ءبىرىنشى كەزەڭدە راللي اقتاۋ قالاسىنان وڭتۇستىككە قاراي, وبلىس ورتالىعىنان وڭتۇستىك-شىعىسقا قاراي 210 شاقىرىم جەردە ورنالاسقان كەندىرلى كۋرورتىنا بەت الدى. ءبىرىنشى جارىس كۇنى قىزۋ قارقىنمەن ءوتتى. الەمنىڭ ۇزدىك رالليشىلارى بىردەن العا دەن قويىپ, مارەگە دەيىن تايتالاستى. قولايلى اۋا رايىندا اۆتوشاباندوزدار جىلدامدىقتى بىردەن ارتتىرا ءتۇستى. بارلىق اۆتوجارىسشىلار مارە سىزىعىن ەش قيىندىقسىز جانە تەحنيكالىق ينتسيدەنتتەرسىز ءساتتى كەسىپ ءوتتى.
قازاقستاندىق كەزەڭنىڭ فاۆوريتتەرىنىڭ ءبىرى, «داكار» راللي-جارىسىنىڭ قازىرگى چەمپيونى كاتارلىق ناسسەر سالەح ءال-اتتيا (Nasser Al-Attiya Team) شتۋرمانى ماتە بومەلمەن بىرگە, كوشباسشىلىقتى بىردەن ءوز قولىنا الىپ, قاشىقتىقتى 2 ساعات 22 مينۋت جانە 3 سەكۋندتا باعىندىرىپ كوش باستادى. كوشباسشىعا لايىقتى باسەكەنى «راللي قازاقستان 2018» جەڭىمپازى يازيد ءال-رادجي (Overdrive Racing) ەكيپاجى كورسەتە ءبىلدى, Toyota Hilux اۆتوكولىگىندە ساۋد ارابياسىنان شىققان اۆتوجارىسشى كاتارلىقتان نەبارى ەكى سەكۋندقا ارتتا قالدى.
كولىك دوڭگەلەگىن اۋىستىرۋعا جوعالتقان ۋاقىتقا قاراماستان, ناسەر سالەح ءال-اتتيا ءبىرىنشى ورىننان كورىنە ءبىلدى. كاتاردىڭ شاباندوزى جارىستىڭ ءبىرىنشى كۇنىنەن العان ءوز اسەرىمەن ءبولىستى.
- كوماندالىق جۇمىس پەن ۇيىمشىلدىقتىڭ ارقاسىندا ءبىز قارسىلاستارعا قاراعاندا ءار بۇرىلىستى جىلدام ءوتىپ, باعالى سەكۋندتاردى ۇنەمدەدىك. ەگەر ەسىڭىزدە بولسا, وتكەن جىلى ءبىرىنشى ۋچاسكەدە ءبىزدىڭ اۆتوكولىگىمىزگە ايتارلىقتاي زاقىم كەلىپ, ءبىز جارىسقا قاتىسۋىمىزدى توقتاتقان بولاتىنبىز. ازىرگە بارلىعى جوسپار بويىنشا جۇرۋدە جانە ءبىز وتە وپتيميستىك كوزقاراستامىز. قازىرگى مىندەت - بارىنشا ساق بولۋ جانە كەلەسى جارىس كۇنىندە دە كوشباسشىلىقتى ساقتاپ قالۋ, دەدى كاتاردىڭ تاجىريبەلى رالليشىسى ناسسەر سالەح ءال-اتتيا.
يازيد ءال-ءرادجيدىڭ ەكيپاجى جارىستى ءتورتىنشى بولىپ باستادى جانە ونىڭ شتۋرمانى ديرك فون ءتسيتتسيتستىڭ ايتۋى بويىنشا, دودانىڭ ورتا تۇسىندا ولار ستەفان پەتەرەنسەلدىڭ (X-raid MINI JCW Team) ەكيپاجىن قۋىپ جەتكەن, ودان كەيىن ۆلاديمير ۆاسيلەۆتىڭ (VRT Team) كومانداسىمەن اشىق ايقاسقا تۇسكەن. ناتيجەسىندە, يازيد ءال-رادجي رەسەيلىك ۇجىمدى مارە سىزىعىنا دەيىن ارتقا تاستاي الدى.
- ءبىز باستاپقى كۇننىڭ قورىتىندىسى بويىنشا ءوز ناتيجەمىزگە ريزامىز. اقتاۋدان كەندىرلىگە دەيىنگى تراسسادان باسەكەلەستىكتىڭ ناعىز رۋحى مەن درايۆىن سەزىندىك. الدا ءالى كوپ كۇن جارىس, ءبىر مينۋتقا دا مۇقياتتىلىقتى جوعالتپاۋ ماڭىزدى. ءبىز تاڭداعان ستراتەگيانى ۇستانامىز جانە كوشباسشىدان وسىلايشا قالىس قالۋدى قىسقارتا تۇسەمىز, دەدى يازيد ءال-رادجي.
