ۇرىنى ۇلىقتاعان قوعامدا قاسيەت قالمايدى
جۇما, 25 قاڭتار 2013 7:08
ءبىر اپتادان اسا ۋاقىتتان بەرى رەسەيدىڭ, سونداي-اق ءبىزدىڭ دە كەيبىر اقپارات قۇرالدارىمىز پوستكەڭەستىك كەڭىستىكتەگى قىلمىستىق دۇنيەنىڭ ەڭ بەدەلدى قايراتكەرى اسلان ۋسوياننىڭ (لاقاپ اتى حاسان اتا) ءولتىرىلۋىن بارىنشا قازبالاپ كورسەتتى. وعان الەمدىك باق تا ءبىراز نازار اۋداردى.
جۇما, 25 قاڭتار 2013 7:08
ءبىر اپتادان اسا ۋاقىتتان بەرى رەسەيدىڭ, سونداي-اق ءبىزدىڭ دە كەيبىر اقپارات قۇرالدارىمىز پوستكەڭەستىك كەڭىستىكتەگى قىلمىستىق دۇنيەنىڭ ەڭ بەدەلدى قايراتكەرى اسلان ۋسوياننىڭ (لاقاپ اتى حاسان اتا) ءولتىرىلۋىن بارىنشا قازبالاپ كورسەتتى. وعان الەمدىك باق تا ءبىراز نازار اۋداردى.
ونىڭ اتىنا قوسىلىپ ايتىلاتىن سيپاتتاما كوپ: ورىس مافياسىنىڭ كورولى, «الەم ۇرىلارىنىڭ ۇلى پاتريارحى», زاڭداعى №1 ۇرى. بىرەۋلەرگە بۇل عايباتتاپ ايتىلعانداي كورىنەر, ال رەسەي قاۋىمىندا اسا ۇلكەن بەدەل. وعان وق اتىلىپ, جارالانعانى بەلگىلى بولعاندا, سول جەرگە ماسكەۋ پوليتسياسىنىڭ باستىعى ولەگ بارانوۆ, رف تەرگەۋ كوميسسياسىنىڭ ماسكەۋ بويىنشا باس تەرگەۋ باسقارماسىنىڭ باستىعى ۆاديم ياكوۆلەۆ جان ۇشىرىپ جەتكەن. بالكىم, باسقا ءبىر بەلگىلى قوعام نە ونەر قايراتكەرى قازا تاۋىپ جاتسا, بۇلار بارماۋى دا مۇمكىن. ال حاسان اتا ءولىپ جاتقاندا, بارماي تۇرا المايدى.
ونىڭ ءومىربايانى تەك قىلمىستان تۇرادى. وتىز جاسىندا «زاڭداعى ۇرى» ءتاجىن كيەدى. بۇدان كەيىن وعان ەشكىم تيمەيتىن بولعان. 1994 جىلى سانكت-پەتەربۋرگكە ورنىعادى. كادىمگى قىزمەتكە ورنالاسقانداي. قۇقىق قورعاۋ ورىندارى عانا ەمەس, قالا باسشىلارى دا, ەل باسشىلارى دا ونىڭ قىلمىستى الەمنىڭ جەتەكشىسى ەكەنىن بىلەدى. بىراق وعان ەشكىم تيىسپەيدى. بۇلار جاسىرىنبايدى دا, ەڭ قىمبات شەتەل كولىگى سولاردىڭ تاقىمىندا. جاساۋلى ءۇي-جاي سولاردىكى. جالعىز ءجۇرمەيدى, ماشينەلەر ەسكورتىمەن قوزعالادى.
