باق بەرەردە ەلگە ىرىس قونادى
سەنبى, 20 ءساۋىر 2013 0:41
«بىرلىك بار جەردە – تىرلىك بار» دەيدى دانا حالقىمىز. بۇل تەگىننەن-تەگىن ايتىلا سالماسا كەرەك. اۋىزبىرلىك پەن تۇسىنىستىك, قاراپايىم سىيلاستىق ۇستەمدىك قۇرعان جەرلەرگە قاشاندا ناتيجەلى ىستەردىڭ ءۇيىر بولاتىنى بەلگىلى. قازاقستاندا قالىپتاسقان ۇلتتار تۇتاستىعى مەن حالىقتار دوستىعىنىڭ ارقاسىندا بۇگىندە مەملەكەتىمىز وركەندەپ, ىلگەرى باسىپ كەلەدى. كوپۇلتتى حالقىمىزدىڭ ىنتىماقتاستىعى, بەيبىتشىلىگى مەملەكەتىمىزدىڭ باستى جەتىستىگى, بايلىعى. ونى كوزدىڭ قاراشىعىنداي ساقتاۋعا تىرىسۋىمىز كەرەك. ال جاڭا قازاقستاندىق پاتريوتيزم بارلىق قوعامدى, بارلىق ەتنوستى ءبىرىكتىرۋى ءتيىس. بۇل دەگەنىمىز, مەنىڭشە, ءاربىر قازاقستان ازاماتىنىڭ وزىنەن باستاپ, كوپۇلتتى قوعامىمىزعا بارىنشا ادال قىزمەت ەتىپ, ءوز ۇلەستەرىن قوسۋى ادامي بورىشى دەپ بىلەمىن.
سەنبى, 20 ءساۋىر 2013 0:41
«بىرلىك بار جەردە – تىرلىك بار» دەيدى دانا حالقىمىز. بۇل تەگىننەن-تەگىن ايتىلا سالماسا كەرەك. اۋىزبىرلىك پەن تۇسىنىستىك, قاراپايىم سىيلاستىق ۇستەمدىك قۇرعان جەرلەرگە قاشاندا ناتيجەلى ىستەردىڭ ءۇيىر بولاتىنى بەلگىلى. قازاقستاندا قالىپتاسقان ۇلتتار تۇتاستىعى مەن حالىقتار دوستىعىنىڭ ارقاسىندا بۇگىندە مەملەكەتىمىز وركەندەپ, ىلگەرى باسىپ كەلەدى. كوپۇلتتى حالقىمىزدىڭ ىنتىماقتاستىعى, بەيبىتشىلىگى مەملەكەتىمىزدىڭ باستى جەتىستىگى, بايلىعى. ونى كوزدىڭ قاراشىعىنداي ساقتاۋعا تىرىسۋىمىز كەرەك. ال جاڭا قازاقستاندىق پاتريوتيزم بارلىق قوعامدى, بارلىق ەتنوستى ءبىرىكتىرۋى ءتيىس. بۇل دەگەنىمىز, مەنىڭشە, ءاربىر قازاقستان ازاماتىنىڭ وزىنەن باستاپ, كوپۇلتتى قوعامىمىزعا بارىنشا ادال قىزمەت ەتىپ, ءوز ۇلەستەرىن قوسۋى ادامي بورىشى دەپ بىلەمىن.
ەل ىشىندەگى ۇلتارالىق تاتۋلىقتى نىعايتۋدا ماڭىزدى كونستيتۋتسيالىق ورگان بولىپ سانالاتىن, الەم كەڭىستىگىندە تەڭدەسى جوق قازاقستان حالقى اسسامبلەياسىنىڭ ەلباسى باستاماسىمەن قۇرىلۋى – كورەگەندىك پەن بولاشاقتى بولجاۋدىڭ ناتيجەسى. بۇل اسسامبلەيانىڭ ورنى ايرىقشا. ول – بەيبىتشىلىك پەن كەلىسىمدى ءتيىمدى ناسيحاتتاۋشى قوعامدىق ينستيتۋتقا, ەتنوسارالىق جانە كونفەسسياارالىق تولەرانتتىلىقتىڭ قازاقستاندىق ۇلگىسىنىڭ نەگىزىنە اينالدى.
