رۋحانيات • 03 ماۋسىم، 2019

«جاس قانات» يەسىن تاپتى

799 رەت كورسەتىلدى

جۇرەگى مۋزىكا دەپ سوققان جاس ونەرپازدار ءۇشىن جىل سايىن اسىعا كۇتەتىن ۇلكەن ونەر وقيعاسى بار. ول – «جاس قانات»! مىنە، وسىمەن 28-ءشى مارتە شىمىلدىق ءتۇرىپ، جيىرما سەگىزىنشى جۇلدىزىن انىقتاۋعا كىرىسكەن بايقاۋ كوزدى اشىپ-جۇمعانشا مارەسىنە دە جەتىپ ۇلگەردى. ءۇش كۇن بويى جاس تالانتتاردىڭ ءۇمىت تولى جانارى مەن ءلۇپىل قاققان جۇرەگىنىڭ دۇرسىلىنە كۋا بولعان ەلوردالىق تىڭدارمان كەشە بەيبىتشىلىك جانە كەلىسىم سارايىندا وتكەن سالتاناتتى جيىندا «جاس قانات-2019» جاس ورىنداۋشىلاردىڭ ءXXVىىى رەسپۋبليكالىق بايقاۋىنىڭ كەزەكتى جەڭىمپازىنا قۋانا قوشەمەت كورسەتتى.

تاريحى ەل ەگەمەندىگىمەن ەگىز جاساسىپ كەلە جاتقان ايتۋلى بايقاۋ ءوزىنىڭ 28 جىلدىق جىلناماسىندا جاس انشىلەردىڭ تۇتاس تولقىنىن تاربيەلەپ شىعاردى. تالاي تالانتتىڭ باعىن اشىپ، ونەردەگى باعىتىن ايقىندادى. «جاس قاناتتان» تۇلەپ ۇشقان مەدەۋ ارىنباەۆ، ەرلان كوكەەۆ، نۇرلان ابدۋللين، باقىت شاداەۆا، جانار دۇعالوۆا، ءمادينا سادۋاقاسوۆا، مارجان اراپباەۆا، ديماش قۇدايبەرگەن باستاعان تالانتتار شوعىرى بۇگىندە وتاندىق ءان ونەرىنىڭ ماقتانىشى.

وسى ءبىر ادەمى ءۇردىستى ۇزبەي، جىل سايىن ونەرلى ورەندەر جۇرەگىنە ءۇمىت وتىن جاعىپ كەلە جاتقان جۇلدىزدى جوبانىڭ قاناتىن كەڭگە جايىپ، كاسىبي كەلبەت قالىپتاستىرۋىنا بايقاۋ پروديۋسەرى مۇرات ەرعاليەۆتىڭ سىڭىرگەن ەڭبەگى زور.

– «جاس قانات» ۋاقىتتىڭ سىنىنان سۇرىنبەي ءوتتى، وعان قاتىسۋدىڭ ءوزى – جەڭىس. بايقاۋ نەگىزىنەن وليمپيادا جۇيەسىمەن وتەدى جانە سونداي قاعيدانى ناسيحاتتايدى. بىزدە باستىسى جەڭىس ەمەس، قاتىسۋ. سەبەبى، «جاس قانات» ءوز قاتىسۋشىلارىنا ەلىمىزدىڭ ەڭ ءىرى ساحنالارىنىڭ بىرىندە ونەر كورسەتۋ مۇمكىندىگىن عانا سىيلاپ قويماي، ءاربىر ونەرپازعا وزىنە دەگەن ۇلكەن سەنىم دە بەرەدى. ساحنا سىرتىندا ول ءۇشىن ۋايىمداپ، قولداۋ كورسەتەتىن ناعىز جاناشىر دوستاردىڭ بارىن ءتۇسىنىپ، ءوزى ءۇشىن ماڭىزدى شىعارماشىلىق ورتا قالىپتاستىرا الادى. بايقاۋدىڭ باستى قۇندىلىعى دا وسىندا، بىزدىڭشە. ال بۇل جوبادان تىس ۋاقىتتا دا جاس ورىنداۋشىلارعا وزدەرىن كاسىبي تۇرعىدا ارى قاراي دامۋىنا تاپتىرماس تاجىريبە،  دەيدى پروديۋسەر.   