قۇقىق قورعاۋ ورگاندارى ءتيىسپەگەنمەن, بۇل ەلدەگى قىلمىستىق پاتشالىقتا ونىڭ باقتالاستارى جەتەرلىك. قاۋىپ سولاردان. حاسان اتاعا بۇعان دەيىن دە قاستاندىق جاسالىپ, 2010 جىلعى قىركۇيەكتە بۇل ەلدىڭ اقپارات قۇرالدارى ءبىراز شۋلاعان. وق تيگەنمەن, اتاقتى بوتكين اۋرۋحاناسىنىڭ دارىگەرلەرى ونىڭ جانىن ساقتاپ قالدى. سوندا اۋرۋحانادا جاتقاندا سول مەديتسينالىق مەكەمەنىڭ ىشىندە قىلمىسكەرلەر مافياسىنىڭ كورولىن رەسەيدىڭ ەڭ وزىق پوليتسيا بولىمدەرى مەن ارناۋلى قىزمەتىنىڭ جانە بانديتتەردىڭ ءجۇز قارالى ادامى قورعاۋعا الدى.
بۇل جولى رەسەيدىڭ مەديتسيناسى, وسى ەلدىڭ قىلمىستىق الەمىنىڭ قارجىلىق قۇدىرەتى حاسان اتانى قۇتقارا المادى. ەندى ونى جەرلەۋ عانا قالعان. بۇل جەردە دە قىلمىسكەردى قۇرمەتتەۋدىڭ, ۇرىنى ۇلىقتاۋدىڭ «ونەگەسى» كورسەتىلدى. ءماسكەۋدىڭ تروەكۋروۆ زيراتىندا ازاماتتىق جانازاسىن شىعارۋ وتكىزىلدى. وعان بىرنەشە مىڭ ادام قاتىسقان. اراسىندا قىلمىستىق الەمنىڭ باسشىلارى بار. بۇل زيراتقا بارار جولدا ەڭ قىمبات شەتەلدىك كولىكتەردىڭ كەپتەلەگى بولعان.
جانازاسىن قىلمىستىق ءدۇنيەنىڭ ورتالىعىندا شىعارعانىمەن, حاسان اتانىڭ وسيەتىمەن ونى تۋعان جەرى گرۋزيادا جەرلەمەك بولادى. ۇلى ۇرىنىڭ مۇردەسى سالىنعان ۇشاق سولاي قاراي ۇشادى, ءسىرا, ورىس مافياسى كورولىنىڭ مۇراگەرلەرى ونى تۋعان جەرى قۇشاق جايا قارسى الادى دەپ ويلاسا كەرەك, بىراق قىلمىسقا قارسى قول كوتەرگەن گرۋزيا ونى قابىلدامادى. مۇراگەرلەر امالسىز قىلمىستىلارعا قۇرمەت كورسەتەتىن جەرگە قايتا ورالۋعا ءماجبۇر بولدى.
حاسان اتا ماسكەۋدىڭ حوۆان زيراتىندا جەرلەندى. ۇلى ۇرىنى ۇلىقتاۋ, قىلمىسكەردى قۇرمەتتەۋ تاعى جالعاستى. تاعى دا وعان قىلمىستىق دۇنيەنىڭ قايراتكەرلەرى قاتىستى. ولار ەشكىمنەن قورىقپايدى, بوي تاسالامايدى. قازىر باسپاسوزدە ۇلى ۇرىنىڭ جاقىن سەرىكتەرىنىڭ, مۇراگەرلەرىنىڭ اتى-ءجونى جازىلىپ جاتىر. ولار بارلىق جەردە بار كورىنەدى. استاپىراللا, بىزدە دە بار ەكەن! اتى-ءجونى كۋرد-ەزيد گادي كالويان. ونى ءبىزدىڭ ورىندار دا بىلەتىن شىعار. ءبىلمەسە, بۇلار شوشقا تاعالاپ ءجۇر مە دەيسىڭ. ال بىلسە, نەگە تۇقىمىن قۇرىتپايدى. بۇلار دا ۇلىنى ۇلىقتاي ما دەگەن سۇراق تۋىندايدى.
ماماديار جاقىپ, «ەگەمەن قازاقستان».