قازاقستان وتكەن عاسىردىڭ 40-جىلدارىنداعى سولاقاي ساياساتقا بايلانىستى قونىس اۋدارعان ءارتۇرلى ۇلت وكىلدەرىنە پانا بولدى, ودان سوڭ تىڭ يگەرۋ باستالدى. قازاقستانعا كسرو-نىڭ بارلىق رەسپۋبليكالارىنان 600 مىڭنان استام ادام كەلدى. ولاردىڭ 350 مىڭى جاستار ەدى. سولاردىڭ كوپشىلىگى تۇراقتاپ قالىپ, وسىندا ءوز وتانىن تاپتى. ءبىر ولكەدە تاماشا ءومىر ءسۇرىپ, تاتۋ بولۋعا, جاقسى جۇمىس ىستەۋگە, وتباسىن قۇرۋ سياقتى ادامزات قۇندىلىقتارىن مەڭگەرۋگە ءبىزدىڭ حالقىمىزدىڭ دانالىعى جەتەدى. بۇل ورايدا, قازاقستان حالقى اسسامبلەياسى, ونىڭ ءىشىندە وبلىستىق ەتنومادەني ءبىرلەستىكتەر ىقپالدى قوعامدىق كۇشكە اينالعان.
قازاقستاندا بارلىق ەتنوستىڭ مادەني مۇراسىن, سالت-ءداستۇرى مەن ادەت-عۇرپىن, ءتىلىن تولىققاندى جاڭعىرتۋ مەن دامىتۋدىڭ تۇراقتى مەحانيزمى جۇزەگە اسىرىلىپ كەلەدى. ءوڭىرىمىزدى 108 ەتنوستىڭ وكىلدەرى مەكەندەيدى. وبلىس اۋماعىندا 20 ەتنومادەني ءبىرلەستىك جانە قالالار مەن اۋدانداردا ولاردىڭ 51 فيليالى جۇمىس جاسايدى. وسى ەتنومادەني بىرلەستىكتەردىڭ جۇمىسىنا قولداۋ كورسەتۋ ماقساتىندا وبلىستىق بيۋدجەتتەن قارجى بولىنەدى. سونىمەن قاتار, جىل سايىن بارلىق ەتنومادەني بىرلەستىكتەرگە وبلىس اكىمىنىڭ گرانتى بەرىلەدى, وبلىس اكىمىنىڭ «باۋىرمال» سىيلىعى دا بەلگىلەنگەن. مادەني بىرلەستىكتەر ءوزارا تىعىز قارىم-قاتىناس ورناتا وتىرىپ, ءار جىلى وبلىس جۇرتشىلىعىنىڭ قاتىسۋىمەن ۇلتتىق مادەنيەت كۇندەرىن وتكىزىپ كەلەدى.
قازاقستانداعى ەتنومادەني بىرلەستىكتەردىڭ دوستىق قارىم-قاتىناستاردى ورىستەتىپ, حالقىمىزدىڭ تاريحىن, سالت-ءداستۇرلەرىن ناسيحاتتايتىن ءىس-شارالاردى كوپتەپ ۇيىمداستىرۋلارى قاجەتتىگىن ەلباسى نازارباەۆ قازاقستان حالقى اسسامبلەياسىنىڭ ءحVىى سەسسياسىندا اتاپ ايتقان بولاتىن. وسى نەگىزدە «بەيبىتشىلىك پەن كەلىسىمنىڭ جول كارتاسى» شەرۋى ەلىمىزدىڭ سولتۇستىگى مەن باتىسىنداعى بىرقاتار ءوڭىرلەردە جالعاسىن تاپتى.
