ويتكەنى ەلىمىزدىڭ ءار تۇكپىرىنەن جازعى دەمالىسقا بارىپ كەلگەن بالالار تۇرماق, جاۋاپتى ۇستازداردىڭ جىلارمان كۇيدە ورالعانىن كورىپ ءجۇرمىز. بولمەلەردەگى ماتەريالدىق جاعدايدىڭ جۇتاڭدىعى, تاماق ساپاسىنىڭ جانە ءار الۋاندىعىنىڭ ماردىمسىزدىعى, دەمالىس شارالارىنىڭ قىزىقتى بولماۋى الىستان ات ارىتىپ بارعانداردىڭ كوڭىلىن سۋ سەپكەندەي باسادى. ءوتكەن جىلى باستاۋىشتى بىتىرە سالا الدىڭعى كەزەكتە لاگەرگە اتتانعان وقۋشىنىڭ «مۇنداي لاگەرگە بارعانشا, اۋىلدا, ۇيدە بولعانىم جاقسى ەدى», دەگەنى كوپ ويلارعا جەتەلەيدى.
بالالاردىڭ جازعى دەمالىسىن, لاگەرلەردى ۇيىمداستىرۋدا جاڭاشىلدىق قاجەت-اق. ايتپەسە بولىنگەن قىرۋار قارجى سانى بار ساپاسى جوق دەمالىس ورىندارى مەن لاگەرلەرگە جۇمسالىپ, بالالارىمىز جىلتىراق ەسەپتەر مەن «ءبارى جاقسى» دەگەن وڭ بەلگىنىڭ قۇربانى بولىپ كەتەتىن جايت كەزدەسپەي تۇرمايدى. لاگەرلەردىڭ سانىمەن بىرگە دەمالىستىڭ ساپاسى دا ارتۋى ءتيىس.
ماڭعىستاۋدا جازعى دەمالىس ماسەلەسى ءوز كوكجيەگىن كەڭەيتىپ كەلەدى دەۋگە بولادى. لاگەرلەر سانى ارتىپ, بالالاردى كوڭىلدى دەمالىسپەن قامتۋعا قۇلشىنىس بار.
بالالاردى ەلىمىزدىڭ ءجانە شەتەلدەردىڭ دەمالىس لاگەرلەرىندە, تۋريستىك ورىندارىندا دەمالتۋ, ەل مەن جەر تانىتۋ ماقساتىندا قىدىرتۋ مەملەكەت تاراپىنان, سونداي-اق ءىرى كومپانيالار, ۇجىمدار قولداۋىمەن ۇيىمداستىرىلسا, ەكىنشىدەن, وتباسىلىق دەمالىس تۇرىندە اتا-انا ءوز ەسەبىنەن جۇزەگە اسىرىپ كەلەدى.
وبلىستىق ءبىلىم باسقارماسىنىڭ باسشىسى ا.سەيداليەۆ ماڭعىستاۋلىق بالالار جازعى دەمالىسپەن تولىق قامتىلاتىنىن ايتادى.
قازىرگى تاڭدا وبلىس مەكتەپتەرىندە 1-10 سىنىپ ارالىعىندا 133 317 بالا ءبىلىم الۋدا. ءۇردىس بويىنشا جازعى ساۋىقتىرۋ جۇمىستارى «لاگەرلەردە دەمالىس» جانە «بالالاردىڭ بوس ۋاقىتىن ءتيىمدى پايدالانۋ» سىندى ەكى باعىتتا جۇزەگە اسىرىلادى. تولىق قامتىلادى دەپ سەنىمدى ءسويلەۋگە قالا سىرتىنداعى 4 لاگەر, 89 مەكتەپ جانىنداعى جانە قوسىمشا ۇيىمداردا وتەتىن لاگەرلەر, جالپى وڭىردەگى 319 ساۋىقتىرۋ ورتالىعى نەگىز بولا الادى. بالالار مەكتەپ جانىنداعى لاگەرلەردە تانىمدىق, شىعارماشىلىق, سپورتتىق شارالارعا قاتىسىپ, تاڭەرتەڭنەن كەشكە دەيىن دەمالادى. سونىمەن قاتار قوسىمشا 102 كاسىپتىك, 124 تۋريزم, سپورت, پالاتالىق باعىتتاعى لاگەرلەرى ءوز جۇمىسىن باستايدى دەپ جوسپارلانعان. بالالاردى جازعى دەمالىسپەن تولىق قامتۋ ءۇشىن اۋداندىق, قالالىق بيۋدجەتتەن 429 ملن تەڭگە قاراجات ءبولىندى. مەكتەپ جانىنداعى, قالا سىرتىنداعى لاگەرلەردەن بولەك, بالالار ءۇشىن كۇنىنە 2-3 ساعاتتىق ساۋىقتىرۋ شارالارى دا ويلاستىرىلعان. تۋريستىك, سپورتتىق, تانىمدىق شارالارى اياسىندا بالالار ەكى-ءۇش كۇندىك ساياحاتتارعا شىعاتىن بولادى.
– ايماقتا از قامتىلعان وتباسىنان شىققان 11700 بالا بار. بارلىعى تەگىن دەمالىسپەن قامتاماسىز ەتىلەدى. ونىڭ ىشىندە 40 بالا «ادجيپ كاسپيان» مەكەمەسىنىڭ دەمەۋشىلىگىمەن تامىز ايىندا يتاليا ەلىنە جولداما الادى. سونىمەن قاتار بالالار ءۇيىنىڭ تاربيەلەنۋشىلەرى ءۇشىن دە الماتى, استانا قالالارىندا دەمالىس جوسپارلانعان, – دەيدى وبلىستىق ءبىلىم باسقارماسىنىڭ باسشىسى ا.سەيداليەۆ.