ەلىمىزدەگى ەرەكشە تانىمالدىققا يە ايتۋلى مۋزىكالىق جوبا بەيبىتشىلىك جانە كەلىسىم سارايىنىڭ ساحناسىندا مامىردىڭ 31-ءى مەن 2 ماۋسىم ارالىعىندا ءوتتى. بيىل «جاس قاناتقا» رەسپۋبليكانىڭ تۇكپىر-تۇكپىرىنەن  بارلىعى 14 ۇمىتكەر ىرىكتەلىپ الىندى. ولاردىڭ اراسىندا نۇر-سۇلتان، الماتى، شىمكەنت، قاراعاندى، كوكشەتاۋ، وسكەمەن، جامبىل جانە بالقاش قالالارىنىڭ نامىسىن قورعايتىن ونەرلى ورەندەر بار. اتاپ ايتساق، ديدار ابدىحالىق (شىمكەنت)، باۋبەك ايداربەكوۆ (جامبىل وبلىسى)، ءادىل بالتاباەۆ (كوكشەتاۋ)، ايجان داۋكەنوۆا (وسكەمەن)، ايبەك جەكسەن (الماتى)، ايىم يماشەۆا (سەمەي)، اقەركە كوپجاساروۆا (نۇر-سۇلتان)، وركەن ميروۆ (قاراعاندى)، الەكساندر نام (شىعىس قازاقستان وبلىسى)،  ولجاس وسپان (سەمەي)، داريعا ساتاروۆا (نۇر-سۇلتان)، سەرىكبول سەيىلحانوۆ (سەمەي)، جانبولات ۇزاقباي (نۇر-سۇلتان) جانە «حان» تريوسى بايقاۋدىڭ نەگىزگى جۇلدەسى – «التىن قاناتتىڭ» يەسى بولۋعا بارىن سالىپ باقتى. 3 سايىستىق كەزەڭ بويىنشا ونەر كورسەتكەن قاتىسۋشىلار كاسىبي مۋزىكا ماماندارىنىڭ باعاسىمەن قاتار شىعارماشىلىق ۇلكەن تاجىريبە مەكتەبىنەن دە قاتار ءوتتى.

«جاس قاناتتىڭ» جيىرما توعىزىنشى تولقىن جەڭىمپازىن انىقتاۋعا بەلگىلى مۋزىكا ماماندارى: پروفەسسور رايسا مۇساحودجاەۆا، «استانا وپەرا» تەاترىنىڭ باس حورمەيستەرى ەرجان ءداۋىتوۆ، كومپوزيتور سەرىك ەركىمبەكوۆ،  Kazakh-TV تەلەارناسىنىڭ حالىقارالىق اقپارات ءبولىمىنىڭ مەڭگەرۋشىسى ءلاززات شاتاەۆا  جانە «جاس قانات» جۇلدىزىن جاققان جوبانىڭ ءتول پەرزەنتتەرى –  مەدەۋ ارىنباەۆ، مارجان اراپباەۆا، قايرات باەكەنوۆ، ءمادينا سادۋاقاسوۆا باستاعان انشىلەر اتسالىسىپ، تورەلىك ەتتى.

بيىلعى بايقاۋدىڭ تەك  قاتىسۋشىلار ءۇشىن عانا ەمەس، قازىلار ءۇشىن دە اسا جاۋاپتى بولعانىن ماماندار جاسىرمادى. ويتكەنى ەسترادا اسپانىندا جاڭا جۇلدىزدىڭ جاعىلىپ، جاس ورىنداۋشىنىڭ ۇلكەن ساحناداعى العاشقى قادامىنا تورەلىك ايتۋ – تاريحي ءھام جاۋاپتى قادام. وزدەرىنە جۇكتەلگەن سالماعى ءزىل باتپان سەنىمدى ابىرويمەن الىپ شىعۋدى كوزدەگەن ساراپشىلار بارىنشا ادىلەتتى بولۋ ءۇشىن دە بارىن سالىپتى.