ۇلت بىرلىگى ۇيىسقان وڭتۇستىك قازاقستان حالقى مەملەكەتىمىزدە ءجۇرىپ جاتقان بارلىق باستامالاردى, تاپسىرمالاردى اتقارۋدا رەسپۋبليكادا بىرەگەي بولىپ كوش باستاپ كەلەدى دەسەم, ارتىق ايتقانىم ەمەس. وعان نەگىز بولاتىنداي وبلىسىمىزدا كوپ ۇلتتان قۇرالعان, ىنتىماعى جاراسقان ادام رەسۋرسى, كۇشى جەتەرلىك. ونى ۇيىمداستىراتىن جەرگىلىكتى جەردىڭ باسشىلارى, زيالى قاۋىم اۋىلدان باستاپ اۋدان, وبلىسقا دەيىن بارلىعى «ءبىر جاعادان باس, ءبىر جەڭنەن قول شىعارا» قىزمەت ەتۋدە.
ەلباسىمىز ن.نازارباەۆتىڭ بۇل وڭىرگە ءجيى كەلىپ, حالىقتىڭ تۇرمىس-تىرشىلىگىمەن تانىسىپ, قازىنادان قوسىمشا قارجى ءبولىپ, ەرەكشە قامقورلىققا الىپ جۇرگەنى دە سوندىقتان دەپ ويلايمىن.
نەگىزى, تاۋەلسىز قازاقستاننىڭ ەڭ قاستەرلى قۇندىلىعى – ءوزىنىڭ بوستاندىعى مەن حالقىمىزدىڭ سانعاسىرلىق قاھارماندىق تاريحىنىڭ اجىراماس اسىل بولىگى. ويتكەنى, اق پاتشا وتارشىلدىعى كەزىندە تاۋەلسىزدىكتى اڭساعان, جۇزدەگەن كوتەرىلىستەر مەن ەرەۋىلدەر جاساپ قىناداي قىرىلعان حالىق باتىرلارى مەن قولدان اشارشىلىق جاساپ, «حالىق جاۋلارىن» جويۋدى ۇيىمداستىرعان قىزىلدار قىرعىنىنا ۇشىراعان ۇلتىمىزدىڭ زيالىلارى, الاش ازاماتتارى, ۇلى وتان سوعىسى كەزىندە ەرلىكتىڭ ەرەسەن ۇلگىسىن كورسەتكەن اتالارىمىز بەن اپالارىمىز, حح عاسىردىڭ سوڭىندا ۇلت مۇددەسى ءۇشىن باس كوتەرگەن 86-نىڭ قاسىرەتتى كەزەڭىن باستان كەشكەن ورىمدەي جاس پاتريوتتار ازاتتىق جولىندا قۇربان بولدى. تاۋەلسىزدىك جولىنداعى مۇنداي ۇمتىلىستاردىڭ ءبارى ەل تاريحىنىڭ ەڭ قاستەرلى پاراقتارى رەتىندە ارقاشان جادىمىزدا ساقتالاتىن بولادى. ەل باسىنا كۇن تۋعان قيلى زامانداردا دا حالقىمىزدى ۇلت رەتىندە ساقتاپ قالعان ىنتىماعى مەن بىرلىگى. جاۋگەرشىلىك زاماندا باسى اۋعان جاققا كوشىپ ءجۇرىپ تە بەرەكەسى مەن قازانىن ورتايتپاعان قاسيەتتى, قاناعاتشىل تال بەسىك پەن جەر بەسىك اراسىنداعى بىرەۋگە ۇزاق, بىرەۋگە شولاق ءومىر جولدارىندا ەشكىمدى وزەككە تەپپەي, وزگەنىڭ قىزىلىنا قىزىقپاي, ۇتىمدى ىسپەن, ورامدى ويمەن, تەرەڭ كەمەڭگەرلىكپەن, ەشقاشاندا تارىلماعان كەڭدىگىمەن ەلىمىز تامىرىن جازا, بۇتاعىن جايقالتىپ, قۇشاعىن كەڭەيتىپ كەلەدى.
