حالىقارالىق قاتىناستار فاكۋلتەتىنىڭ دەكانى ساعىنعالي ايدارباەۆ بۇگىنگى كۇنى ەلىمىزدە بىرنەشە تىلدە قاتار تىكەلەي اۋدارما جاسايتىن ماماندار تاپشى ەكەندىگىن ايتادى. پروفەسسور وقۋ وشاعىنىندا شىمىلدىعىن تۇرگەن اتالمىش ورتالىقتان شىڭدالىپ شىققان الەۋەتتى اۋدارماشىلار وسى ولقىلىقتىڭ ورنىن تولتىرسا دەگەن تىلەگىن جەتكىزدى.
«باستى ماقساتىمىز – قازاقستاندا ديپلوماتيالىق اۋدارماشىلار مەكتەبىن قالىپتاستىرۋ. بۇل باعىتتاعى جۇمىستارعا ۋنيۆەرسيتەت باسشىسى اكادەميك عالىم مۇتانوۆ باستاماشى بولىپ وتىر. شاكىرتتەرىمىز بۇۇ-نىڭ بارلىق تىلدەرىن قازاقشاعا جانە كەرىسىنشە قازاقشانى اتالمىش تىلدەرگە تىكەلەي اۋداراتىن وزىق مامان بولسا دەيمىز», دەيدى ساعىنعالي ايدارباەۆ.
ورتالىقتىڭ اشىلۋ راسىمىنە ارنايى كەلگەن شۆەيتساريانىڭ قازاقستانداعى توتەنشە جانە وكىلەتتى ەلشىسى ۋرس شميد, ەكى ەل اراسىنداعى ساۋدا-ەكونوميكالىق ارىپتەستىك بايلانىستار جىل وتكەن سايىن ورىستەپ كەلە جاتقانىن مالىمدەدى.
«ەۋروپا ەلدەرىنىڭ ىشىندە شۆەيتساريا قازاقستانعا ينۆەستيتسيا قۇيۋشى مەملەكەتتەردىڭ اراسىندا ءۇشىنشى ورىندا. قوس مەملەكەت اراسىنداعى ىنتىماقتاستىق قارىم-قاتىناستار دا جوعارى مانگە يە. بۇل مەكتەپتەن شىققان بولاشاق اۋدارماشىلار وسى بايلانىستاردىڭ ودان ءارى وربۋىنە سەپ بولاتىن كادرلارعا اينالاتىنىنا سەنەمىن. شۆەيتسارياداعى جەنەۆا اۋدارما مەكتەبى بۇل سالانىڭ كوشباسشىلارىنىڭ ءبىرى ەكەنىن بىلەسىزدەر. وسى ورايدا ەكى ەل ستۋدەنتتەرىنىڭ ءوزارا تاجىريبە الماسۋ ىسىنە دە قولداۋ كورسەتۋگە دايىنبىز», – دەيدى شۆەيتساريا ەلشىسى ۋرس شميد.
حالىقارالىق قاتىناستار فاكۋلتەتىندە ءتورت بىردەي ماماندىققا فرانتسۋز تىلىندە ساباق بەرىلەدى. باسقا دا الەم تىلدەرى مامان دايارلاۋ ىسىندە قولدانىلادى. جۋىردا عانا ءبىلىم وشاعىنىڭ ۇستازدارى فرانتسۋز, اعىلشىن, ورىس, تىلدەرىندەگى ديپلوماتيالىق تەرميندەردى قامتىعان اۋدارما كىتابىن قۇراستىرىپ شىعارعان. وقۋلىق اۆتورى, ديپلوماتيالىق اۋدارما كافەدراسىنىڭ مەڭگەرۋشىسى الماش سەيديكەنوۆا اتالعان ەڭبەك ءتىل ماماندارى ءۇشىن ۇلكەن كومەك قۇرالى بولاتىنىن, بۇل باعىتتارداعى ىزدەنىستەر ءالى دە جالعاسىن تاباتىنىن جەتكىزدى.