ءسويتىپ، «جاس قانات» كۋبوگىنىڭ يەسىن انىقتاۋعا ارنالعان گالا-كونتسەرتتە اقتىق مارگە جەتكەن 5 ۇمىتكەردىڭ اراسىنان ۇزدىك 3 جەڭىمپاز تاڭدالدى. «جۇزدەن جۇيرىك، مىڭنان تۇلپار» شىققان ونەرپازدار كاسىبي ورىنداۋ شەبەرلىگى مەن ۇپاي سانىنا بايلانىستى ءى، ءىى جانە ءىىى ورىندى ءوزارا ءبولىستى. بايقاۋ قورىتىندىسى بويىنشا، قازىلار القاسىنىڭ ءبىراۋىزدان قولداۋىمەن «جاس قاناتتىڭ» باس جۇلدەسى – «التىن قانات» كۋبوگىنا شىمكەنت قالاسىنان كەلگەن جاس دارىن ديدار ابدىحالىق لايىق دەپ تانىلدى. «كۇمىس قاناتتى» ەلوردالىق جانبولات ۇزاقباي ەنشىلەسە، كوكشەتاۋلىق ءادىل بالتاباەۆ «قولا قاناتتىڭ» يەگەرى اتاندى. ال از عانا ۇپاي سانىمەن دوستارىنا جول بەرگەن ولجاس وسپان (سەمەي) مەن اقەركە كوپجاساروۆا بايقاۋدىڭ ديپلومانتى اتانىپ، ارنايى ديپلوممەن ماراپاتتالدى. 

سونداي-اق، بيىلعى بايقاۋدىڭ بۇرىنعىلاردان تاعى ءبىر ەرەكشەلىگى – ماراپاتتاۋ راسىمىنە كونكۋرستان تىس تاعى بىرنەشە ارنايى اتالىم قوسىلىپتى. ول – «جاس قانات سۇلتانىن» انىقتاۋ. «ميسس قازاقستان» بايقاۋىنىڭ جەڭىمپاز ارۋلارىنىڭ تاڭداۋىمەن، بالقاش قالاسىنان كەلگەن «حان» تريوسى ءۇشىنشى ۆيتسە-ميستەر اتانسا، ولجاس وسپان مەن جانبولات ۇزاقباي ءبىرىنشى جانە ەكىنشى ۆيتسە-ميستەر اتاعىن تەڭدەي ءبولىستى. ال ارۋلاردىڭ نەگىزگى تاڭداۋى ءبىراۋىزدان ديدار ابدىحالىققا ءتۇسىپ،  جاس تالانت بايقاۋدىڭ باس جۇلدەسىمەن قوسا، «ميستەر «جاس قانات» اتاعان دا قاتار ەنشىلەدى. «جاس قاناتتىڭ» قاتىسۋشىلارعا ۇسىنعان توسىنسىيى مۇنىمەن تاۋسىلمادى. جوبانىڭ اقپاراتتىق سەرىكتەستەرى – «استانا» راديوسى جانبولات ۇزاقبايدىڭ اۆتورلىق انىنە ءبىر جىلعا روتاتسيا سىيلاسا، بايقاۋدىڭ ەڭ جاس قاتىسۋشىسى اقەركە كوپجاساروۆاعا ۇلتتىق ءداستۇردى ساقتاعانى ءۇشىن «حابار» اگەنتتىگى اتانىنان ارنايى جۇلدە بەرىلدى. ال نۇر–سۇلتان قالاسى اكىمى باقىت سۇلتانوۆتىڭ ارنايى جۇلدەسىنە جارتىلاي فيناليست ايىم يماشەۆا يە بولدى. مىنە، وسىلايشا ادەمى نوتادا مارەسىنە جەتكەن بايقاۋ جاس انشىلەردى ونەر الەمىنىڭ جاڭا ءبىر بەلەسىنە شاقىرىپ، ارماندارىنا قانات بايلاعانداي. جارىس ەمەس، دوستىق سالتانات قۇرعان جوبا قاتىسۋشىلارى قورىتىندى كەشتى كوتەرىڭكى كوڭىل كۇيدە «جاس قاناتتىڭ» انۇرانىمەن ءتامامدادى.  


سوڭعى جاڭالىقتار

دوللار ارزاندادى

ەكونوميكا • بۇگىن، 15:50

ۆاكتسينا سالدىرعاندار سانى ارتتى

كوروناۆيرۋس • بۇگىن، 09:17

1227 قازاقستاندىق ىندەتتەن ساۋىقتى

كوروناۆيرۋس • بۇگىن، 09:08

وتكەن تاۋلىكتە 1169 ادام ىندەت جۇقتىردى

كوروناۆيرۋس • بۇگىن، 09:01

ۇقساس جاڭالىقتار