جازعى دەمالىستى ۇيىمداستىرۋدا الەۋمەتتىك قولداۋعا ءزارۋ وتباسىلاردىڭ بالالارىنا ەرەكشە قولداۋ كورسەتىلىپ, 16 مىڭعا جۋىق بالاعا تەگىن جولدامالار بەرىلمەك. ياعني, بيىلعى جازدا دا «بالاعا جولداما سىيلايىق!» اتتى شارا ءوز جالعاسىن تابادى. ءوڭىردەگى دەمەۋشىلەر مەن مەتسەناتتاردىڭ كومەگىمەن بالالارعا جالپى قۇنى 21,8 ميلليون تەڭگە تۇراتىن 358 جولداما بەرىلەدى دەپ جوسپارلانۋدا.
ەكىباستۇزداعى «بوگاتىر كومىر» جشس 12,6 ميلليون تەڭگەگە 200 جولداما, «گرەس-2» اق ستانساسى 3,1 ميلليون تەڭگەگە 50 جولداما, «گرەس-1» اق 1,1 ميلليون تەڭگەگە 50 جولداما, «قازحروم» اق فيليالىنىڭ اقسۋ فەرروقورىتپا زاۋىتى 1,5 ميلليون تەڭگەگە 30 جولداما بەردى.
وبلىستاعى «جاسىل جەلەك» ەكولوگيالىق جوباسى بارىسىندا «ءاربىر مەكتەپ اۋلاسى – گۇلدەنگەن باق» باستاماسى بويىنشا دا مۇعالىمدەر, وقۋشىلار, اتا-انالار بىرلەسە ىسكە كىرىسپەك.
– بۇل بالانىڭ ەڭبەككە, كاسىپكە دەگەن قىزىعۋشىلىعىن قالىپتاستىراتىن ماڭىزدى كەزەڭ. سوندىقتان بالالاردىڭ جۇمىسقا ورنالاسۋىنا بارىنشا كومەكتەسۋ قاجەت, – دەيدى ءبىلىم باسقارماسىنىڭ باسشىسى ءدىنيسلام بولاتحان ۇلى.
جىلداعىداي باياناۋىلداعى وبلىستىق «جاس داۋرەن» وقۋ-ساۋىقتىرۋ ورتالىعىنىڭ «قازاق-camp» اتتى ماۋسىمى باستالادى. «تۋعان ولكە ساياسىندا» ەتنوكرۋيز جوباسىنا قاتىسۋشى جاس اقىندار, مۋزىكانتتار, سۋرەتشىلەر ءوڭىردىڭ كيەلى جەرلەرى بويىنشا جولعا شىعادى.
