ۇلتتى جاسارتۋ ايەلدەردىڭ قولىندا
سەنبى, 27 ءساۋىر 2013 1:59
قازىرگى ۋاقىتتا زەينەتكە شىعۋ جاسىن ۇلعايتۋ ماسەلەسى قوعامدا قىزۋ تالقىلانىپ جاتىر. ونىڭ ىشىندە, الەۋمەتتىك-ەكونوميكالىق احۋالدى قالىپتاستىرۋ مەن دامىتۋعا زور ۇلەس قوسىپ كەلە جاتقان, سونداي-اق وتباسىندا دا كۇيبەڭ تىرشىلىكپەن تىنىم تاپپايتىن نازىك جاندىلاردىڭ زەينەتكە شىعۋىن 63 جاسقا دەيىن كوتەرۋ كۇن تارتىبىنەن تۇسپەي تۇر. بۇعان ءبىزدىڭ قوعام قانشالىقتى دايىن؟
سەنبى, 27 ءساۋىر 2013 1:59
قازىرگى ۋاقىتتا زەينەتكە شىعۋ جاسىن ۇلعايتۋ ماسەلەسى قوعامدا قىزۋ تالقىلانىپ جاتىر. ونىڭ ىشىندە, الەۋمەتتىك-ەكونوميكالىق احۋالدى قالىپتاستىرۋ مەن دامىتۋعا زور ۇلەس قوسىپ كەلە جاتقان, سونداي-اق وتباسىندا دا كۇيبەڭ تىرشىلىكپەن تىنىم تاپپايتىن نازىك جاندىلاردىڭ زەينەتكە شىعۋىن 63 جاسقا دەيىن كوتەرۋ كۇن تارتىبىنەن تۇسپەي تۇر. بۇعان ءبىزدىڭ قوعام قانشالىقتى دايىن؟
ءبىر نارسەنىڭ باسى اشىق. زەينەتكە شىعۋ جاسىن ۇلعايتۋ ۇلتتىڭ قارتايۋىنا جول بەرمەي, قوعامداعى بەلسەندىلىكتى ارتتىراتىنى ءسوزسىز. سونىمەن قاتار, ايەلدەردىڭ زەينەتاقىسىن ەسەپتەۋدە دە ولارعا قوماقتى قارجى تاعايىنداۋعا مۇمكىنشىلىك بەرەدى. ويتكەنى, ەركەكتەرگە قاراعاندا جالاقىسى تومەندەۋ ءارى دەكرەتتىك دەمالىس سەكىلدى ءتۇرلى جاعدايلاردان از جۇمىسقا شىعاتىن ايەلدەردىڭ ەرتەڭگى كۇنى وزدەرىنە تيەسىلى زەينەتاقىنى تاعايىنداۋدا كوپ قارجىدان قاعىلىپ جاتقانىن وتىرىككە شىعارا المايمىز. وعان ەركەكتەرمەن سالىستىرعاندا ايەلدەردىڭ ءومىر ءسۇرۋ جاسىنىڭ ۇزاقتىعىن دا قوسىڭىز.
قازىرگى تاڭدا اتالعان ءماسەلەمەن الەم دە بەتپە-بەت كەلىپ وتىر. ونى الەمدىك داعدارىسپەن سالىستىراتىندار بار. الايدا, بۇل ۇيدە ماسىل بولۋدى قالامايتىن ەڭبەكقور قارتاڭ ازاماتتارى بار, كەز كەلگەن جاستاعى قوعام مۇشەلەرى جۇمىس ىستەپ ناپاقا تابۋدى ءجون سانايتىن نارىقتىق ەكونوميكادا قيسىنسىز دەۋگە بولادى.
الەمدىك تاجىريبەگە ءسۇيەنسەك, زەينەتكەرلىك جاستى ۇلعايتۋدى دامىعان ەلدەر دە قۇپ كورەدى. ماسەلەن, 2010 جىلدان بەرى ايەلدەردىڭ زەينەتكە شىعۋ جاسى گەرمانيادا – 67, يتاليادا – 65. دانيا مەن نورۆەگيادا ايەلدەر زەينەتكە 67 جاسىندا, شۆەيتساريادا 64 جاسىندا شىعادى. ال حالقى ەڭ كوپ جاسايدى دەيتىن جاپونيادا ايەلدەر مەن ەرلەر ءوز ەڭبەكتەرىنىڭ زەينەتىن 70 جاسىندا, اۆستريا, يسپانيا, كانادا, اقش, شۆەتسيادا 65-كە جەتكەندە كورە الادى.سونىمەن قاتار, حالىقتىڭ قارتايۋ ۇدەرىسىن ەسكەرە كەلە, ۇلىبريتانيا, فرانتسيا, وڭتۇستىك كورەيا, چەحيا, ازەربايجان, ۋكراينا, ەستونيا زەينەتكە شىعۋ جاسىن ۇلعايتۋدى جوسپارلاپ وتىر.
