اقتاۋ قالاسىندا تەڭىز جاعالاۋىندا FIA حالىقارالىق اۆتوموبيل فەدەراتسياسىنىڭ «راللي قازاقستان – 2019» راللي-رەيدتەر بويىنشا الەم كۋبوگى كەزەڭىنىڭ سالتاناتتى مارەسى ءوتتى. شيەلەنىسكە تولى جارىس جولىنىڭ قورىتىندىسى بويىنشا قاتارلىق اۆتوشاباندوز ناسسەر ءال-اتتيا شتۋرمانى ماتە بومەلمەن بىرگە جەڭىس تويىن تويلادى, ەكىنشى ورىندى ەرلى-زايىپتى ستەفان مەن اندرەا پەتەرانسەلدەردىڭ ەكيپاجى يەلەنسە, ۇزدىك ۇشتىكتى ياكۋب پشيگونسكي مەن تيمو گوتتشالك تۇيىندەدى.
سوڭعى شەشۋشى التىنشى كەزەڭدە شاباندوزدار كاسپي تەڭىزىنىڭ جاعالاۋى سىزىعىنىڭ بويىمەن اقتاۋ قالاسىنان سولتۇستىككە قاراي وتكەن ەڭ قىسقا 148 شاقىرىمدىق ارنايى ۋچاسكەدەن ءوتتى. جارىستىڭ سوڭعى كۇنى بەرنحارد تەن برينكەن مەن توم كولسۋلدىڭ كومانداسى ۇزدىك ناتيجە كورسەتتى. بۇل كوماندا كەشەگى ساتسىزدىكتەن كەيىن جۇلدەلى ورىننان الشاقتاعان بولاتىن. مارەگە ەكىنشى بولىپ فرانتسۋز ستەفان پەتەرانسەل جەتتى. جارىستىڭ ءفاۆوريتى ناسسەر ءال-اتتيا كۇننىڭ ءۇشىنشى ناتيجەسىن كورسەتتى.
التى كەزەڭنىڭ قورىتىندىسى بويىنشا Toyota Hilux اۆتوكولىگىندە ونەر كورسەتەتىن, «داكار» راللي-مارافونىنىڭ قازىرگى جەڭىمپازى ناسسەر ءال-اتتيا «راللي قازاقستان – 2019» كەزەڭىندە توپ جاردى. بۇعان جارىستىڭ الدىڭعى كۇندەرىندە قول جەتكىزىلگەن قارسىلاستاردان ارتىقشىلىق كوپ اسەر ەتتى. وسىلايشا قاتارلىق «راللي قازاقستان» كەزەڭىنىڭ ەكى دۇركىن جەڭىمپازى اتاندى.
– مەن «راللي قازاقستاندا» توپ جارعانىما شىن قۋانىشتىمىن. بىرىنشىلىكتە كوش باستاپ تۇرمىز, بۇل – ناعىز فانتاستيكا. ەندى ماروككو ءرالليىن كۇتەمىز. البەتتە, بۇل – ءبىز ءۇشىن جاقسى جىل, التى جارىس جانە التى جەڭىس. ءبىز سوڭعى ۋچاسكەنى ويداعىداي وتتىك, بارلىعىن باقىلاۋىمىزدا ۇستادىق, – دەيدى «راللي قازاقستان – 2019» جەڭىمپازى ناسسەر ءال-اتتيا.
«داكار» راللي-مارافونىنداعى جەڭىستەر سانى بويىنشا رەكوردشى, «راللي قازاقستان – 2019» كەزەڭىنىڭ دەبيۋتانتى ستەفان پەتەرانسەلگە جەڭىسكە نەبارى 5 مينۋتتان استام ۋاقىت جەتپەدى.
– بۇگىن ءبىز كاسپي تەڭىزىنىڭ جاعاسىندا مارە سىزىعىن كەستىك. ءسوز جوق, ادەمى پەيزاجدار, تاماشا جاعاجاي. ءبىرىنشى كۇنى ءبىز كولىك دوڭگەلەگىنىڭ تەسىلۋىمەن كوپ ۋاقىت جوعالتىپ الدىق. سودان كەيىن, ۇلكەن قاتەلىكتەرگە بوي الدىرمادىق, – دەپ اسەرىمەن ءبولىستى ستەفان پەتەرانسەل.
اتى اڭىزعا اينالعان شاباندوزدىڭ جۇبايى جانە شتۋرمانى اندرەا قازاقستان جولدارىنداعى ءرالليدىڭ جىلدامدىعىنا تاڭعالعانىن ايتادى. ءبىز كەيدە ساعاتىنا 200 شاقىرىمنان استام جىلدامدىقپەن جۇردىك. مۇنداي جاعدايدا دۇرىس ناۆيگاتسيا بەرۋ وڭاي ەمەس. مەن «راللي قازاقستاننان» ۇلكەن تاجىريبە الدىم, دەدى اندرەا پەتەرانسەل.