راللي-رەيد بويىنشا الەم كۋبوگىنىڭ قازىرگى چەمپيونى ياكۋب پشيگونسكي (Orlen X-raid Team) Mini John Cooper Works Rally اۆتوكولىگىمەن مارەگە ءۇشىنشى بولىپ جەتتى, پولشالىق اۆتوشاباندوز ەكيپاجى ءبىرىنشى كۇننىڭ جەڭىمپازىنان 3 مينۋت جانە 1 سەكۋندقا ارتتا قالدى.
- بۇگىنگى جارىس كۇنى ادەمى تابيعي پەيزاجدارمەن ەستە قالدى. ءبىز جەتىنشى بولىپ جارىستى باستادىق, ال مارە سىزىعىن ءۇشىنشى بولىپ كەستىك. كۇشىمىزدى دۇرىس جۇمساي وتىرىپ, تۇراقتىلىقتى ساقتاپ, ءوز ناتيجەمىزدى بىرتىندەپ جاقسارتۋىمىز قاجەت, - دەدى پولياك پيلوتى ياكۋب پشيگونسكي.
وسى جىلعى الەم كۋبوگىنىڭ جالپى ەسەبى بويىنشا كوشباسشىلاردىڭ ءبىرى ستەفان پەتەرانسەل (X-raid MINI JCW Team) ءوزىنىڭ شتۋرمانى, ءارى جۇبايىمەن بىرگە سەگىزىنشى ورىنعا جايعاستى. ودان كەيىنگى ورىنعا تاجىريبەلى قازاقستاندىق اۆتوجارىسشى, «OFF ROAD Kazakhstan» كومانداسىنىڭ وكىلى اندرەي چەرەدنيكوۆ ءوزىنىڭ شتۋرمانى يگنات فالكوۆپەن بىرگە ورنالاستى. قازاقستاندىق كوماندانىڭ كوشباسشىدان 26 مينۋتقا ارتتا قالعانىنا قاراماستان, جارىستى جوعارى قارقىنمەن جالعاستىرۋعا دايىن.
ستەفان پەتەرانسەل ءۇشىن ءبىرىنشى كۇن ءساتسىز بولدى. اتى اڭىزعا اينالعان فرانتسۋز اۆتوشاباندوزى جىلدامدىقتى ۇدەتە ءتۇسىپ, Mini John Cooper Works Rally اۆتوكولىگىنىڭ دوڭگەلەگىن جارىپ الدى. دوڭگەلەكتى اۋىستىرۋ كوپ ۋاقىت العاندىقتان, ول كوشباسشى شاباندوزداردان ايتارلىقتاي ارتتا قالدى. فرانتسۋز «راللي قازاقستانعا» العاش رەت قاتىسۋدا جانە وعان ءالى دە ماڭعىستاۋداعى جولسىز جەردىڭ ەرەكشەلىگىنە ۇيرەنۋگە تۋرا كەلەدى.
ت2 ساناتىندا ەڭ جاقسى ۋاقىتتى 3 ساعات 9 مينۋت جانە 9 سەكۋند ناتيجەسىمەن تاعى ءبىر كاتاردىڭ اۆتوجارىسشىسى موحاممەد ءال-مير (Mohammed Nasser Almeer) كورسەتتى. ەكىنشى جانە ءۇشىنشى ورىنداردى تۇرىكمەندىك شاباندوزدار, تۇركمەنستاننىڭ اۆتوسپورت فەدەراتسياسىنىڭ وكىلدەرى يەلەندى. برازيليانىڭ اۆتوشاباندوزى رەينالدو ۆارەلا (MONSTER Energy Can-Am) ت3 ساناتىندا ءبىرىنشى بولىپ, 3 ساعات 4 مينۋتتا مارەگە جەتتى. جۇك كولىكتەرى ساناتىندا رەسەيلىك «كاماز-ماستەر» كومانداسىنان دميتري سوتنيكوۆقا تەڭ كەلەر ەشكىم بولمادى, ونىڭ ەكيپاجى ءبىرىنشى كۇننىڭ قاشىقتىعىن 3 ساعات 2 مينۋت جانە 59 سەكۋندتا ءجۇرىپ ءوتتى.
سەيسەنبى, 28 مامىر كۇنى شاباندوزداردى قۇمدى القاپ ارقىلى ەڭ قاشىق 414 كيلومەترگە سوزىلعان اينالما ۋچاسكە كۇتىپ تۇر. ەكىنشى كۇن سەنەك ەلدى مەكەنىنىڭ شىعىسىنا قاراي ورنالاسقان ءشول ارقىلى كەندىرلى بيۆۋاكىندا باستالىپ, سول جەردە ءوز مەجەسىنە جەتەدى.
ماڭعىستاۋ وبلىسى
