بۇرىن شەتەلدىكتەر جۇمىس ىستەۋگە رۇقسات الۋ ءۇشىن, بىرنەشە كۇن ءتۇرلى مەكەمەنى ارالاۋعا ءماجبۇر بولاتىن. ەندى ولار جسن الۋ, سالىق تولەۋ, مەديتسينالىق تەكسەرۋدەن, داكتيلوسكوپيادان ءوتۋ, ساقتاندىرۋ انىقتاماسىنا قول جەتكىزۋ سەكىلدى قۇجاتتاردى ءبىر جەردە, ءبىر ساعاتتىڭ ىشىندە راسىمدەۋ مۇمكىندىگىنە يە بولدى. بۇل ەلىمىزدەگى كوشى-قون قىزمەتتەرىن كورسەتەتىن ون بەسىنشى ورتالىق. جاڭا ورتالىقتىڭ اشىلۋ سالتاناتىنا قاتىسقان تۇركىستان وبلىسىنىڭ اكىمى ومىرزاق شوكەەۆ مەملەكەتتىك قىزمەتتەر بەلگىلەنگەن ۋاقىت رەگلامەنتىنە ساي ەلەكتروندىق كەزەك ارقىلى ارنايى جابدىقتالعان جۇمىس ورىندارىندا جۇزەگە اسىرىلاتىنىن اتاپ ءوتتى. «بۇل ميگرانتتار ءۇشىن عانا ەمەس, جۇمىس بەرۋشى ءۇشىن دە وتە قولايلى. جاڭا محقو جۇمىس بارىسىن جەڭىلدەتىپ قانا قويماي, سىبايلاس جەمقورلىق ارەكەتتەرىنىڭ الدىن-الۋعا جول اشادى»,- دەدى سالتاناتتى راسىمدە «ازاماتتارعا ارنالعان ۇكىمەت» مەملەكەتتىك كورپوراتسياسى توراعاسىنىڭ ورىنباسارى ءبىرجان ءجۇنىسوۆ.
ايتا كەتەيىك, تۇركىستان وبلىسىندا بيىلعى جىلدىڭ باسىنان بەرى ميگراتسيا باعىتى بويىنشا 36728 قىزمەت كورسەتىلگەن.
تۇركىستان وبلىسى
