بۇكىل ەل حالقى ەلەڭدەپ وتىرعان پرەزيدەنتتىك سايلاۋ جاقىنداپ كەلەدى. مەملەكەت باسقارۋ ىسىنە ۇمىتتىلەردىڭ سايلاۋالدى باعدارلامالارى قاي دەڭگەيدە؟ ولاردىڭ ۇگىت-ناسيحات جۇمىستارى, جۇرتشىلىقپەن جۇزدەسۋلەرى قالاي ءجۇرىپ جاتىر؟ كانديداتتاردىڭ يدەيالارى قانشالىقتى كوڭىلگە قونىمدى نەمەسە قونىمسىز؟ وسى تاقىرىپتاردى سارالاعان ساراپشىلار بۇقارالىق اقپارات قۇرالدارى ۇمىتكەرلەردىڭ ءۇنىن حالىققا جەتكىزۋدە بارىنشا بەلسەندىلىك تانىتۋعا ءتيىس دەيدى. ولاردىڭ پىكىرىنشە, بۇل ماقساتتا, اسىرەسە, عالامتور قۋاتىن وڭتايلى پايدالانعان ءجون. ەڭ باستىسى, حالىق نازارى ناعىز ليدەرگە ءتۇسۋى كەرەك.
«باعدارلامانى تولىقتاي سارالاپ شىقتىق. اربىرىنە ءار ءتۇرلى دارەجەدە پىكىر ايتۋعا بولادى. بالكىم, ۋاقىتتىڭ تاپشىلىعى, فورماتتاردىڭ كەمشىلىگى دەگەن ماسەلەلەر ىقپال ەتكەن بولۋى كەرەك, كەيبىر كانديداتتار جانىن اسا قيناماعانداي بولىپ كورىندى. كەيبىر سايلاۋالدى باعدارلامالاردىڭ ونە بويىنان ايتەۋىر تەز ارادا جازىپ, جۇرتقا تاپسىرايىق دەگەن يشاراتتار دا بايقالىپ قالدى. كەم دەگەندە جۇرت ەستە ساقتاي الاتىنداي 5-10 قاعيداتپەن عانا شىعا سالايىق دەگەن كانديداتتار دا كەزدەستى. ءوزىنىڭ باعدارلاماسىن ءبىرشاما تەرەڭنەن ىزدەپ, ءار ءتۇرلى باعىتتا نەگىزگى دەگەن بۇكىل سالانى قامتىعان جاقسى باعدارلامالار دا بار. سولاردىڭ ءبىرازىن دارالاپ ايتۋعا دا بولادى. ماسەلەن, قاسىم-جومارت توقاەۆتىڭ باعدارلاماسى تولىققاندى باعدارلامانىڭ ءبىرى دەپ باعا بەرەر ەدىك. ەكىنشى كەزەكتە تولەۋتاي راحىمبەكوۆ پەن ءامىرجان قوسانوۆتىڭ, ەلىمىزدىڭ تاريحىندا تۇڭعىش رەت سايلاۋعا تىركەلگەن ايەل دانيا ەسپاەۆانىڭ دا باعدارلامالارىن شىن مانىندە جاقسى جازىلعان, بىرقاتار ماڭىزدى ماسەلە قامتىلعان دەپ ايتا الامىز. كەيبىر كانديداتتاردىكى, ءسوزدىڭ اشىعى قاجەت, وتە ءبىر پوپۋليستىك سارىنداعى, جەڭىل-جەلپى دارەجەدە دايىندالعان دۇنيەلەر سەكىلدى كورىنەدى», - دەيدى تالقىلاۋعا قاتىسقان ساياساتتانۋشى ايدوس سارىم.
سايلاۋ ناۋقانى باستالعالى بەرى ساراپشىلار قاۋىمى الماتىدا بىرنەشە مارتە باس قوسىپ, ساياسي ناۋقاننىڭ ماقسات-مىندەتتەرى, دايىندىق شارالارى تۋرالى ءوزارا پىكىر الماسقان بولاتىن. جيىندا ءسوز العان الماتى قالالىق قوعامدىق كەڭەستىڭ مۇشەسى, ساياساتتانۋشى مارات شيبۋتوۆتىڭ پىكىرىنشە, سايلاۋشىلار ەلىمىزدە بولىپ جاتقان ءار وزگەرىسكە ءبىزدىڭ تىكەلەي قاتىسىمىز بار دەگەن ۇستانىمدا بولۋى كەرەك. وسىلاي دەگەن ساراپشى, ۇمىتكەرلەردىڭ سايلاۋالدى باعدارلاماسىنا قاتىستى وي ءبىلدىردى.
«بىرەر كۇن بۇرىن كانديدات سادىبەك تۇگەلدىڭ ءوز باعدارلاماسىن تۇبەگەيلى وزگەرتكەنى ءبارىمىزدى تاڭعالدىردى. كورىپ وتىرعانىمىزداي, سايلاۋ تاريحىنداعى ەڭ قىسقا باعدارلاما امانگەلدى تاسپيحوۆقا تيەسىلى بولدى. باعدارلاما بار-جوعى 220 سوزدەن تۇرادى. تاعى ءبىر تىلگە تيەك ەتەر جايت, ۇمىتكەرلەردىڭ باعدارلامالارىن سارالاپ وتىرىپ, كوپشىلىگىنىكى ناقتى ءبىر سالانى عانا قامتىعانىن بايقادىق. ماسەلەن, دانيا ەسپاەۆا حانىم كاسىپكەرلەرگە, تولەۋتاي راحىمبەكوۆ اۋىل شارۋاشىلىعى سالاسىنىڭ وكىلدەرىنە, ءامىرجان قوسانوۆ پەن سادىبەك تۇگەل تەك ناقتى ءبىر اۋديتورياعا كوبىرەك كوڭىل ءبولىپ وتىرعانداي كورىندى. مەنىڭشە, ولارعا اۋديتوريانى بارىنشا كەڭەيتۋ قاجەت. ال قاسىم-جومارت توقاەۆ پەن جامبىل احمەتبەكوۆ وزدەرىنىڭ اۋقىمدى باعدارلاماسىمەن بۇكىل جۇرتشىلىققا ءۇن تاستاپ, سان سالانىڭ ماماندارىن ءوزىن قولداۋعا شاقىرىپ وتىر. دەگەنمەن, ءداپ قازىرگى كەزەڭدە بۇقارا حالىققا باعدارلامالاردان كورى بەينەكونتەنتتىك قادامدار ءوتىمدى سەكىلدى. ۇمىتكەرلەر وسىنى ەسكەرسە», – دەيدى ساياساتتانۋشى.
ءوز ويىن بىلدىرگەن باسقا دا ساراپشىلار ەكونوميكا, الەۋمەت سىندى مەملەكەتتىڭ نەگىزگى تىرەگى سانالاتىن سالالاردى ورىستەتۋگە كۇش سالاتىن كوشباسشى عانا ساياسي تۇراقتىلىقتى ودان ءارى جالعاي الادى. سوندىقتان پرەزيدەنتتىككە ۇمىتكەرلەر سايلاۋشىلاردى ناعىز كوشباسشى ەكەنىنە سەندىرۋى كەرەك دەگەندى جەتكىزدى.
الماتى
