اباي مەكتەبىندەگى يگى ءداستۇر جالعاسىن تابا بەرمەك
سەيسەنبى, 5 اقپان 2013 7:31
زايسان اۋدانىنىڭ ىرگەسىندەگى قارابۇلاق اۋىلىنداعى اباي اتىنداعى ورتا مەكتەپتى سوڭعى بەس جىلدان بەرى اۋداندىق ءماسليحاتتىڭ دەپۋتاتى, ءوز ءىسىنىڭ بىلگىرى گۇلنار ۋاتحانقىزى اقتانوۆا باسقارىپ كەلەدى. مۇنىڭ الدىندا وسى ۇجىمدا ۇستاز, وقۋ-تاربيە جونىندەگى ورىنباسار بولىپ قىزمەت ىستەگەن گۇلنار ۋاتحانقىزىنىڭ ەڭبەك ءوتىلى 33 جىل ەكەن. اۋىلداستارى قۇرمەتىنە بولەنگەن, قاشان دا حالىقتىڭ ءسوزىن سويلەپ, جوعىن جوقتاپ, قوعامدىق جۇمىستاردىڭ بەل ورتاسىنان تابىلاتىن ىسكەر ۇستاز ءبىزدى جىلى قارسى الىپ, مەكتەپتىڭ ەكىنشى قاباتىنا باستادى.
سەيسەنبى, 5 اقپان 2013 7:31
زايسان اۋدانىنىڭ ىرگەسىندەگى قارابۇلاق اۋىلىنداعى اباي اتىنداعى ورتا مەكتەپتى سوڭعى بەس جىلدان بەرى اۋداندىق ءماسليحاتتىڭ دەپۋتاتى, ءوز ءىسىنىڭ بىلگىرى گۇلنار ۋاتحانقىزى اقتانوۆا باسقارىپ كەلەدى. مۇنىڭ الدىندا وسى ۇجىمدا ۇستاز, وقۋ-تاربيە جونىندەگى ورىنباسار بولىپ قىزمەت ىستەگەن گۇلنار ۋاتحانقىزىنىڭ ەڭبەك ءوتىلى 33 جىل ەكەن. اۋىلداستارى قۇرمەتىنە بولەنگەن, قاشان دا حالىقتىڭ ءسوزىن سويلەپ, جوعىن جوقتاپ, قوعامدىق جۇمىستاردىڭ بەل ورتاسىنان تابىلاتىن ىسكەر ۇستاز ءبىزدى جىلى قارسى الىپ, مەكتەپتىڭ ەكىنشى قاباتىنا باستادى.
– مەكتەبىمىز ەسكى بولعانىمەن, سوناۋ 90-جىلعى ءزىلزالا كەزىندە سىر بەرمەدى. ازداپ ءجوندەپ العانبىز. اۋدان اكىمى سەرىك زاينۋلدين ۇنەمى قامقورلىق جاساپ تۇرادى. قازىر ءبىلىم ورداسىندا 388 وقۋشى بار, مەكتەپ الدىنداعى دايارلىقتى قوسقاندا بالالار سانى 454. 50 ورىندىق بالاباقشا دا ءبىزدىڭ مەكتەپتىڭ ىشىندە, جالپى سانى 202 وقۋشىعا تەگىن تاماق بەرىلەدى, – دەپ مەكتەپ ديرەكتورى ءبىراز جايدان حاباردار ەتتى.
ەكىنشى قاباتتاعى اباي مۇراجايى قۇندى كىتاپتار مەن حاكىم اقىن جايلى شىعارمالارمەن تولىقتىرىلعان, سارعايعان ماقالالار مەن ەسكى جۋرنالداردان دا قاجەتتى ماعلۇماتتار الا الاسىز. مۇنىڭ الدىندا عانا ابايدىڭ شوبەرەسى, زايساندا تۇراتىن, جاسى 90-عا جاقىنداپ قالعان گۇلزيپا يسرايلوۆا مەكتەپ وقۋشىلارىمەن كەزدەسىپ, اتاسى جايلى ەستەلىكتەر ايتىپتى. اباي مۇراجايىندا اۋىل تاريحى تۋرالى سىر شەرتەتىن مالىمەتتەر دە از ەمەس ەكەن.
– اباي مەكتەبىنەن تۇلەپ ۇشقاندار قاتارىندا تالانت يەلەرى كوپتەپ سانالادى. وسى ۇيادان بىرنەشە عىلىم دوكتورى, التى عىلىم كانديداتى تۇلەپ ۇشقان, – دەپ اڭگىمەگە ارالاستى زايسان اۋداندىق ءماسليحاتىنىڭ حاتشىسى داۋلەت ىدىرىشەۆ. – بەلگىلى اقىن ەسەت اۋكەباەۆ, قازاقستاننىڭ ەڭبەك سىڭىرگەن قايراتكەرى, كۇمىسكومەي ءانشى ءارى سازگەر دالەل ءۋاش, جۇزدەن استام حالىقارالىق دارەجەدەگى سپورت شەبەرلەرىن دايىنداعان بىلىكتى باپكەر ءجانادىل اتاەۆ, عىلىم كانديداتى, سپورت مامانى ەركىن ۋانباەۆ, تانىمال جۋرناليستەر سۇڭعات الىپباەۆ, ەرمۇرات باپي, بولات ناسىپباەۆ تا وسى مەكتەپتەن ءبىلىم العان.
