ەرلىك ەشقاشان ۇمىتىلمايدى
سەيسەنبى, 9 ءساۋىر 2013 1:45
استانا قالاسىنداعى وتان قورعاۋشىلار پاركىنىڭ ەرلىك اللەياسىندا وتكەن جەكسەنبىدە 1995 جىلدىڭ 7 ءساۋىرى كۇنى تاجىك-اۋعان شەكاراسىندا ەرلىكپەن قازا تاپقان ىشكى اسكەرلەردىڭ 17 جاۋىنگەرىنىڭ ەرلىگىنە ارنالعان ەرلىك كۇنى ءىس-شاراسى بولىپ ءوتتى.
نەگىزىنەن ەلىمىزدىڭ ىشكى اسكەرلەرى ىشكى قاۋىپسىزدىكتى قامتاماسىز ەتۋدى ابىرويمەن اتقارىپ كەلەدى. الايدا جوعارعى كەڭەس قاۋلىسىمەن قازاقستان ىشكى اسكەرلەرىنىڭ ەكى مىڭعا تارتا جاۋىنگەرى 1993 پەن 1999 جىلدار ارالىعىندا تمد سىرتقى شەكاراسىن قورعاۋ ءۇشىن تاجىك-اۋعان ۋچاسكەسىن كۇزەتۋدە دە ءوز مىندەتتەرىن جاقسى اتقارا ءبىلدى.
سەيسەنبى, 9 ءساۋىر 2013 1:45
استانا قالاسىنداعى وتان قورعاۋشىلار پاركىنىڭ ەرلىك اللەياسىندا وتكەن جەكسەنبىدە 1995 جىلدىڭ 7 ءساۋىرى كۇنى تاجىك-اۋعان شەكاراسىندا ەرلىكپەن قازا تاپقان ىشكى اسكەرلەردىڭ 17 جاۋىنگەرىنىڭ ەرلىگىنە ارنالعان ەرلىك كۇنى ءىس-شاراسى بولىپ ءوتتى.
نەگىزىنەن ەلىمىزدىڭ ىشكى اسكەرلەرى ىشكى قاۋىپسىزدىكتى قامتاماسىز ەتۋدى ابىرويمەن اتقارىپ كەلەدى. الايدا جوعارعى كەڭەس قاۋلىسىمەن قازاقستان ىشكى اسكەرلەرىنىڭ ەكى مىڭعا تارتا جاۋىنگەرى 1993 پەن 1999 جىلدار ارالىعىندا تمد سىرتقى شەكاراسىن قورعاۋ ءۇشىن تاجىك-اۋعان ۋچاسكەسىن كۇزەتۋدە دە ءوز مىندەتتەرىن جاقسى اتقارا ءبىلدى. وسىدان 18 جىل بۇرىن ىشكى اسكەرلەردىڭ جەكە روتاسى تاجىكستاننىڭ تاۋلى شاتقالدارىندا سودىرلارمەن قاقتىعىسىپ قالعانى بەلگىلى. سول كۇشى باسىم جاۋمەن قيان-كەسكى ۇرىستا قازباتتىڭ 17 جاۋىنگەرى قازا تاپتى. قازاقتا «ەلدىڭ اتىن ەر شىعارادى», دەگەن اتالى ءسوزدى وسىندايدا ايتسا كەرەك. سول قازاقستاندىق جاۋىنگەرلەردىڭ ەرلىگىن تاجىكستان حالقى ءالى دە ۇمىتا قويعان جوق. سونىڭ ءبىر جارقىن دالەلى رەتىندە 2007 جىلى دۋشانبە قالاسىندا ەرلىك مونۋمەنتى اشىلسا, وعان قازا بولعان اسىل ەرلەردىڭ دە ەسىمى تاسقا قاشالىپ جازىلعاندىعى. ال استانادا 2009 جىلدىڭ ساۋىرىندە وتان قورعاۋشىلار الاڭىندا ىشكى اسكەرلەردىڭ 17 جاۋىنگەرىنىڭ ەرلىگىنە ارنالىپ ەرلىك اللەياسى اشىلدى.
