العاشقى ۇلتتىق سۋرەتشىلەر ءابىلحان قاستەەۆ, قوجاحمەت جانە قۇلاحمەت قوجىقوۆتاردىڭ جۇمىستارىندا قازاق دالاسىنىڭ جارتىلاي كوشپەلى ومىردەن اجىراپ, جاڭا ونەركاسىپتىك كەلبەت العان جاڭا ءداۋىرىنىڭ تىنىسى بوياماسىز سۋرەتتەلدى. قازاقستانعا كەلگەن ي.بالحوزين, ب.ۋرمانچە, ن.ياگودكين, ا.ريتتيح, ر.ۆەليكانوۆا, پ.زالتسمان جانە تاعى دا باسقا سۋرەتشىلەر اتقارعان كاسىبي بەينەلەۋ جۇيەلەرىنىڭ اقپاراتىن تاراتۋشىلىق قىزمەتتەرى پورترەتتەر مەن پەيزاجدىق كورىنىستەردىڭ قايناعان شەبەرحاناسى بولدى دەپ ايتا الامىز. كسرو-نىڭ ۇزدىك ينستيتۋتتارىندا كاسىبي ءبىلىم العان ءبىر توپ تالانتتى سۋرەتشىلەر شىعارماشىلىق قىزمەتتەرىن ءوز ەلدەرىندە جالعاستىردى, سونىڭ ىشىندە ءبىرقاتار تۋىندىگەرلەر اكۆارەلدىك كەسكىندەمەگە دە ايرىقشا دەن قويدى.
«قازاقستان اكۆارەلى: كەشە جانە بۇگىن» كورمەسى ءبۇگىنگى كۇن تۇرعىسىنان اكۆارەل جاۋھارلارىن كورىپ, اڭعارىپ-ۇعىنۋعا قولعا تۇسە بەرمەيتىن مۇمكىندىك تۋعىزىپ وتىر. رەسپۋبليكا ونەرىنىڭ قالىپتاسۋىنىڭ ءار ءتۇرلى كەزەڭدەرىندەگى سۋرەتشىلەردىڭ شىعارماشىلىعىنداعى ەرەكشەلىكتەر بىزگە جاقسىراق سەزىلەدى. قازاقستان كەسكىندەمەشىلەرىنىڭ شىعارماشىلىعىندا ناتيۋرمورت ەشقاشان دا باستى جانر بولىپ ەسەپتەلمەگەنىن ەسكەرگەن ءجون, الايدا و.كولومىتسەۆا, ل.كۋزنەتسوۆا, گ.ماديبيەۆا جانە تاعى باسقالاردىڭ تۇنىق تابيعاتتىڭ ەستە قالار ساتتەرىن سيپاتتايتىن كومپوزيتسيالارى اكادەميالىق ونەردىڭ ستيلدىك جانە وبرازدىق-پلاستيكالىق ەرەكشەلىكتەرىن ساقتاعان ەرەكشە كەسكىندەمەلىك تاقىرىپ رەتىندە قابىلدانادى», – دەيدى ونەرتانۋشى سۆەتلانا كوبجانوۆا.
كورمەدە وڭىرىمىزدەگى وسىناۋ دەگدار ونەردىڭ قارقىن الۋىنا سەرپىن بەرگەن ە.سيدوركين, ا.عالىمباەۆا, ءۇ.اجيەۆ سىندى شەبەرلەردىڭ اكۆارەلدىك جۇمىستارى وزىنە بىردەن باۋراپ الادى. ەڭ باستىسى, شىعارماشىلىقتارى مەن تەمپەرامەنتتەرى ءارتۇرلى سۋرەتشىلەردىڭ كۇردەلى ءارى كوپ قىرلى تەحنيكادا ورىنداعان شىعارمالارى ءار دارىننىڭ وزىنە عانا ءتان قايتالانباس قولتاڭباسىن ايگىلەپ تۇر. قازاق دالاسىنىڭ سۇلۋلىعى, كوز تۇندىرار تۇمسا تابيعاتتىڭ سان الۋاندىعى مەن اۋقىمى ءتۇرلى بۋىن سۋرەتشىلەرىنىڭ كەنەبىندەگى باستى تاقىرىپقا اينالعان. تۋىندىلارى كورمەگە قويىلعان سۋرەتشىلەردىڭ ءارقايسىسى دارا كەسكىندەمەلىك-پلاستيكالىق وبراز جاساپ, قورشاعان الەمدى ۇعىنۋ مەن زەرتتەۋدىڭ وزىندىك تاسىلدەرىن تاپ باسقان.
الماتى
