«استانا ەكونوميكالىق فورۋمى» اياسىندا مۇنايلى ءوڭىر مەن قارجى ورتالىعى بىرلەسىپ «Global Silk Road Mangystau invest-2019» حالىقارالىق فورۋمىن وتكىزدى. ناتيجەسىندە ماڭعىستاۋ وبلىسى العاش بولىپ «استانا حالىقارالىق قارجى ورتالىعىمەن» مەموراندۋمعا قول قويدى. وسىلايشا, وبلىس اكىمى ەرالى توعجانوۆ پەن احقو باسقارۋشىسى قايرات كەلىمبەتوۆ جاڭا مەموراندۋم اياسىندا جان-جاقتى كەلىسىمگە كەلدى. فورۋم بارىسىندا كاسىپكەرلەرمەن قۇنى 230 ملن اقش دوللارىن قۇرايتىن ەكى ينۆەستيتسيالىق جوبانى ىسكە اسىرۋ جونىندە ۋاعدالاستىق جاسالدى.
وڭىرلەرگە ينۆەستيتسيا تارتۋدىڭ جاڭا مودەلى رەتىندە بيىل «استانا ەكونوميكالىق فورۋمىنىڭ» اياسىندا «ءوڭىر قوناق» جاڭا جۇيەسى ەنگىزىلىپ, وعان العاش بولىپ ماڭعىستاۋ وبلىسى تاڭدالدى. بۇل جۇيەنىڭ باستى ماقساتى – وڭىرگە الەمدىك دەڭگەيدەگى جاڭا ينۆەستورلار مەن قارجى ۇيىمدارىن جۇمىلدىرۋ.
قازىرگى تاڭدا ماڭعىستاۋ وبلىسىندا 2019-2025 جىلدارعا باعىتتالعان, 2,4 ترلن تەڭگەنى قۇرايتىن 44 ينۆەستيتسيالىق جوبا قاراستىرىلۋدا.
ونىڭ ىشىندە, شەت مەملەكەتتەردىڭ قاتىسۋىمەن 2,2 تريلليون تەڭگەنى قۇرايتىن 18 جوبانى ىسكە اسىرۋ جوسپارلانعان. سونداي-اق 2019 جىلى وبلىستا 66,7 ملرد تەڭگەنى قۇرايتىن 22 جوبانى, ونىڭ ىشىندە, قۇنى 38,4 ملرد تەڭگەنى قۇرايتىن 4 جوبانى شەتەلدىكتەردىڭ قاتىسۋمەن ىسكە قوسۋ جوسپارلانىپ وتىر.
تۇڭعىش پرەزيدەنتتىڭ تاپسىرماسىنا سايكەس, ماڭعىستاۋ وبلىسىنىڭ اكىمدىگى «تسوپ«مانگيستاۋ» جشس بازاسىندا ينۆەستورلارعا ءبىر تەرەزە قاعيداتى بويىنشا قىزمەت كورسەتۋگە ارنالعان «فرونت وفيس» اشتى.
«فرونت ءوفيستىڭ» باستى ماقساتى – ينۆەستورلاردىڭ بارلىق ۇكىمەتتىك جانە باسقا ۇيىمدارعا قاتىستى جۇمىستارىن ارتتىرۋ. مۇندا الەۋەتتى ينۆەستور ماڭعىستاۋ وبلىسىنداعى ينۆەستيتسيالىق قىزمەتتى مەملەكەتتىك قولداۋدىڭ ىقتيمال نىساندارى تۋرالى جانە وزدەرىنە قاجەتتى بارلىق اقپاراتتى الادى. بۇگىندە وبلىس اكىمدىگى ينۆەستيتسيالىق ساياساتتى ءجۇزەگە اسىرۋ ماقساتىندا, مەملەكەتتىك ورگاندار مەن باسقا دا ۇيىمدار اراسىنداعى ءوزارا ارەكەتتەسۋ ەرەجەلەرىن دايىنداپ بەردى. ەرەجەدە «فرونت ءوفيستىڭ» بۇكىل جۇمىسى قاراستىرىلعان, دەدى ە.توعجانوۆ.
سونىمەن قاتار الداعى 5 جىلدا وبلىستى دامىتۋدىڭ باسىم باعىتتارى – تۋريزم, اۋىل شارۋاشىلىعى, ونەركاسىپ, ەنەرگەتيكا, كولىك جانە لوگيستيكا سالالارىندا 6 ينۆەستيتسيالىق قۇرىلىم بار. ءار سالانىڭ ينۆەستيتسيالىق تارتىمدىلىعى ورىس, اعىلشىن, تۇرىك, پارسى, قىتاي ءتىلدەرىنە اۋدارىلىپ, جازبا تۇردە ۇسىنىلادى. شەتەلدىك ينۆەستورلاردىڭ قاتىسۋىمەن كوپ فۋنكتسيونالدى لوگيستيكالىق ورتالىقتىڭ, تۇزسىزداندىرۋ زاۋىتىنىڭ, كاۋستيكالىق سودا مەن تۇز قىشقىلىن شىعاراتىن زاۋىتتىڭ, سۋ تۇشىتۋ قوندىرعىسىنىڭ قۇرىلىسى سياقتى پەرسپەكتيۆالىق جوبالار جۇزەگە اسىرىلۋدا.
ىڭعايلى گەوگرافيالىق ورنالاسۋى, باي تاريحي مۇرالارى, تەڭىزگە شىعۋدىڭ قولجەتىمدىلىگى, سونداي-اق نەگىزگى تۋريستىك اعىنداردى تۋدىراتىن ەلدەرگە جاقىن بولۋ ءتۋريزمدى دامىتۋعا مۇمكىندىك بەرەدى.
ماڭعىستاۋدا ءتۋريزمدى دامىتۋ ءۇشىن, 63 شاقىرىمعا سوزىلعان تەڭىز جاعالاۋىندا ينجەنەرلىك ينفراقۇرىلىم جۇمىستارى باستالىپ كەتتى.
– ءوڭىردىڭ كليماتتىق جاعدايى ايماققا ەلەكتر قۋاتىنىڭ قوسىمشا كوزى ءۇشىن, كۇن جانە جەل ەلەكتر ستانسالارىن سالۋعا مۇمكىندىك بەرەدى. ايماقتىڭ شۋاقتى كۇندەرىنىڭ ۇزاقتىعى جىلىنا – 300 كۇن. بۇل ەلدەگى ەڭ جاقسى كورسەتكىش, جەلدىڭ جىلدامدىعى – 8,43 مەتر سەكۋند. سوندىقتان ماڭىزدى سەكتوردىڭ ءبىرى – بالامالى ەنەرگيا كوزدەرىن دامىتۋ. بۇل كەلەشەكتە ەلەكتر ەنەرگياسىن ءوندىرۋدىڭ بارلىق ءداستۇرلى ادىستەرىن توقتاتا الاتىن ەڭ پەرسپەكتيۆالى رەسۋرستاردىڭ ءبىرى. بۇگىنگى تاڭدا ايماقتا قۋاتى 90 مۆت جەل ەلەكتر ستانساسى سالىنىپ جاتىر, دەدى ءوڭىر باسشىسى.
