءىرى قالالاردا بەيبىت شەرۋلەر دە ءوتىپ ءجۇر.
ەگەمەندىك دەكلاراتسياسىن ماقۇلدادى
يسپانياداعى كاتالونيا پروۆينتسياسىنىڭ پارلامەنتى باسىم داۋىسپەن وزدەرىنىڭ اۋماقتىق ەگەمەندىگى دەكلاراتسياسىن ماقۇلدادى. «گارديان» باسىلىمىنىڭ جازۋىنشا, بۇل كاتالونيانىڭ يسپانيادان تاۋەلسىزدىگىن الۋ تۋرالى رەفەرەندۋم وتكىزۋىنە جول اشادى.
دەكلاراتسيانى پارلامەنت دەپۋتاتتارىنىڭ 85-ءى جاقتاپ داۋىس بەرگەن, 41-ءى قارسى بولعان. ەكى دەپۋتات قالىس قالعان. تاۋەلسىزدىككە نەگىزىنەن وڭىردەگى باسقارۋشى «كونۆەرگەنتسيا جانە وداق» بلوگى مەن رەسپۋبليكالىق سولشىل پارتياسى قولداۋ بىلدىرگەن ەكەن. ال كاتالونيالىق سوتسياليستەر مەن يسپانيا حالىق پارتياسى قارسى بولىپتى. ماقۇلدانعان دەكلاراتسيا سيمۆوليكالىق قۇجات بولىپ تابىلادى. ساراپشىلاردىڭ پىكىرىنشە, بۇل قادام بارسەلونا مەن مادريدتەگى ورتالىق ۇكىمەت اراسىنداعى قارسىلىقتى ۋشىقتىرۋعا سوقتىرۋى مۇمكىن. كاتالونيا – يسپانياداعى ەكونوميكاسى دامىعان پروۆينتسيانىڭ ءبىرى, ەلدىڭ ءىجو-ءسىنىڭ 20 پايىزى سونىڭ ۇلەسىندە.
يادرولىق سىناق جاسايتىنىن مالىمدەدى
سولتۇستىك كورەيا بۇۇ قاۋىپسىزدىك كەڭەسىنىڭ پحەنيانعا قارسى سانكتسياسىن كەڭەيتۋگە جاۋاپ رەتىندە ءۇشىنشى رەت يادرولىق سىناق جاساماق. بۇل جونىندە سولتۇستىك كورەيانىڭ ۇلتتىق قورعانىس كوميتەتى مالىمدەدى.
مالىمدەمەدە الىس قاشىقتىققا ۇشاتىن زىمىراندار كحدر-ءدىڭ «جاۋى» امەريكا قۇراما شتاتتارىنا قارسى باعىتتالاتىندىعى اتالعان. مالىمدەمەدە سونداي-اق, ءسوز «جوعارى دەڭگەيدەگى يادرولىق سىناق» تۋرالى بولىپ وتىرعاندىعى ايتىلعان. ۇلتتىق قورعانىس كوميتەتىنىڭ مالىمدەمەسىندە يادرولىق سىناقتىڭ قاشان جاسالاتىندىعى ناقتى كورسەتىلمەگەن. بىرقاتار ساراپشىلار سولتۇستىك كورەيا ۋران بومباسىن سىناقتان وتكىزەدى دەگەن بولجام جاسايدى. وسى جىلدىڭ 22 قاڭتارىندا بۇۇ قاۋىپسىزدىك كەڭەسى كحدر-ءدىڭ وتكەن جىلدىڭ جەلتوقسانىندا «ىنحا-3» زىمىرانىن ۇشىرعانىنا جاۋاپ رەتىندە قوسىمشا سانكتسيا قابىلداعان ەدى.
قىسقا قايىرىپ ايتقاندا:
* سانكت-پەتەربۋرگتەگى ميحايلوۆ تەاترىنا 10 ميلليارد رۋبل كولەمىندەگى قارجىعا الاياقتىق جاساۋ ءىسى بويىنشا تەكسەرۋ ءجۇرىپ جاتىر. تەاتردىڭ قازىرگى جانە بۇرىنعى باسشىلارىنىڭ پاتەرلەرى دە تىنتىلۋدە.
* امەريكالىق دەۆيد حەلدي ءۇندىستاننىڭ مۋمباي قالاسىندا بولعان تەررورلىق ارەكەتتەردى ۇيىمداستىرۋعا قاتىسقانى ءۇشىن 35 جىلعا باس بوستاندىعىنان ايىرۋ جازاسىنا كەسىلدى.
*پريدنەستروۆەنىڭ بۇرىنعى مەملەكەتتىك قاۋىپسىزدىك ءمينيسترى ۆلاديمير انتيۋفەەۆكە ىزدەۋ جاريالاندى. وعان قىزمەت وكىلەتتىگىن اسىرا پايدالانعان جانە اسا ءىرى كولەمدە مەملەكەت قاراجاتىن ۇرلاعان دەگەن ايىپ تاعىلىپ وتىر.
*فرانتسيا ۇكىمەتى نيگەر ەلىنە ۋران كەنىشتەرىن كۇزەتۋ ءۇشىن ارنايى ماقساتتاعى بولىمشە جىبەردى. بۇل ەلدەگى «ارەۆا» كومپانياسى فرانتسۋزدارعا قارايدى.
