«مەلومان» كومپانياسى وكىلدەرىنىڭ ايتۋىنشا, پروكاتتىڭ العاشقى دەمالىس كۇندەرىندە قازاق ءتىلىندەگى «الاددين» ەرتەگىسىن كورەرمەندەردىڭ رەكوردتىق سانى, ياعني ءۇش مىڭنان استام ادام تاماشالاپتى. اتالعان تسيفر وسىدان ەكى اي بۇرىن عانا الەمدىك پرەمەراسى وتكەن «دامبو» كينوكارتيناسىنىڭ تابىسىنان ەكى ەسە اسىپ تۇسەدى. كومپانيا اتاپ وتكەندەي, بۇل – ورىس جانە قازاق تىلىندە پروكاتتا ءجۇرىپ جاتقان فيلمگە قاتىسۋدىڭ ەڭ جاقسى كورسەتكىشى.
دەمەك, بۇدان «بولاشاق» كورپوراتيۆتىك قورىنىڭ «ءوزىڭنەن باستا» جوباسى اياسىندا قولعا الىنعان الەمدىك ۇزدىك فيلمدەردى قازاق تىلىنە اۋدارۋ جانە دۋبلياجداۋ ءىسىنىڭ بۇگىندە كورەرمەن اراسىندا كەڭ قولداۋ تاپقاندىعىنا كوز جەتكىزۋگە بولادى.
«الاددين» كينوميۋزيكلىمەن قوسا ەسەپتەگەندە 2011 جىلدان بەرى اتالعان جوبا اياسىندا بارلىعى 29 گولليۆۋدتىق كينوكارتينا قازاق ءتىلىنە اۋدارىلىپ, دۋبلياجدالىپتى. ناقتىراق ايتساق, «Walt Disney Pictures»/ «Pixar» ستۋديالارىنىڭ 13 انيماتسيالىق ءفيلمى جانە «Sony Pictures», «Disney», Lucasfilm Ltd. مەن Marvel Studios Inc. ستۋديالارىنىڭ وتباسىلىق كورسەتىلىمگە ارنالعان 16 فيلمى انا تىلىندە سويلەدى. ولاردىڭ قاتارىندا «تاچكي-2»/«كولىكتەر 2», «مستيتەلي-2: ەرا الترونا»/ «كەك الۋشىلار: الترون ءداۋىرى», «حرابرايا سەردتسە»/ «باتىل ءجۇرەك», «تاينا كوكو»/ «كوكو قۇپياسى», «موانا», «مالەفيسەنتا» جانە باسقا تۋىندىلار بار.
اتالعان جوبا ارقىلى بۇگىندە وتاندىق 100-دەن استام اكتەر «Walt Disney Pictures» داۋىستار قورىندا تىركەلگەن. ونىڭ ىشىندە, اسىرەسە, قازاقستانعا دۋبلياج بويىنشا حالىقارالىق تانىمالدىق اكەلگەن ەڭ العاشقى انيماتسيالىق فيلم – «تاچكي 2»/«كولىكتەر 2» جوباسىندا مەتر ءرولىن دىبىستاعان اكتەر ازامات قاناپيا داۋسىنىڭ الەمدەگى ەڭ ۇزدىك داۋىس دەپ تانىلۋىن ايرىقشا اتاپ وتۋگە بولادى. سونىمەن قاتار ازامات بەس جىل بويى اكتەر ۋيل ءسميتتىڭ داۋىسىن دىبىستاۋ قۇقىعىنا يە بولدى.
وسى تۇستا اتاپ وتەر تاعى ءبىر ماڭىزدى دەرەك – قازاق ءتىلى دۋبلياجدا تۇرىك تىلىنەن كەيىنگى ەكىنشى تۇركى تىلىنە اينالدى جانە «Walt Disney» كومپانياسىنىڭ تاريحىندا 39-شى, ال «Sony Pictures» ستۋدياسى رەيتينگىندە 7-ءشى ورىن تۇعىرىنا كوتەرىلدى. سونداي-اق شىعىس ەۋروپا مەن تمد ەلدەرىنە ارناپ شىعارىلاتىن Blu-Ray-دە تاماشالاۋعا قولجەتىمدى گولليۆۋدتىق فيلمدەردىڭ العاشقى جەتىلىگىنە دە ەنىپ ۇلگەردى. بۇل – قازاق دۋبلياجى مەن اكتەرلەرى ءۇشىن ۇلكەن جەتىستىك ەكەنى ءسوزسىز.