وسىنشاما قيىندىقپەن كەلگەن تاۋەلسىزدىك رۋحىمىزدى اسقاقتاتىپ بولاشاققا دەگەن سەنىمىمىزدى كۇشەيتتى. بابالار ءجۇرىپ وتكەن جولدىڭ تاريحي تاعىلىمى بىزگە بەرەكە باستاۋى – بىرلىكتە, ىرىستىڭ الدى – ىنتىماقتا ەكەنىن ايقىن كورسەتتى. «ادامزاتتىڭ ءبارىن ءسۇي, باۋىرىم دەپ» دانىشپان اباي اتامىز ايتقانداي, تاعدىر جازمىشىمەن ءبىزدىڭ جەرىمىزدە توعىسقان الۋان ۇلت پەن ۇلىستىڭ, ءوزىمىزدىڭ دە بەرەكە-ءبىرلىك, دوستىعىمىزدى ءوسىپ-وركەندەۋىمىزدىڭ التىن قازىعى رەتىندە ۇستانىپ, بولاشاققا قاراي ادىمداي بەرۋگە ءتيىسپىز.
بۇل ورايدا, ىنتىماق-ءبىرلىككە شاقىرار اقساقالدىقتىڭ ابىروي-بەدەلىن ارتتىرۋ – ۋاقىت تالابى. ويتكەنى, ەلىمىز ەجەلدەن ەل اعالارىنا, ارداقتى ابىزدارىنا, قاعيداسى قازىنالى قاريالارىنا قاراپ, ويىن دا, بويىن دا تۇزەگەن. تالانتتى تۇلعالارىنا ءتاۋ ەتىپ, تۇتقالى تاجىريبەلەرىنەن ۇلگى العان, ەڭسەلەرىن تىكتەپ, ەڭبەككە دە, ەرلىككە دە اقىلمانداردىڭ اق باتاسى ارقىلى بەل بايلاعان. بۇگىنگى ەگەمەن ەلىمىزدىڭ مامىراجاي جاعدايىندا اعا ۇرپاقتىڭ قادىرى ارتا تۇسپەسە كەمىگەن جوق. ءاربىر يگىلىكتى ءىس, تولاعاي تىرلىك, ءباتۋالى ءبىرلىك الاش اسىلدارىنىڭ, اق نيەتتى اقساقالدارىنىڭ قولداپ-قۋاتتاۋىمەن, اق جول تىلەپ القالاۋىمەن جۇزەگە اسىپ جاتادى.
حالقىمىزدىڭ وسىنداي قاسيەتتەرىن ءپىر تۇتقان وڭتۇستىك قازاقستان وبلىسىنىڭ اكىمى رەسپۋبليكادا العاش رەت «ىرىس الدى – ىنتىماق» تاقىرىبىمەن ەل اقساقالدارى مەن ازاماتتارىنىڭ باسىن قوسىپ كەلەلى كەڭەس وتكىزۋدى قولعا العان بولاتىن. رۋحاني استانامىز قاسيەتتى تۇركىستاندا باستاۋ الىپ, «دالا پارلامەنتى» اتانعان مارتەبەلى «مارتوبە» مەن قاسيەتتى قازىعۇرت پەن ورداباسىدا, تورەلىگى تولىق ءتولەبي مەن وڭتۇستىكتەگى جەر ءجانناتى تۇلكىباس اۋداندارىندا وسى كەڭەستەر جاراسىمدى جالعاسىن تاپتى. ول 2011 جىلدىڭ مامىرىنان بەرى رەسمي تۇردە وبلىس اكىمى توراعالىق ەتەتىن وبلىس اكىمى جانىنداعى «ىرىس الدى – ىنتىماق» قوعامدىق فورۋمى مارتەبەسىنە يە بولدى. وسى تۇستا ايتا كەتكىم كەلەدى, وبلىستىڭ اۋدان, قالا اكىمدىكتەرىنىڭ جانىنان دا «ىرىس الدى – ىنتىماق» قوعامدىق فورۋمدارى وتاۋ تىكتى.