ءوڭىر باسشىسى ب.ساپارباەۆتىڭ باستاماسىمەن شىعىستىڭ بارلىق اۋداندارى مەن اۋىلدارىندا قانات جايعان «تۋعان ەلگە – تاعزىم!» اكتسياسى بويىنشا كەزىندە وسى ءبىلىم ورداسىنان تۇلەپ ۇشقان شاكىرتتەر كىندىك قانى تامعان اۋىلدارىنا قايىرىمدىلىق قولىن سوزىپتى. ءۇش سىنىپقا كىرەبەرىستە ءىلۋلى تۇرعان «مەكتەپ تۇلەكتەرىنىڭ تارتۋى» دەگەن جازۋعا كوزىمىز ءتۇستى. 2010, 2011, 2012 جىلدارى تۇلەكتەر سىنىپتى قاجەتتى وقۋ قۇرالدارىمەن, تەلەديدار, كومپيۋتەر , توڭازىتقىشپەن جابدىقتاپ قويىپتى.
مەكتەپ وقۋشىلارى ءتۇرلى وليمپيادالار مەن بايقاۋلاردان دا تابىستى ورالۋدا. اتاپ ايتقاندا, 10-شى سىنىپ وقۋشىسى تولعاناي قاليولدانوۆا بيولوگيا ءپانى بويىنشا وبلىستىق سايىستا ەكىنشى, ال, ايگەرىم قاسىموۆا حيميا پانىنەن ءۇشىنشى ورىنعا يە بولىپتى.
ءبىلىم مەن ەڭبەك ەگىز. اباي مەكتەبىنىڭ ۇستازدارى وسى قاعيداعا بەرىك. جاز كەزىندە ەكى گەكتارعا كارتوپ, جارتى گەكتارعا كوكونىس ءوسىرىپ, پايداسىن كورىپ وتىر. وتكەن جىلى 2800 كيلو كارتوپ, 1150 كيلو ءسابىز, 913 كيلو ورامجاپىراقتى مەكتەپتىڭ قوسالقى شارۋاشىلىعىنان جيناپ العان. ول ول ما, مەكتەپ ۇجىمى وسىنداعى شارۋا قوجالىقتارىمەن كەلىسىمگە وتىرىپ, كوكونىستى ارزان باعامەن الۋدا. داۋلەت تانتىباەۆ دەگەن ازامات ءبىر توننا كارتوپ ءتۇسىرىپ بەرىپتى.
مەكتەپ جانىنداعى جىلىجايعا كەلدىك. مۇنداعى قياردى جاقىندا جيناپ الىپتى. جاڭاسىن وتىرعىزۋ باستالىپتى. ول ءۇش ايدا پىسەدى, ار جاعىندا باقشا ماۋسىمى باستالادى, – دەيدى ديرەكتور گۇلنار قارىنداسىمىز.
– جازدا مەكتەپ ماڭى اعاشتىڭ جاڭا ءتۇرلەرىمەن تولىعادى, گۇلدەر بۇرشىك جارعان كەزدە حوش يىستەن باس اينالادى, راحات, نەشە ءتۇرلى جانۋارلاردىڭ سۇلباسىن جاساپ, بالالاردىڭ تابيعاتقا دەگەن جاناشىرلىعىن وياتۋداعى ۇستازداردىڭ بەلسەندىلىگىنە ەرىكسىز ريزا بولاسىز, – دەپ اۋداندىق ءبىلىم بەرۋ ءبولىمىنىڭ باستىعى ءسانيا ابدىعاليەۆا اڭگىمەنى تولىقتىردى. ونىڭ ايتۋىنشا, جاز شىعا اۋدان اكىمى سەرىك زينابەك ۇلىنىڭ باستاماسىمەن بارلىق مەكتەپتەر اپتا سايىن سەنبىلىككە شىعىپ اۋلالار مەن كوشەلەردى كوركەيتۋگە اتسالىسادى, اعاش كوشەتتەرىن وتىرعىزىپ, تۇرمىسى ناشار جاندارعا كومەكتەسەدى. ال, بۇل ۇلگىلى ءىستىڭ باسى-قاسىندا مەكتەپ ۇستازدارى دا جۇرەتىنى شىندىق.
وڭداسىن ەلۋباي,
«ەگەمەن قازاقستان».
شىعىس قازاقستان وبلىسى.
زايسان اۋدانى.
سۋرەتتە: مەكتەپ جانىنداعى بالا باقشا سابيلەرى «قارا جورعانى» بيلەپ تۇر.