ماڭعىستاۋداعى رالليدە قازاقستاندىق پيلوتتار مەن شتۋرماندار راللي-رەيد الەمىنىڭ ۇزدىك وكىلدەرىمەن تايتالاستى, سونداي-اق راللي-رەيد بويىنشا قازاقستان رەسپۋبليكاسى كۋبوگىنىڭ ۇلتتىق ەسەبىن انىقتادى. ال قازاقستاندىق كوماندالار ءۇشىن ەڭ ۇزدىك ناتيجە اندرەي چەرەدنيكوۆ پەن شتۋرمان يگنات فالكوۆتىڭ ەكيپاجىمەن قول جەتكىزىلگەن 6-شى ورىن بولدى.
– بيىل «راللي قازاقستان – 2019» تاعى ءبىر مارتە وراسان زور حالىقارالىق جارىسقا اينالدى. قازاقستان العاش رەت 2017 جىلى وسى بەدەلدى الەم كۋبوگىنىڭ كەزەڭدەرىنىڭ ءبىرىن وتكىزۋ قۇقىعىنا قول جەتكىزدى جانە سول ۋاقىتتان باستاپ ءبىز جىل سايىن راللي-رەيدتى ۇيىمداستىرۋدا جاڭا دەڭگەيگە شىعۋعا ۇمتىلامىز. جارىستىڭ بارلىق قاتىسۋشىلارى مارشرۋتقا جانە ناۆيگاتسياعا, سونداي-اق «راللي قازاقستان – 2019» دوداسىنىڭ جالپى اتموسفەراسىنا ءدان ريزا بولدى دەپ سەنىممەن ايتا الامىز. قازاقستاندىق سپورتشىلار تاجىريبەسىن ارتتىرۋدا, ال ەلىمىزدەگى اۆتوسپورتتىڭ دامۋى الەمدىك ارەنادا ەلىمىزدىڭ وڭ ءيميدجىن قالىپتاستىرۋعا سەپتىگىن تيگىزۋدە, – دەپ اتاپ ءوتتى قازاقستان اۆتوموتوسپورت فەدەراتسياسىنىڭ پرەزيدەنتى مارات ابىقاەۆ.
ت2 ساناتىندا Toyota Land cruiser اۆتوكولىگىن تىزگىندەگەن تاعى ءبىر قاتارلىق شاباندوز موححاممەد ءال-مەەر دارا شىقتى. ەكىنشى ورىندى تۇركىمەنستاندىق شامىرات گۋربانوۆتىڭ ەكيپاجى يەلەندى. ال بۇل سەريانىڭ قولا جۇلدەسىنە قازاقستاندىق «Aktau Motorsport» كومانداسىنىڭ وكىلدەرى كيريلل چەرنەنكوۆ پەن الەكسەي مۋن قول جەتكىزدى. اقتاۋ اۆتوجارىسشىلارى جارىستىڭ بارلىق كۇنى جاقسى ونەر كورسەتتى, بىراق راللي سپورتتىق ەرەجەلەرىن ساقتاماعانى ءۇشىن العان كوپ ساعاتتىق پەناليزاتسيالار ەكيپاجعا بۇدان دا جوعارى ورىندارعا ۇمىتكەر اتانۋعا ءمۇمكىندىك بەرمەدى. جالپى ەسەپتە ت3 ساناتىندا برازيليادان كەلگەن اۆتوجارىسشى رەينالدو ۆارەلاعا تەڭ كەلەر شاباندوز بولمادى. يسپانيا ەلىنىڭ وكىلى حوسە لۋيس پەنا كامپو جالپى ەسەپتە كوشباسشىدان ءبىر جارىم ساعاتقا جول بەرىپ, ەكىنشى ورىنعا تابان تىرەدى.
«راللي قازاقستان – 2019» ۇلتتىق ەسەبىندە «كاماز-ماستەر» كومانداسى مەن پيلوت دميتري سوتنيكوۆ جەڭىسكە جەتتى. ەكىنشى جانە ءۇشىنشى ورىنداردى «گاز رەيد سپورت» كومانداسىنان ميحايل شكلياەۆ پەن الەكسەي حلەبوۆتىڭ ەكيپاجدارى يەلەندى.
ەندى پيلوتتار 2019 جىلعى راللي-رەيد بويىنشا قازان ايىندا ماروككودا وتەتىن FIA الەم كۋبوگىنىڭ كەلەسى جانە سوڭعى كەزەڭىنە دايىندالماق.
ماڭعىستاۋ وبلىسى