كوگىلدىر كوكتەمدى جەتەلەگەن ناۋرىز وڭتۇستىكتەن باستالادى. ال «ىرىس الدى – ىنتىماق» جىل سايىن جەردىڭ شىرايىن اشار, كوڭىلىڭدى شاتتىققا بولەر كوكتەمدە وتەدى. بۇگىندە بۇل قوعامدىق فورۋم مىزعىماس بiرلiگiمiزدi, بەرiك اۋىزبiرشiلiگiمiزدi, كiشiپەيiل iزگiلiگiمiزدi نىعايتا ءتۇسىپ, يگi iستەردiڭ جالعاسۋىنا جول اشۋدا. ەجەلدەن سوزگە توقتاعان, ەل اراسىندا سىيلى, بەدەلدى اقساقالدىڭ سوڭعى ءسوزىن شەشىم ەتىپ قابىلدايتىن حالىقتىڭ ۇرپاعىمىز عوي. وسى تۇرعىدا اۋىل-ايماقتارداعى ورىن العان ولقىلىقتاردى جويىپ, شەشىمىن كۇتىپ جۇرگەن كۇرمەۋى قيىن, كۇردەلى ماسەلەلەردى جەدەلدەتۋ توڭىرەگىندە اقساقالدار كەڭەسىنىڭ ىقپالى جوعارى. ءوز ومىرىندە سان-سالالى بىلىمدەرىن ەڭبەكتەگى مول تاجىريبەسىمەن ۇشتاستىرىپ, بويداعى بار قازىناسىن حالىققا جۇمساعان داناگوي اقساقالداردان سايلانعان كەڭەس, نەگىزىنەن, اۋىل جاستارىن پاتريوتتىق رۋحتا تاربيەلەۋگە ۇمتىلادى. اۋىل-ايماعىن كوگالداندىرۋ مەن قوعامدىق ورىنداردا تازالىق ساقتاۋ, سالاماتتى ءومىر سالتىن ناسيحاتتاۋ, تەمەكى مەن الكوگولدى ىشىمدىكتەردىڭ ادام اعزاسىنا تيگىزەتىن زيانى جونىندە ۇگىت-ناسيحات جۇمىستارىن جۇرگىزۋ, اۋىل تۇرعىندارىن يماندىلىققا, باۋىرمالدىققا, ىزگى قاسيەتتەرگە باۋلۋ, تۇرمىسى تومەن وتباسىلارىنا كومەك بەرۋگە ىقپال ەتۋ سياقتى ماسەلەلەرمەن اينالىسادى.
كەڭەس توراعاسى تەك اۋىلىنىڭ الەۋمەتتىك جاعدايى عانا ەمەس, تۇرعىندارىنىڭ وتباسىلىق قيىندىقتارى ماسەلەسىن دە قاراپ, شەشۋ جولدارى جايلى ۇسىنىس-پىكىرلەرىن جەرگىلىكتى اتقارۋشى ورگانداردىڭ قاراۋىنا ۇسىنادى, ماسەلەنىڭ سوڭىنا دەيىن جەتۋىن, ونى باقىلاۋدى ءوز موينىنا الادى. ءسويتىپ, مەملەكەتتىك ورگاندارعا كۇن سايىن دەرلىك ءارتۇرلى ءوتىنىش, ارىز-شاعىمدارمەن تولاسسىز كەلىپ جاتاتىن ازاماتتاردىڭ, ولارعا جىبەرىلەتىن جاۋاپتاردىڭ سانىن, ياعني قاعازباستىلىقتى ءبىرشاما ازايتۋعا اسەر ەتەدى.
