اقتاۋ قالاسىندا حالىق جازۋشىسى, قازاق ادەبيەتىنىڭ ءىرى وكىلى, مەملەكەت جانە قوعام قايراتكەرى ءابىش كەكىلباي ۇلىنىڭ 80 جىلدىق مەرەيتويى قارساڭىندا تالانتتى وقۋشىلار اراسىندا وتكەن ءىى رەسپۋبليكالىق ءابىش وقۋلارى بايقاۋى وسىنى اڭعارتتى.
ءا.كەكىلباي ۇلىنىڭ جۇبايى كلارا جۇمابايقىزى جانە زامانداستارى, ارداگەر ۇستازدار قاتىسقان اشىلۋ سالتاناتىنان سوڭ ءتورت باعىتتان تۇراتىن بايقاۋ باستالدى.
ماڭعىستاۋ, اقتوبە, باتىس قازاقستان, شىعىس قازاقستان, الماتى, جامبىل, قوستاناي وبلىستارىنان, سونداي-اق نۇر-سۇلتان قالاسىنان 100-گە تارتا وقۋشى قاتىسقان بايقاۋدىڭ ساحنالىق قويىلىم باعىتىنا 12 توپ, مانەرلەپ وقۋ باعىتىنا 13 وقۋشى, عىلىمي جوباعا 14 وقۋشى قاتىسسا, يلليۋستراتسيالىق سۋرەتتىڭ ءۇي تاپسىرماسى بولىمىنە جۇمىستارىن ۇسىنعان 13 قاتىسۋشى تاقىرىپتار بويىنشا سۋرەت سالدى. بايقاۋ بارىسىندا جازۋشىنىڭ «تەڭىز جاعاسىنداعى وي», «اكە», «ارحەولوگ», «ۇركەر», «ماحاببات مۇناراسى», «شىڭىراۋ», «ابىلاي حان», «كولدەنەڭ كوك اتتى», «حانشا داريا حيكاياسى» اتتى تاريحي وقيعاعا تولى, ادامگەرشىلىككە, ءوشپەس قۇندىلىقتارعا باۋليتىن كەسەك تۋىندىلارىنان ساحنالىق قويىلىم قويىلىپ, وقۋشىلار قالامگەردىڭ پروزاسى مەن پوەزياسىن مانەرلەپ وقىدى. سونداي-اق ءا.كەكىلباي ۇلىنىڭ شىعارمالارى وقۋشى تانىمىندا جان-جاقتى زەردەلەنىپ, زەرتتەۋ نىسانىنا اينالۋمەن قاتار, شىعارماعا ارقاۋ بولعان تاقىرىپتار بالا قيالىندا, بالا قالامىندا يلليۋستراتسيالىق سۋرەتتەر ارقىلى بەينەلەندى.
بايقاۋ قورىتىندىسىندا كلارا جۇمابايقىزى, ماڭعىستاۋ وبلىسى اكىمىنىڭ ورىنباسارى رۋسلان ساكەەۆ بايقاۋ جەڭىمپازدارىن قازاقستان رەسپۋبليكاسى ءبىلىم جانە عىلىم مينيسترلىگى «دارىن» رەسپۋبليكالىق عىلىمي-پراكتيكالىق ورتالىعىنىڭ ديپلومدارىمەن, ارنايى سىيلىقتارىمەن ماراپاتتادى.
ءتورت باعىت بويىنشا جەكەلەگەن جۇلدەگەرلەرمەن ءبىرگە, جەڭىمپاز توپتار دا انىقتالدى. الدىڭعى ورىندى ماڭعىستاۋ وبلىسى, ەكىنشى ورىندى اباي اتىنداعى رەسپۋبليكالىق مامانداندىرىلعان دارىندى بالالارعا ارنالعان مەكتەپ-ينتەرناتى, ءۇشىنشى ورىندى اقتاۋ قالاسىنداعى نازارباەۆ زياتكەرلىك مەكتەبى وقۋشىلارى يەلەندى.
ماراپاتتان سوڭ بايقاۋ قاتىسۋشىلارى, جەتەكشىلەرى جانە قازىلار القاسى قارا ءسوزدىڭ سۇڭعىلا سۇلەيى, ادەبيەت الەمىنىڭ ابىزى, ماڭعاز ماڭعىستاۋدىڭ مارعاسقاسى, زامانىمىزدىڭ زاڭعار جازۋشىسى ءابىش كەكىلباەۆتىڭ تۋعان جەرى وندى اۋىلىنا, وتپان تاۋ تاريحي-مادەني كەشەنىنە ساياحاتتادى.
ماڭعىستاۋ وبلىسى
