قازاقستان پرەزيدەنتى «بولاشاق» زاۋىتىنىڭ وندىرىستىك نىساندارىن تىكۇشاقپەن ارالاپ كوردى.
مەملەكەت باسشىسىنا مۇناي-گاز سالاسىنىڭ احۋالى مەن ونى دامىتۋ پەرسپەكتيۆالارى جونىندە باياندالدى. سونىمەن قاتار قاسىم-جومارت كەمەل ۇلىنا مۇناي وڭدەۋدىڭ جانە تۇراقتاندىرۋدىڭ, سۇيىتىلعان گازدى مۇنايدان اجىراتىپ الۋ مەن تازالاۋدىڭ, تابيعي كۇكىرتتى ءوندىرۋدىڭ جانە ونى ساقتاۋ مەن تاسىمالداۋدىڭ تەحنولوگيالىق ۇدەرىستەرى تانىستىرىلدى.
قاسىم-جومارت توقاەۆ ءوندىرىس ورنىنىڭ اتىراۋ قالاسىنان الىس ەمەسىن اتاپ ءوتىپ, قورشاعان ورتانى قورعاۋعا ەرەكشە كوڭىل بولۋگە شاقىردى. سونىمەن قاتار مەملەكەت باسشىسى قازاقستان ازاماتتارىنىڭ ەڭبەك قۇقىعىن ساقتاۋدىڭ ماڭىزدىلىعىنا توقتالدى.
قازاقستان پرەزيدەنتى كاسىپورىن ۇجىمىن تاۋلىگىنە 370 مىڭ باررەل مۇناي وڭدەپ, رەكورد جاڭارتۋىمەن قۇتتىقتادى جانە مۇنايشىلارعا تابىس, باق-بەرەكە تىلەدى.
قازاقستان پرەزيدەنتى قاسىم-جومارت توقاەۆ ودان كەيىن ارەس PetroTechnic جوعارى كوللەدجىنە باردى. مەملەكەت باسشىسى كوللەدجدىڭ وقۋ كورپۋسىن, لابوراتوريالارىن, شەبەرحانالارىن, كىتاپحاناسى مەن جاتاقحاناسىن ارالاپ كوردى.
قازاقستان پرەزيدەنتىنە حالىقارالىق ستاندارتتار مەن الەمدىك وزىق تاجىريبەنى, سونداي-اق شەتەلدىك جانە وتاندىق مۇناي-گاز كومپانيالارىنىڭ تالاپتارىن ەسكەرە وتىرىپ ءازىرلەنگەن يننوۆاتسيالىق ءبىلىم باعدارلامالارىن پايدالانۋ APEC PetroTechnic كوللەدجىنىڭ باستى ەرەكشەلىگى ەكەنى باياندالدى.
تاجىريبەگە نەگىزدەلگەن وقىتۋ بارىسىندا شىنايى وندىرىستىك ۇدەرىستەر جاسالادى. سونىڭ ارقاسىندا تۇلەكتەر كوللەدج بىتىرگەن سوڭ, بىردەن وندىرىستەگى كۇردەلى ءمىندەتتەردى تابىستى اتقارا الادى.
ستۋدەنتتەرمەن جانە وقىتۋشىلار ۇجىمىمەن اڭگىمەلەسۋ بارىسىندا قاسىم-جومارت توقاەۆ ءىرى حالىقارالىق مۇناي-گاز كومپانيالارى ءۇشىن مامانداردى شەتەلدەردە ەمەس, قازاقستاندا دايارلاۋدىڭ ماڭىزدىلىعىن ايتتى. ونىڭ پىكىرىنشە, بۇل ءۇشىن كوللەدجدە بارلىق جاعداي جاسالعان.
پرەزيدەنت قاسىم-جومارت توقاەۆتىڭ وڭىرگە جۇمىس ساپارى بۇگىن جالعاسادى.
اتىراۋ وبلىسى