سونداي-اق, ەل بيلەۋگە ءتوسەلگەن تۋراشىل دا ءادىل اقساقالداردان سايلانعان «بيلەر القاسىنىڭ» دا قوعامدا الار ورنى ەرەكشە. ەل ىشىندە كەزدەسەتىن «تەنتەگىن» سىن تەزىنە سالاتىن, ساحارادا ەرتەدەن قالىپتاسقان بيلەر القاسى بۇگىندە وسىنىسىمەن قۇقىق قورعاۋ ورگاندارىنىڭ جۇمىسىنا كوپ سەپتىگىن تيگىزۋدە. «ءار وتباسىنىڭ ءوز باس اۋرۋى بار», اتا-انا, تۋعان-تۋىس, باۋىرعا كونبەيتىن جاسوسپىرىمدەردىڭ ماسەلەسىن كوپ بولىپ قولعا الىپ, قۇقىق بۇزۋشىلىققا بارۋىنىڭ الدىن الادى, كورشىلەر اراسىنداعى داۋ-دامايدى بەيبىت جولمەن شەشۋگە كوڭىل بولەدى. ءسويتىپ, ەل اراسىندا الاۋىزدىقتى بولدىرماي, دوستىق پەن ىنتىماقتاستىقتى, ەلدىڭ بەرەكە-بىرلىگىن ساقتاۋعا ءوز ۇلەستەرىن قوسىپ جۇرگەن بيلەر القاسىنىڭ قىزمەتى ءاردايىم قاجەتتى. ولار جەرگىلىكتى اتقارۋشى, قۇقىق قورعاۋ ورگاندارىمەن جانە حالىقپەن تىعىز بايلانىستا ءجۇرىپ ەل اراسىنداعى ماڭىزدى ىستەردىڭ ۇيىتقىسى دا بولىپ وتىر.
وسىنداي ماقساتتا جەر-جەرلەردە قۇرىلعان اقساقالدار, بيلەر ينستيتۋتتارى, ايەلدەر كەڭەسى, جاستار ۇيىمدارى قوعامعا ءوز ۇلەستەرىن قوسۋدا. ماسەلەن, وسى اتالعان قوعامدىق ۇيىمداردا قارالعان ماسەلەلەر بۇگىندە «ىرىس الدى – ىنتىماق» قوعامدىق فورۋمىنىڭ كۇن تارتىبىنەن ورىن الىپ, اۋىل اراسىندا كۇرمەۋگە كەلمەيتىن تىرلىكتەر تالقىعا تۇسەدى, ناتيجەسىندە, ەل اعالارى شەشىمىن تابۋعا ىقپال ەتۋدە.
سوڭعى كەزدە قوعامىمىزدا جاسوسپىرىمدەر مەن مەكتەپ وقۋشىلارىنىڭ جانە جاستاردىڭ اراسىنداعى قىلمىس وسە تۇسۋدە. بۇل ماسەلەدە اتا-انا, مەكتەپ, قوعامدىق ۇيىمدار ءبىرلەسە, بەل شەشە كۇندەلىكتى ءتاربيە جۇمىسىمەن اينالىسىپ, قوعامعا ساي لايىقتى ۇرپاق ءوسىرۋىمىز كەرەك. ولاردىڭ ساۋاتتى مامان ءارى تياناقتى قىزمەتكەر بولۋىنا ىقپال ەتۋ ازاماتتىق بورىشىمىز. سەبەبى, بىلىكتى مامان ەلدىڭ ەرتەڭىن جاسايدى. ال ەڭبەككە قىرى جوق, ەرىنشەك جاستار قىلمىسكەرلەر توبىن ارتتىرارى ءسوزسىز.