ينتەگراتسيالىق ۇدەرىستەرگە قاتىسپايدى
ۇلىبريتانيانىڭ پرەمەر-ءمينيسترى دەۆيد كەمەرون داۆوستاعى بۇكىلالەمدىك ەكونوميكالىق فورۋمدا سويلەگەن سوزىندە الداعى ۋاقىتتا ەۋروپالىق ينتەگراتسيالانۋ قاتەلىك بولادى دەپ مالىمدەدى. سونداي-اق ەۋروپا ەلدەرىنىڭ باسشىلارىن ەۋروپا وداعىنداعى ساياسي بايلانىستاردى تەرەڭدەتۋگە تالاپتانۋدان ساقتاندىردى.
«رەيتەر» اگەنتتىگىنىڭ حابارلاۋىنشا, دەۆيد كەمەرون فورۋمدا سويلەگەن سوزىندە لوندون بۇل ۇدەرىستەرگە قاتىسپايتىندىعىن ايتقان. ونىڭ سوزىنە قاراعاندا, ەۋروپا ەلدەرىنىڭ ارقايسىسىنىڭ وزىندىك تاريحى, ءوز سالت-ءداستۇرى بار. ولاردىڭ وزدەرى جەكە شەشىم قابىلداعىسى كەلەدى. سوندىقتان ولاردى ورتالىقتاندىرىلعان ساياسي وداققا تارتۋدىڭ قاجەتى جوق. سونىمەن بىرگە, پرەمەر ۇلىبريتانيا ەۋروپا وداعى رىنوگىنىڭ ءىرى ويىنشىسى رەتىندە قازىردىڭ وزىندە باسەكەلەستىككە قابىلەتتىلىكتى ارتتىرۋ, تەرروريزممەن كۇرەس سياقتى نەگىزگى جالپىەۋروپالىق مىندەتتەردى شەشۋگە قاتىسىپ جۇرگەندىگىن اتاپ وتكەن. «الداعى ۋاقىتتا وسىعان قاتىستى شەشىمدەر قابىلداۋ ينتەگراتسيانى قاجەت ەتپەيدى», – دەپتى پرەمەر-مينيستر.
اليەۆتىڭ ەسكەرتكىشى باسقا جەرگە كوشىرىلەدى
ازەربايجاننىڭ بۇرىنعى پرەزيدەنتى گەيدار اليەۆتىڭ مەحيكوداعى ەسكەرتكىشى باسقا جەرگە كوشىرىلەتىن بولدى. «نوۆوستي» اقپارات اگەنتتىگىنىڭ حابارلاۋىنشا, گ.اليەۆتىڭ مەحيكونىڭ ورتالىق ساياباعىندا ورناتىلعان ەسكەرتكىشى بۇل جەردەن الىنىپ, ازەربايجان مادەني ورتالىعى ورنالاساتىن عيماراتقا قويىلادى.
گەيدار اليەۆكە ەسكەرتكىش مەكسيكا استاناسىندا وتكەن جىلدىڭ جازىندا ورناتىلعان ەدى. اقپارات كوزدەرىنە قاراعاندا, ازەربايجاندىق تاراپ ەسكەرتكىش قويىلعان ورتالىق ساياباقتىڭ ينفراقۇرىلىمىنا 5 ميلليون دوللار جۇمساعان سياقتى. قالا باسشىلىعىنىڭ ەسكەرتكىش ورناتۋ تۋرالى شەشىمى كەزىندە كوپشىلىك تاراپىنان سىنعا ۇشىراعان ەكەن. جاقىندا قالا بيلىگى سول سىننان قورىتىندى شىعارىپتى. ازەربايجاننىڭ مەكسيكاداعى ەلشىسى يلگار مۇحتاروۆتىڭ ايتۋىنشا, ەسكەرتكىش ساياباققا جەرگىلىكتى بيلىك پەن ازەربايجان ەلشىلىگىنىڭ كەلىسىمى بويىنشا ورناتىلعان.
مەرەكەنى قاقتىعىسپەن باستادى
كەشە كايردەگى تاحرير الاڭىندا شەرۋشىلەر مەن قاۋىپسىزدىك كۇشتەرى قىزمەتكەرلەرىنىڭ اراسىندا قاقتىعىس بولدى. ەگيپەتتىكتەر توڭكەرىستىڭ ەكى جىلدىعىن وسىلايشا قاقتىعىسپەن قارسى الدى. بۇل جونىندە «ءال-جازيرا» حابارلادى.
قاقتىعىس ەرەۋىلشىلەردىڭ پارلامەنت پەن مينيسترلەر كابينەتى عيماراتىنىڭ قورشاۋىن الىپ تاستاۋعا ارەكەت جاساۋى كەزىندە بولعان. ەرەۋىلشىلەردىڭ بىرقاتارى پوليتسەيلەرگە تاس لاقتىرىپ, ەل پرەزيدەنتى م.ءمۋرسيدىڭ وتستاۆكاعا كەتۋىن تالاپ ەتكەن. ال پوليتسەيلەردىڭ ەرەۋىلشىلەرگە قارسى كوزدەن جاس اعىزاتىن گاز قولدانۋلارىنا تۋرا كەلگەن. قاقتىعىس سالدارىنان ونداعان ادام زارداپ شەككەن. مەملەكەت باسشىسى توڭكەرىستىڭ ەكى جىلدىعىن بەيبىت تۇردە اتاپ وتۋگە شاقىرۋدا.
ينتەرنەت ماتەريالدارى نەگىزىندە ازىرلەندى.
