ايماقتار • 01 ماۋسىم، 2019

تۇركىستان: مامىر ايىندا ەكى ۇشەم ومىرگە كەلدى

954 رەت كورسەتىلدى

وبلىس ورتالىعى تۇركىستاندا مامىر ايىندا ەكى ۇشەمنىڭ ومىرگە كەلۋى العاش رەت تىركەلىپ وتىر.

ۇشەمدەردىڭ اتا-انالارى مە دارىگەرلەر «كوز» بەن «سوزدەن» ساقتانعان دا بولار 1-ءشى مامىردا دۇنيەگە كەلگەن ۇشەم تۋرالى اقپاراتتى جاريا ەتپەپتى. وبلىستىق №3 پەريناتالدىق ورتالىقتا مەرزىمىنەن ەرتە بوسانعان 27 جاستاعى دينارا نارحانوۆا ءۇش ۇلدى ومىرگە اكەلدى. نارەستەلەردىڭ سالماعى 1 820 گر، 1800 گر، 1730 گر بولعان. العاشقى كەزدە سابيلەردىڭ جاعدايى اۋىر بولعان سوڭ دارىگەرلەر جاساندى تىنىستانۋ اپپاراتىنا قوسىپ، ءبىر اي كولەمىندە دەنساۋلىقتارىنا ەرەكشە كۇتىم جاساعان. قازىر جاعدايلارى جاقسارىپ، سالماقتارى ەكى كەلىدەن اسقان. جاساندى ۇرىقتاندىرۋ جولىمەن جۇكتى بولعان كەلىنشەك بالالارىنىڭ ەسىمىن يكرام، يسلام جانە يمران قويىپتى. بۇعان دەيىن ءبىر قىزى بار وتباسىنىڭ پەرزەنتتەرى وسىلايشا تورتەۋگە جەتىپ وتىر. 

ال، ەكىنشى ۇشەمنىڭ اناسى سايەرا تۋكليەۆا 29 جاستا. بىرلىك اۋىلىندا تۇراتىن كەلىنشەك 27 مامىر كۇنى بوسانعان. كەسار تىلىگى ارقىلى ەكى قىز بەن ءبىر ۇلدى ومىرگە اكەلگەن جاس انانىڭ ۇيىندە تاعى ءۇش پەرزەنتى بار. نارەستەلەرى دە ايى - كۇنىنە تولىپ، ءوز ۇيلەرىنە جىبەرىلدى. «ۇشەمدەرگە جۇكتى ەكەنىمدى بەسىنشى اپتادا ءبىلدىم. ءۇي-ىشىمىزبەن قۋاندىق. باستاپقى جۇكتىلىك كەزىندە ءبىراز قينالعان كەزدەرىم بولدى. بىراق ەرەكشە كۇتىم جاساپ، دارىگەرلەردىڭ ايتقانىن ورىندادىم. پەرزەنتتەرىمدى امان-ەسەن بوسانىپ الدىم. دارىگەرلەرگە العىس ايتقىم كەلەدى، بىزگە جاقسى ەم-دوم جاساپ، جاقسى قارادى. ەسىمدەرىن فاتيما، يسمايل، زۋحرا دەپ قويدىق. وسىلايشا ومىرگە ءۇش پەرزەنت اكەلىپ، باتىر انا اتاندىم. اللا تاعالاما وسىنداي پەرزەنتتەر بەرگەنى ءۇشىن ريزامىن»،- دەيدى سايەرا تۋكليەۆا.

ۇيلەرىنە شىعارىلاردا قوس انا مەن نارەستەلەرگە وبلىستىق اكىمدىكتىڭ اتىنان سىي-سىياپاتتار جاسالدى. ءار نارەستەگە ارابا مەن كەرۋەتتەر، كيىم-كەشەكتەر، ويىنشىقتار تابىس ەتىلدى. وبلىستىق دەنساۋلىق ساقتاۋ باسقارماسىنىڭ باسشىسى مۇقان ەگىزباەۆتىڭ ايتۋىنشا، سابيلەر الداعى ۋاقىتتا دا ەرەكشە كۇتىمگە الىنادى. «قازىرگى تاڭدا نارەستەلەردىڭ جاعدايى جاقسى. مەديتسينالىق كۇتىم جاساپ، ۇيلەرىنە جاقسى جاعدايدا شىعارىپ جاتىرمىز. بۇدان بىلاي ءار وتباسىنا مەدبيكە بولىنەتىن بولادى. وسى ۇشەمدەردىڭ جاعدايىن قاراپ، باقىلاۋدا ۇستاپ وتىراتىن بولامىز»،- دەدى مۇقان ەگىزباەۆ.

جىل باسىنان بەرى وڭىردە ءۇش ۇشەم دۇنيەگە كەلگەن. ەكى انا تۇركىستان قالاسىندا، تاعى ءبىر انا شىمكەنت قالاسىنداعى وبلىستىق پەريناتالدىق ورتالىقتا بوسانعان.

سوڭعى جاڭالىقتار

11 تامىزعا ارنالعان ۆاليۋتا باعامى

ەكونوميكا • بۇگىن، 09:40

ۇقساس جاڭالىقتار