سول اللەيادا جىل سايىن ىشكى اسكەرلەر جاس ساربازدارىنىڭ وتان الدىندا ادال قىزمەت ەتۋگە انت بەرۋ ءراسىمىن وتكىزۋى داستۇرگە اينالعان. وسى رەتتە ءساۋىردىڭ 7-ءسى ىشكى اسكەرلەردە «تاعزىم كۇنى» دەپ بەكىتىلگەندىگىن ايتا كەتۋ كەرەك. قالىپتاسقان داستۇرگە ساي بيىل دا بارلىق بولىمشەلەردە ەرلىكپەن قازا تاپقان ساربازداردىڭ رۋحىنا تاعزىم ەتۋ شارالارى بولىپ ءوتتى. ەلوردادا دا ەرلىك اللەياسىنا جينالعان ىشكى اسكەرلەردىڭ جەكە قۇرامى, ارداگەرلەر, قازا تاپقانداردىڭ تۋعان-تۋىستارى مەن جاقىن دوستارى جانە جاقىندارى بەيبىتشىلىك پەن ادىلەتتىلىك جولىنا جاس جاندارىن قۇربان ەتكەن جانداردىڭ رۋحتارىنا تاعزىم ەتىپ, كۇڭىرەنگەن قوبىز ۇنىمەن گۇل شوقتارىن قويدى. ءتىپتى گۇل شوقتارىن قويۋعا اسكەريلەرشە كيىنگەن اسكەري-پاتريوتتىق سىنىبىنىڭ وقۋشىلارى دا ارنايى كەلىپتى. وزدەرىنىڭ اسكەري بورىشتارىن ادال اتقارىپ, ەرلىكپەن قازا تاپقانداردىڭ اراسىندا ستارشينا قالماقان باقباەۆ, سەرجانت راديك قايمۋلديەۆ, كىشى سەرجانت ءاليحان وگىزباەۆ, قاتارداعى جاۋىنگەرلەر ەرجان بايباعىسوۆ, ەربول بەكەباەۆ, باۋىرجان دالاباەۆ, جاقسىلىق جانسۇگىروۆ, يموماددين جۇماتوۆ, قانات ەدىرىشەۆ, ەربول يساباەۆ, ەرجان ابديەۆ, ەركەبۇلان ماقاجانوۆ, ميحايل مارتىنەنكو, اناتولي مەشكوۆ, داستان نۇرمەتوۆ, ەركىن بايعابىلوۆ جانە تاحير رايىمجانوۆ بار. جالپى, تمد سىرتقى شەكاراسىن كۇزەتۋدە ەرلىكپەن قازا تاپقانداردىڭ 5-ءۋى ءىى دارەجەلى «ايبىن» وردەنىمەن جانە 12 ادام «جاۋىنگەرلىك ەرلىگى ءۇشىن» مەدالىمەن ناگرادتالعان.
ارتىنان قازا تاپقانداردى ەسكە الۋ ءۇشىن ءبىر مينۋتتىق ۇنسىزدىك جاريالاندى. سونداي-اق اسپانعا وق اتىلىپ, قازا تاپقانداردىڭ رۋحىنا تاعزىم ەتىلدى. ەلدىڭ ماڭگى مىزعىماستىعىن پاش ەتۋ ءۇشىن اسكەري وركەستر مەملەكەتتىك گيمندى وينادى. جينالعان كوپشىلىك الدىندا ءىىم ىشكى اسكەرلەردىڭ باس قولباسشىسى رۋسلان جاقسىلىقوۆ پەن ىشكى ىستەر ورگاندارى مەن ىشكى اسكەرلەر ارداگەرلەرى كەڭەسىنىڭ توراعاسى ومىرزاق بولسامبەكوۆ جانە دە بىرقاتار ادامدار ورتاعا شىعىپ, ەرلىك جولىنىڭ ەستەن شىقپايتىندىعى تۋرالى ءبىراز جىلى سوزدەرىن ارنادى. ارتىنان اسكەري بولىمدەردىڭ جەكە قۇرامدارى سالتاناتتى جاعدايدا مارشپەن ءجۇرىپ ءوتتى.
اسقار تۇراپباي ۇلى,
«ەگەمەن قازاقستان».
–––––––––––––––––––––
سۋرەتتى تۇسىرگەن
ەرلان وماروۆ.