جالپى, جاستار ماسەلەسى وتە وزەكتى ءارى كۇردەلى. وسى تۇرعىدا, بىلتىر ەلباسىنىڭ تاپسىرماسىمەن جانە وبلىس اكىمىنىڭ تىكەلەي قولداۋىمەن رەسپۋبليكادا العاش رەت وڭتۇستىك قازاقستان وبلىسىندا جاستار ساياساتى ماسەلەلەرى جونىندە باسقارما قۇرىلعان بولاتىن. حالقىمىزدا «باق بەرەردە ەلگە ىرىس قونادى, ۇستانعان جولى دۇرىس بولادى» دەگەن دانالىق ءسوز بار. وسى ۇستانىم بويىنشا, ءاربىر اۋدان, قالادا وكىلدىكتەرى, جاستار ورتالىقتارى جۇمىسقا كىرىستى. سونداي-اق, ءبىر تەرەزە قاعيداتى بويىنشا جاس كاسىپكەرلەرگە قىزمەت كورسەتۋ ورتالىقتارى دا العاش رەت ءبىزدىڭ وڭىردە اشىلدى. ءسويتىپ, جاس كاسىپكەرلەرگە قالاي جۇمىس ىستەۋ جونىندە كومەك كورسەتىلە باستادى. تاعى ءبىر ەرەكشەلىگىمىز, جاستار ءۇشىن بارلىق اۋدانداردىڭ ورتالىقتارىنان كاسىپكەرلىك مەكتەپتەر اشىلدى. جاستارعا قاتىستى جۇمىستاردىڭ اتقارىلۋ بارىسى جايلى وبلىستىق ءماسليحاتتىڭ ءىس-جوسپارىنا سايكەس, سەسسيانىڭ كۇن ءتارتىبىندەگى باستى ماسەلە رەتىندە قارالىپ, ءتيىستى شەشىم شىعارىلدى. مىنە, وسىلايشا «ىرىس الدى – ىنتىماقتا» كوتەرىلگەن جاستار ماسەلەسىن شەشۋگە ەل اعالارى, حالىق قالاۋلىلارى بولىپ بىرلەسىپ جۇمىس جاساۋدامىز.
بۇگىندە وڭتۇستىك قازاقستان وبلىستىق ءماسليحاتىندا «ەل بىرلىگى» دەپۋتاتتىق توبى قۇرىلدى. توپ قۇرامىنداعى حالىق قالاۋلىلارىنىڭ ماقساتى, اتاۋى ايتىپ تۇرعانداي, مادەني بىرلەستىكتەرمەن بىرلەسىپ, وبلىس حالقىنىڭ ىنتىماق-بىرلىگىنە قاجەتتى جاعدايلاردى جاساۋ.
وبلىس اكىمى ا.مىرزاحمەتوۆتىڭ رەسپۋبليكا بويىنشا وبلىس اكىمدەرىنىڭ رەيتينگىندە ەكىنشى ورىنعا يە بولۋىنا وڭتۇستىكتەگى وسى وڭ ىستەر ايعاق بولسا كەرەك.
ارينە, حالىقتار اراسىنداعى دوستىق, اۋىزبىرشىلىك, تاتۋلىق بار جەردە الىنبايتىن اسۋ جوق. كۇنى ەرتەڭ استانا قالاسىندا ەلىمىزدىڭ ەكونوميكالىق جەتىستىكتەرى, الەۋمەتتىك يگىلىكتەرى, ساياسي تۇراقتىلىق پەن مادەني وركەندەۋ ماسەلەلەرى ءسوز بولاتىن, «قازاقستان-2050» ستراتەگياسى: ءبىر حالىق – ءبىر ەل – ءبىر تاعدىر» كۇن تارتىبىمەن وتكەلى وتىرعان قازاقستان حالقى اسسامبلەياسىنىڭ حح سەسسياسىنىڭ جۇمىسى جەمىستى بولاتىنىنا سەنىمدىمىن.
ابىلقاسىم دوسبولوۆ,
وڭتۇستىك قازاقستان وبلىستىق ءماسليحاتىنىڭ دەپۋتاتى, قازاقستان حالقى اسسامبلەياسىنىڭ مۇشەسى.
وڭتۇستىك قازاقستان وبلىسى.
ەرلان وماروۆ.
