بيىلعى قازاقستاننىڭ وزبەكستانداعى جىلىنا وراي قويىلعان بۇل ساحنا تۋىندىسىنا شىعارماشىلىق سالاسىنداعى ءبىرقاتار تانىمال تۇلعالار قاتىستى. قازاقتىڭ كلاسسيك جازۋشىسى مۇحتار ومارحان ۇلى اۋەزوۆتىڭ وسى اتتاس تۋىندىسىن جازۋشى, وزبەكستان ونەرىنە ەڭبەك سىڭىرگەن قايراتكەر ناسىر فازىلوۆ ءتارجىمالاعان بولاتىن. ال قويىلىمنىڭ جاڭا زاماناۋي رەداكتسياسىن بەلگىلى پۋبليتسيست احمادجون مەليباەۆ دايىنداعان. رەجيسسەرى – وزبەكستانعا ەڭبەك سىڭىرگەن ءارتىس مارات ازيموۆ, سۋرەتشىسى – وزبەكستان ونەرىنە ەڭبەك سىڭىرگەن قايراتكەر باحتيەر تۋراەۆ.
سپەكتاكلدە ابايدىڭ قىم-قۋىت قاراما-قايشىلىق پەن سان ءتۇرلى سىناقتارعا تولى تاعدىرى باياندالادى. باستى ءرولدى ءوزبەكستاننىڭ حالىق ءارتىسى, مەملەكەتتىك سىيلىقتىڭ يەگەرى ياكۋب احمەدوۆ پەن وزبەكستانعا ەڭبەك سىڭىرگەن ءارتىس ماحمۋد يسمايلوۆ اسقان شەبەرلىكپەن سومدادى. سونىمەن قاتار ءوزبەكستانعا ەڭبەك سىڭىرگەن ارتىستەر – گۋلچەحرا يبراگيمبەكوۆا, سايورا يۋنۋسوۆا, شوحيدا يسمايلوۆا, مەحريددين راحماتوۆ, ابدۋرايم ابدۋباحوبوۆ, تاحير سايدوۆ تا ءوز رولدەرىن تاماشا ورىنداپ شىقتى. قويىلىمدا ديلنوزا كۋباەۆا, ازيزا شاريپوۆا, فەرۋز بۋرحونوۆ, لازيز ورزيەۆ سەكىلدى جاس تالانتتار دا ونەر كورسەتتى.
فاتيما قاناەۆا
شىرشىق قالاسى
