مومبەكوۆ مۇراسى
بەيسەنبى, 6 ماۋسىم 2013 2:10
داۋلەسكەر كۇيشىنىڭ شاكىرتى رىمحان ءابىلحان ۇلىنىڭ ىجداعاتتىلىعىمەن جەكە ديسك بولىپ تىڭداۋشىلارعا جول تارتتى
بەيسەنبى, 6 ماۋسىم 2013 2:10
داۋلەسكەر كۇيشىنىڭ شاكىرتى رىمحان ءابىلحان ۇلىنىڭ ىجداعاتتىلىعىمەن جەكە ديسك بولىپ تىڭداۋشىلارعا جول تارتتى
شەرتپە كۇيدىڭ شەبەرى تولەگەن مومبەكوۆ ەسىمى ونەردى قاستەرلەيتىن جۇرتشىلىققا كەڭىنەن ءمالىم. بيىل وسى تالانت يەسىنىڭ تۋعانىنا 95 جىل تولۋىنا وراي جەر-جەردە ءتۇرلى شىعارماشىلىق ءىس-شارالار ءوتىپ جاتىر. سونىڭ ءبىرى استاناداعى قازاق ۇلتتىق ونەر ۋنيۆەرسيتەتىنىڭ «شابىت» عيماراتىنداعى وسى جوعارى وقۋ ورنىنىڭ اعا وقىتۋشىسى رىمحان ءابىلحان ۇلىنىڭ «سالتانات» كۇي كەشى دەر ەدىك. وعان اتاقتى جازۋشى ءابىش كەكىلباي ۇلى, اقىن اپامىز فاريزا وڭعارسىنوۆا, پارلامەنت ءماجىلىسىنىڭ دەپۋتاتتارى گۇلنار سەيىتماعامبەتوۆا مەن ورازكۇل اسانعازى جانە باسقا دا ونەر سۇيەر جۇرتشىلىق وكىلدەرى قاتىسىپ, كۇمبىرلەگەن كۇي ۇنىنە قۇلاق توستى.
ءومىر بويى سوزاق وڭىرىندە تۇرىپ, سول جەردە قايتقان تولەگەن مومبەكوۆ مۇرالارى ىزدەۋسىز, سۇراۋسىز ەمەس. ۇلتتىق ونەر ۋنيۆەرسيتەتىنىڭ پروفەسسورى جانعالي ءجۇزباي ونىڭ تۋىندىلارىن نوتاعا ءتۇسىرىپ, بىرنەشە وقۋلىققا ەنگىزسە, قازاق ۇلتتىق كونسەرۆاتورياسىنىڭ پروفەسسورى ءبىلال ىسقاقوۆ كۇيشى مۇراسىن ارنايى زەرتتەپ, شىعارمالارىن كىتاپ ەتىپ باستىرعان ەكەن. بىراق حالقىمىزدىڭ اسىل قازىناسىنا اينالعان توكەڭنىڭ كۇيلەرى وسى كەزگە دەيىن باستان-اياق جيناقتالىپ, جەكە ديسكىدە جارىق كورمەگەن. ەندى بۇل ولقىلىقتىڭ دا ورنى تولعانداي. كۇيشىنىڭ 95 جىلدىعىنا وراي قازاق ۇلتتىق ونەر ۋنيۆەرسيتەتىنىڭ اعا وقىتۋشىسى رىمحان ءابىلحان ۇلى تولەگەن مومبەكوۆتىڭ 29 كۇيىن ورىنداپ, جەكە ديسكىسىن شىعاردى. وسىلايشا, تىڭداۋشىلارعا ارنايى تارتۋ جاساۋى رەكەڭنىڭ ونەر جالعاستىعى عانا ەمەس, ۇستازىنا دەگەن زور قۇرمەتى دەپ بىلگەنىمىز ءجون.
رىمحان ءابىلحان ۇلى شەرتپە كۇيدىڭ سىرىن سەزىنىپ, تۇبىنە بويلاۋعا تالپىنىپ جۇرگەن جاس كەزىندە سوزاقتاعى توكەڭ اۋىلىنا ارنايى بارىپ, كۇيلەرىن ۇيرەنىپ, ءومىر تاريحىنان حاباردار بولىپ, كۇيشى مۇراسىنا مىقتاپ دەن قويعان ەكەن. تولەگەن مومبەكوۆتىڭ ءوزى دە شاكىرتىنىڭ شەبەرلىگىنە, ونەرگە دەگەن رياسىز ىنتىقتىعىنا ريزا بولعانى شىعار, 1992 جىلى شىلدەدە وڭتۇستىك قازاقستان وبلىسىنىڭ شولاققورعان اۋداندىق مادەنيەت ۇيىندە «وتىرار سازى» وركەسترى مۇشەلەرىمەن كەزدەسكەن ساتىندە: «قۇدايعا شۇكىر, كۇيلەرىمدى دۇرىس تارتىپ جۇرگەن جاستار بار. ولاردىڭ ىشىندە رىمحان بالاما ريزامىن», دەگەن ءسوزى دە وسى كەشتە ەسكە الىندى.
«بۇگىنگى تارتىلعان كۇيلەر زالداعى تاربيەلى ادامداردىڭ ءوزىن تاربيەلەدى», دەپ كەش سوڭىندا مەملەكەتتىك سىيلىقتىڭ لاۋرەاتى, بەلگىلى ونەر زەرتتەۋشىسى اشىربەك سىعاي ايتقان ءسوز وسى كەشكە بەرىلگەن ءادىل باعا بولدى.
جادىرا شامۇراتوۆا.
استانا.
