بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە وبلىس اكىمىنىڭ ورىنباسارى ەربول سادىر مالىمدەدى. وڭىردە اتاۋلى الەۋمەتتىك كومەككە بايلانىستى ەلباسى باستامالارىنا سايكەس ارنايى شتاب قۇرىلىپ, الەۋمەتتىك كارتا جاسالىنعان. «الەۋمەتتىك كارتا بويىنشا وبلىستاعى 86,6 مىڭ كوپبالالى وتباسىنىڭ 19 مىڭى از قامتىلعان قاتارىنا ەنگىزىلدى. بيىلعى 1 ساۋىردەن باستاپ اتاۋلى الەۋمەتتىك كومەككە جۇگىنگەن 56,9 مىڭ ازاماتقا زاڭدىق كەڭەس بەرىلىپ, وبلىس بويىنشا قابىلدانعان 32 326 وتباسى وتىنىشتەرى «ە-حالىق» اقپاراتتىق ەلەكتروندىق جۇيەگە ەنگىزىلدى. اعىمداعى جىلى, ەنگەن وزگەرىستەرگە بايلانىستى شارتتى اقشالاي كومەك 12 ايعا, شارتسىز اقشالاي كومەك 6 ايعا تاعايىندالاتىنى كوزدەلدى. ءبىر وتباسىعا اتاۋلى الەۋمەتتىك كومەكتىڭ ايلىق مولشەرى ورتا ەسەپپەن 100-150 مىڭ تەڭگەنى, جىلدىق مولشەرى 1,8 - 2 ملن. تەڭگەنى قۇرايدى. وسىعان بايلانىستى, قوماقتى قارجىنى ءتيىمدى پايدالانۋ ءۇشىن جانە ءوز ءىسىن اشىپ, قوسىمشا تابىس تابۋ ماقساتىندا وبلىستا از قامتىلعان ازاماتتاردى كاسىپكەرلىككە تارتۋ بويىنشا جۇمىستار جۇرگىزىلۋدە», - دەدى ەربول سادىر.
سونداي-اق وبلىس اكىمىنىڭ ورىنباسارى وتكەن جىلدىڭ تاجىريبەسى نەگىزىندە اتاۋلى الەۋمەتتىك كومەكتىڭ بىرجولعى تولەمىنە باسىمدىق بەرىپ, اتالعان قارجى ەسەبىنەن ازىرلەنگەن 15 كىشى بيزنەس-جوبا ىسكە اسىرىلىپ جاتقانىن اتاپ ءوتتى. «ناتيجەسىندە 2019 جىلدىڭ 1 توقسانىندا 400-گە جۋىق وتباسى ءوز ءىسىن اشتى. «اتامەكەن» ۇلتتىق كاسىپكەرلەر پالاتاسىمەن بىرلەسىپ «ەڭبەك» مەملەكەتتىك باعدارلاماسىنا ءتيىستى وزگەرىستەر ەنگىزىلگەننەن كەيىن كوپبالالى وتباسىلارعا قايتارىمسىز 500 مىڭ تەڭگە مەملەكەتتىك گرانتتار بەرىلەتىن بولادى», - دەدى وبلىس اكىمىنىڭ ورىنباسارى. وبلىستا كوپبالالى وتباسىلارعا ارنالعان «ىرىس» ميكروقارجى ۇيىمى تاراپىنان ءبىر پايىزدىق 2 ملن.تەڭگەگە دەيىن جەڭىلدەتىلگەن شاعىن نەسيە بەرىلۋدە. وسى ماقساتقا 100 ملن.تەڭگە قارجى بولىنگەن. بۇدان بولەك, بيىل رەسپۋبليكالىق بيۋدجەت ەسەبىنەن 1248 وتباسىن تۇرعىن ۇيمەن قامتاماسىز ەتۋ جوسپارلانىپ وتىر. ال وبلىستىق بيۋدجەتتەن حالىقتىڭ وسال توپتارىنا 44 تۇرعىن ءۇيدىڭ (2309 پاتەر) قۇرىلىسىنا 7,3 ملرد. تەڭگە ءبولىندى. ەربول سادىردىڭ مالىمدەۋىنشە, كوپبالالى وتباسىلاردى تۇرعىن ۇيمەن قامتاماسىز ەتۋ جۇمىستارى دەمەۋشىلەر ەسەبىنەن دە جۇرگىزىلۋدە. اعىمداعى جىلى دەمەۋشىلەر تاراپىنان 18 كوپبالالى وتباسى تۇرعىن ۇيمەن قامتىلىپ, 34,3 مىڭ كوپبالالى وتباسىعا 285 ملن. تەڭگەگە قارجىلاي جانە زاتتاي ماتەريالدىق كومەك كورسەتىلگەن.
تۇركىستان وبلىسى
