ساكەن سەيفۋللين
(1894-1938) 1917 جىلى قازاق كوميتەتى قۇرىلعاندا اۋەلى ورىنباسار, ءبىرازدان كەيىن ونىڭ باستىعى بولىپ سايلاندى. «جاس قازاق» ۇيىمىن قۇرىپ, «تىرشىلىك» اتتى گازەت شىعارعان. 1922 جىلدىڭ كوكتەمىندە ساكەن قاسىنا ءبىر توپ سەرىكتەرىن ەرتىپ, بەتپاقدالا ارقىلى تۇركىستانعا ءوتىپ, تاشكەنتكە بارادى. ورىنبورعا قايتىپ كەلگەن سوڭ «ەڭبەكشى قازاق» گازەتىنىڭ رەداكتورلىعى مەن وقۋ حالىق كوميسسارياتىنىڭ ورىنباسارلىعىنا تاعايىندالادى. س.سەيفۋللين گازەتتى 1922 جىلدان 1924 جىلدىڭ ساۋىرىنە دەيىن باسقارعان. كەزىندە «قىزىل سۇڭقار» اتانىپ, كەڭەس وكىمەتىن ورناتۋعا بەلسەنە اتسالىسقان ساكەن سەيفۋللين دە قىزىل قۋعىن-سۇرگىننەن قاشىپ قۇتىلا الماعان. اقىن جازىقسىز تۇتقىندالىپ, 1938 جىلى اتۋ جازاسىنا كەسىلەدى.
مولداعالي جولدىباەۆ
(1887-1938) گازەتتى 1924 جىلدىڭ ءساۋىرىنەن باستاپ سول جىلدىڭ جەلتوقسانىنا دەيىن باسقارعان. 1910-1918 جىلدارى قوعامدىق جۇمىستارعا بەلسەنە كىرىسەدى. «ايقاپ» جۋرنالىنا, «قازاق» گازەتىنە ەڭبەكشى حالىقتىڭ مۇڭ-مۇددەسىن كوزدەيتىن ماقالالارى جارىق كورىپ تۇرادى. «ەڭبەكشى قازاققا» قازاقتىڭ بەلدى اقىن-جازۋشىلارى بەيىمبەت پەن ساكەن كەزەك-كەزەك باسقارىپ تۇرعان كەزەڭدە جاۋاپتى رەداكتورلىققا كەلەدى. م.جولدىباەۆ 1927 جىلدان باستاپ شىعا باستاعان ۇلتتىق پەداگوگيكالىق ارناۋلى باسىلىم – «جاڭا مەكتەپ» جۋرنالىنىڭ العاشقى رەداكتورى بولادى.
تۇرار رىسقۇلوۆ
(1894-1938) كوميتەرن اك ورتا-شىعىس ءبولىمى مەڭگەرۋشىسىنىڭ ورىنباسارى, سونىمەن قاتار 1924 جىلدىڭ ورتاسىنان 1925 جىلدىڭ شىلدەسىنە دەيىن كوميتەرننىڭ موڭعولياداعى وكىلى, 1926 جىلى بك(ب)پ قازاق ولكەلىك كوميتەتىنىڭ ءباسپاسوز ءبولىمىنىڭ مەڭگەرۋشىسى جانە ولكەلىك «ەڭبەكشى قازاق» گازەتىنىڭ جاۋاپتى رەداكتورى قىزمەتتەرىن اتقارعان. گازەتكە 1926 جىلدىڭ ساۋىرىنەن باستاپ 1926 جىلدىڭ ماۋسىمىنا دەيىن رەداكتور بولعان. 1926 جىلدىڭ ماۋسىمىنان 1937 جىلدىڭ شىلدەسىنە دەيىن رسفسر حالكومكەڭەسى توراعاسىنىڭ ورىنباسارى بولىپ, رەپرەسسياعا ۇشىراعان.
وراز جاندوسوۆ
(1889-1938) ءتۇركىستان كپ وك-ءنىڭ ۇگىت-ناسيحات ءبولىمىنىڭ مەڭگەرۋشىسى جانە بك(ب)پ قازاق ولكەلىك كوميتەتىنىڭ ەكىنشى حاتشىسى بولعان. 1923-1924 جىلدارى ءماسكەۋدەگى ك.تيميريازەۆ اتىنداعى اۋىلشارۋاشىلىق اكادەمياسىندا وقىعان. 1924-1928 جىلدارى بك(ب)پ قازاقستان ولكەلىك كوميتەتى ۇگىت-ناسيحات ءبولىمىنىڭ مەڭگەرۋشىسى قىزمەتىن اتقارعان. «ەڭبەكشى قازاق» گازەتىنە باسشىلىق جاساعان كەزدەرى, مىنە, وسى قىزمەتتە جۇرگەن كەزبەن تۇسپا-تۇس كەلەدى. و.جاندوسوۆ گازەتتى 1926 جىلدىڭ ماۋسىمىنان 1926 جىلدىڭ شىلدەسىنە دەيىن باسقارعان.
وراز يساەۆ
(1899-1938) گازەتتى 1926 جىلدىڭ ءشىلدەسىنەن 1926 جىلدىڭ تامىزىنا دەيىن باسقارعان. بۇل ءجونىندە بەلگىلى عالىم تەمىربەك قوجاكەەۆ «ەگەمەن قازاقستاننىڭ» 1994 جىلعى 14 جەلتوقساندا شىققان «گازەتتىڭ العاشقى كەرۋەنباسىلارى» دەگەن ماقالاسىندا بىلاي دەپ جازادى: «1926 جىلعى شىلدەنىڭ 13-ءى مەن تامىزدىڭ 30-ى ارالىعىندا گازەت رەداكتورى و.يساەۆ بولدى بۇل تۇستا ول قازكرايكومنىڭ ۇيىمداستىرۋ ءبولىمىن باسقارعان. كەيىن ون جىلداي حالىق كوميسسارلار كەڭەسىنە توراعالىق ەتكەن ىسكەر دە بەدەلدى قىزمەتكەر بولعان».
