سونىمەن بىرگە, وقۋشىلاردىڭ ءتۇرلى ۇيىرمەلەرگە, مادەني ءىس-شارالارعا, سپورت سەكتسيالارىنا قاتىسۋلارىنا جاعداي جاسالادى. بالالاردى جۇزۋگە ۇيرەتۋگە جانە باسسەيندەردى كوبەيتۋگە سەپتىگىن تيگىزەتىن «قاۋىپسىز سۋ» جازعى اكتسياسى وتكىزىلمەك. بۇل مالىمەتتەر وبلىس اكىمدىگى جانىنداعى كامەلەتكە تولماعانداردىڭ ءىسى جانە ولاردىڭ قۇقىقتارىن قورعاۋ جونىندەگى كوميسسيا ماجىلىسىندە كەلتىرىلدى. جيىندا وبلىس اكىمىنىڭ ورىنباسارى مالىك وتارباەۆ بالا تاربيەسى, ءبىلىم بەرۋ سالاسىندا كەمشىلىك جىبەرگەن بىرقاتار جاۋاپتى باسشىلارعا جۇمىستى شيراتۋدى تاپسىردى. «قازىرگى تاڭدا قوعامنىڭ الدىندا تۇرعان باستى مىندەتتەردىڭ ءبىرى – بالالار مەن جاسوسپىرىمدەر اراسىنداعى قۇقىق بۇزۋشىلىقتىڭ الدىن-الۋ. بۇل سالا وبلىس اكىمى ومىرزاق ەستاي ۇلىنىڭ تىكەلەي قاداعالاۋىندا تۇر. سوندىقتان كامەلەتكە تولماعاندار جونىندەگى كەشەندى ءىس-شارالار جوسپارى قايتا قارالىپ, بەكىتىلسىن. مەكتەپ وقۋشىلارىنىڭ جازعى دەمالىسىن ءتيىمدى وتكىزۋ باعىتىندا جۇمىستار جۇرگىزىلسىن», - دەدى م.وتارباەۆ.
وبلىستا باق جانە ينتەرنەت-كەڭىستىكتە زورلىق-زومبىلىق پەن قاتىگەزدىككە قارسى اقپاراتتىق ناۋقان وتكىزىلىپ, قالا, اۋداندارداعى بالالاردى تاسىمالدايتىن كولىكتەردىڭ قاۋىپسىز-تەحنيكالىق ەرەكشەلىكتەرىنە تالداۋ جۇرگىزىلەتىن بولادى. سونىمەن قاتار, ساۋىقتىرۋ لاگەرلەرىنىڭ, اۋلا كلۋبتارىنىڭ, وزگە دە مەكتەپتەن تىس مەكەمەلەردىڭ جەلىسىن ارتتىرۋ, ۇيىرمەلەرگە قاتىسۋشىلاردىڭ سانىن كوبەيتۋ باعىتىندا جۇمىس كۇشەيمەك. ويىن الاڭدارى مەن اتتراكتسيوندارىنا مونيتورينگ جاسالادى.
