«بالالاردىڭ دەمالىسىن ۇيىمداستىرۋ – ماڭىزدى ماسەلە. ول ءار وتباسىعا قاتىستى», — دەدى ۇكىمەت باسشىسى اسقار مامين.
قاراعاندى, الماتى, پاۆلودار وبلىستارىندا بالالاردى دەمالىسپەن جانە ىسپەن شۇعىلدانۋمەن تولىقتاي دەرلىك قامتۋ كوزدەلگەن. ۇكىمەت باسشىسى قالعان وڭىرلەرگە جاز مەزگىلىندە بالالاردىڭ دەمالىسى مەن بوس ۋاقىتىن ءتيىستى دەڭگەيدە ۇيىمداستىرۋ شارالارىن دەرەۋ قابىلداۋدى تاپسىردى.
«بالالار كانيكۋل كەزىندە مۋزەيلەرگە, تەاترلارعا, قورىقتارعا, ۇلتتىق پاركتەرگە, سپورت نىساندارىنا تەگىن كىرە الۋى قاجەت. تاقىرىپتىق كەزدەسۋلەر, ءىس-شارالار, ساپارلار ۇيىمداستىرۋ كەرەك», — دەدى ا. مامين. — جازعى بوس ۋاقىتتى ۇيىمداستىرۋ ءۇشىن مەتسەناتتاردى بەلسەندىرەك تارتۋ قاجەت, وڭىرلەردە جاعىمدى مىسالدار بار».
پرەمەر-مينيستر جازعى دەمالىس شارالارىن ۇيىمداستىرۋ اياسىندا بالالاردىڭ قاۋىپسىزدىگىن قامتاماسىز ەتۋدىڭ ماڭىزدىلىعىنا توقتالىپ ءوتىپ, ىشكى ىستەر, ءبىلىم بەرۋ, دەنساۋلىق ساقتاۋ ورگاندارىنا, وڭىرلەردىڭ اكىمدىكتەرىنە ءتيىستى قىزمەتتەردىڭ جۇمىسىن جۇمىلدىرۋدى تاپسىردى.
بالالاردىڭ دەنساۋلىعىن نىعايتۋ جانە قورعاۋ, سالاۋاتتى ءومىر سالتىن قالىپتاستىرۋ ماقساتىندا قوعامدىق ورىندارداعى تاماقتانۋ ساپاسىنا, تاماقتانۋ ورىندارى مەن بوس ۋاقىتتى وتكىزۋ ورىندارىندا سانيتارلىق تازالىققا ەرەكشە كوڭىل ءبولۋ قاجەت.
«بارلىق لاگەرلەر مەديتسينا قىزمەتكەرلەرىمەن جانە ءتيىستى پەداگوگيكالىق كادرلارمەن قامتاماسىز ەتىلۋى ءتيىس», — دەدى اسقار مامين.
ماسەلەنى قاراۋ قورىتىندىسى بويىنشا ءبىلىم جانە عىلىم مينيسترلىگىنىڭ كەلەسى جىلى لاگەرلەردىڭ سانىن ارتتىرۋ بويىنشا ۇسىنىستارىنا قولداۋ ءبىلدىرىلدى.
«ساناتوريلەر مەن تۋريستىك بازالار, ۇلتتىق ساياباقتار جانە جوعارى وقۋ ورىندارى جانىندا بىر مىڭعا دەيىن جازعى ساۋىقتىرۋ ورتالىقتارىن اشۋ, جۇمىس ىستەمەي تۇرعاندارىن وڭالتۋ بويىنشا جۇمىستاردى جۇرگىزۋ قاجەت. بۇل بالالاردى جازعى دەمالىسپەن تولىق قامتۋعا مۇمكىندىك بەرەدى», — دەدى ا. مامين جانە وڭىرلەردىڭ اكىمدىكتەرىنە بالالاردىڭ دەمالىسىن ەرەكشە باقىلاۋعا الىپ, بالالاردى دەمالىسپەن جانە ىسپەن شۇعىلدانۋمەن بارىنشا قامتۋدى قامتاماسىز ەتۋدى تاپسىردى.