وسى ورايدا, زەينەتكە شىعۋ جاسىن ۇزارتۋدىڭ استارىنان باسقا نارسەنى ىزدەگەن ءجون سياقتى. مەنىڭشە, وعان قاراعاندا, وسى جاڭعىرتۋلار نەگىزىندە قولعا الىناتىن ماسەلەلەردى جان-جاقتى قاراستىرىپ, سۇبەلى دە سوقتالى باعدارلامالاردى قابىلداۋدى قولعا العان دۇرىس دەپ ويلايمىن. ايتالىق, زەينەتكەرلىك جاسقا شىعۋدى ۇزارتۋعا بايلانىستى جۇمىس بەرۋشىلەرگە جاسى ۇلعايعانداردى جۇمىستان قىسقارتۋعا شەكتەۋ قويۋ سەكىلدى مىندەتتى تالاپتاردى كۇشەيتۋ كەرەك. جۇمىسسىزدىقپەن كۇرەستى كۇشەيتىپ, جاڭا جۇمىس ورىندارىن اشۋ, ونى كوبىنە اۋىلدى جەرلەردە جولعا قويۋ قاجەت. ەڭبەك دەمالىسىن زاڭمەن رەتتەۋ جانە وعان قاتىستى ساناتوريگە بارىپ ەم الۋ دەمالىستارىن قارجىلاندىرۋدى ەنگىزگەن دۇرىس. اسىرەسە, ەڭ ەستەن شىعارماۋدى قاجەت ەتەتىن شارا – انالاردىڭ ومىرگە ۇرپاق اكەلۋىنە بارىنشا جاعداي جاساۋ.ەكولوگيالىق ماسەلەلەردى ءبىرىنشى كەزەككە قويىپ, مەديتسينالىق قىزمەتتى كوتەرۋ, وندىرىستىك جاۋاپكەرشىلىكتى ارتتىرۋ. وسى سەكىلدى وتە كۇردەلى ماسەلەلەردى نازاردان تىس قالدىرمايتىن بولساق, جولىندا جۇك قالدىرمايتىن نازىك جاندىلار قانداي جۇمىسقا بولسا دا دايار.
اقيقاتىن ايتۋ كەرەك, ۇيدە ۇزاق وتىرىپ قالعان ايەل ادامدار تەز قارتايادى. سونداي-اق, زەينەتكە شىقسا دا ۇيرەنشىكتى كاسىبىن قيا الماي, تالاي جىلدار بويى جۇمىستا جۇرگەن اپا-اپكەلەرىمىزدى قاي سالادان دا كەزدەستىرەسىز. بۇل ورتاشا ءومىر ءسۇرۋ دەڭگەيىنىڭ ۇزارعاندىعىنىڭ كورسەتكىشى عانا ەمەس, تاجىريبەلى ماماندارعا دەگەن سۇرانىستى بىلدىرەدى.
جاسىندا بەينەت شەكسە دە, قارتايعاندا زەينەت كورۋدىڭ قامىن ەرتەدەن ويلاعان ءبىزدىڭ حالقىمىز ەرتە تۇرىپ, كەش جاتۋدى ۇرپاعىنا ۇلگى تۇتۋى تەگىن ەمەس. ەلدىڭ ىرىسى ارتىپ, داستارقاننان ءدامنىڭ ۇزىلمەۋى دە سول ەتكەن ەڭبەكتىڭ جەمىسى. سوندىقتان, بۇل مەنىڭ پىكىرىمە كوپتەگەن ارىپتەستەرىم كەلىسەدى دەپ ويلايمىن. ويتكەنى, كەشەگى نارىقتىق زامان كەلگەندە وتباسى ءۇشىن بارلىق كەلەڭسىزدىكتەرگە دايىن ەكەندىگىن دالەلدەپ, اۋىر قاپ ارقالاپ انالاردىڭ كوشەگە شىعىپ كەتكەنىن دە ەشكىم ۇمىتا قويماس.
دينار نوكەتاەۆا,
قازاق مەملەكەتتىك قىزدار پەداگوگيكالىق
ۋنيۆەرسيتەتىنىڭ رەكتورى.
