وبلىستىق دەنە شىنىقتىرۋ جانە سپورت باسقارماسى مەن ورداباسى اۋدانى اكىمدىگى ۇيىمداستىرعان جارىسقا رەسەي, وزبەكستان, موڭعوليا ەلدەرىمەن قاتار ەلىمىزدىڭ بارلىق وبلىستارىنان 300-گە جۋىق بالۋان قاتىستى. قاجىمۇقان اتىنداعى ورتالىق ستاديوندا وتكەن تۋرنيردە سپورتشىلار ەكى كۇن بويى 8 سالماق دارەجەسىندە جەڭىمپاز اتانۋ ءۇشىن كۇش سىناستى. جوعارى دايىندىقپەن كەلگەن بالۋاندار اراسىنداعى ءاربىر جەكپە-جەك تارتىستى ءوتىپ, جانكۇيەرلەردى جالىقتىرمادى. سەگىز سالماق دارەجەسى بويىنشا مىقتىلار انىقتالعان سوڭ بالۋاندار تۇيە پالۋانعا تىگىلگەن جاڭا «نيۆا» اۆتوكولىگىن ساراپقا سالدى.
ياعني ءابساليۋتتى سالماقتا 32 بالۋان بوز كىلەمدە كۇش سىناستى. ناتيجەسىندە ەكى قازاقستاندىق جانە ەكى موڭعوليالىق جىگىت بارلىق قارسىلاستارىنىڭ جاۋىرىنىن جەرگە تيگىزىپ, جارتىلاي فينالعا شىقتى. تارتىستى وتكەن بەلدەسۋلەر ناتيجەسىندە جۇلدەلى ءۇشىنشى ورىندى موڭعوليا بالۋانى دورج انار يەلەندى. ال, الىپتاردىڭ ايقاسىنداعى اقتىق سىندا الماتىلىق رۋسلان ابدرازاقوۆ پەن موڭعوليالىق سەرىك بەردىمۇرات كەزدەستى. بابىندا ەكەنىن دالەلدەگەن تاجىريبەلى بالۋان رۋسلان ابدرازاقوۆ قارسىلاسىن ايقىن باسىمدىقپەن ۇتىپ, حالىقارالىق ءتۋرنيردىڭ جەڭىمپازى اتاندى. جۇلدەلى ەكىنشى ورىندى موڭعوليالىق سەرىك بەردىمۇرات يەلەندى. ءسويتىپ, ءداستۇرلى حالىقارالىق ءتۋرنيردىڭ باس جۇلدەسىنە تىگىلگەن «نيۆا» اۆتوكولىگىنىڭ كىلتىن رۋسلان ابدرازاقوۆقا ورداباسى اۋدانىنىڭ اكىمى قايرات جولدىباي ۇلى مەن وبلىستىق دەنە شىنىقتىرۋ جəنە سپورت باسقارماسىنىڭ باسشىسى پولات قىرىقباەۆ تابىس ەتتى. بارلىق جەڭىمپازدار مەن جۇلدەگەرلەر ارنايى تاعايىندالعان ەستەلىك سىيلىقتارمەن ماراپاتتالدى.
تۇركىستان وبلىسى
