ايوۆا ۋنيۆەرسيتەتىمەن (The University of Iowa) بىرلەسە ۇيىمداستىرىلعان كۋرس بيىلعى جىلدىڭ 13-27 شىلدە ارالىعىندا اتالعان ۋنيۆەرسيتەتتە وتپەك. اعىلشىن ءتىلىنىڭ شەبەرلەرى مەن جازۋشىلىق قابىلەتى بار بالالاردىڭ باسىن قوساتىن وقۋ كۋرسىنا 15-18 جاستاعى 30 جاس ىرىكتەپ الىنعان.
– باعدارلاماعا قاتىسۋ ءۇشىن الدىمەن بايقاۋدا ءوز قابىلەتىڭدى دالەلدەي ءبىلۋ كەرەكسىڭ. ول ءۇشىن ءار ءتۇرلى تاقىرىپتا اعىلشىن تىلىندە ەسسە جازۋ جانە 6-8 بەتتەن تۇراتىن پروزا نەمەسە پوەزيا جازۋ تاپسىرمالارى بەرىلدى. تاريح پانىنە قىزىعۋشىلىعىم جوعارى بولعاندىقتان تاريحي وقيعا جەلىسىندەگى دراما جازۋدى ۇيعاردىم. «The Crimson Glow of Spring» اتتى شىعارمامدا رەسەي-فرانتسۋز سوعىسىندا اكە-شەشەسىنەن ايىرىلعان بالانىڭ تاعدىرىن سۋرەتتەدىم. ول سۋرەت سالۋدى ۇناتادى جانە وزگەلەردىڭ ايتقانىنا قاراماستان سۇيىكتى ىسىمەن اينالىسۋدى توقتاتپايدى, - دەيدى اسپارۋح بايقاۋ تاپسىرمالارى جايلى.
اسپارۋح اعىلشىن ءتىلىن ۇيرەنگەندى ەرەكشە جاقسى كورەدى. ويتكەنى, كوپتەگەن پايدالى دەرەكتەردى تۇپنۇسقادا مەڭگەرۋ ارقىلى ءبىرشاما مۇمكىندىكتەردى اشۋعا بولادى دەپ ەسەپتەيدى. جەڭىمپازىمىزدىڭ ءتىلدى مەڭگەرۋدەگى فۋندامەنتالدى بازاسىن كوتەرۋدە مەكتەبىمىزدەگى اعىلشىن ءتىلى ءپانى مۇعالىمى نۇرزادا ەرماگامبەتوۆا مەن شەت ءتىلى مۇعالىمى Jacob Labuschagne كوپ ەڭبەك سىڭىرگەندىگىن ايتا كەتكەن ءجون. زياتكەر بيىلعى جىلى IELTS ەمتيحانىنان 6,5 بالل جيناعان.
– باعدارلاما ماعان وتە پايدالى بولاتىنىنا سەنىمدىمىن. ويتكەنى اقش-قا ساپار ەستەن كەتپەس اسەر مەن ءتىل مەڭگەرۋگە تاماشا مۇمكىندىك سىيلايدى دەپ ۇمىتتەنەمىن. كۋرس بارىسىندا العان ءبىلىمىمدى شەت ەلدىك ۋنيۆەرسيتەتتەرگە ءبىلىم گرانتىنا ۇمىتكەر بولعاندا ماكسيمالدى تۇردە پايدالانامىن. اتالعان بايقاۋدا تەحنيكالىق تۇرعىدان كومەك بىلدىرگەن مەكتەبىمىزدەگى كاسىبي باعدار بەرۋ جونىندەگى كەڭەسشى ساۋلە الدابەرگەنوۆاعا, ءتىل مەڭگەرۋگە كومەك كورسەتكەن بارشا ۇستازدارىما العىس بىلدىرەمىن, دەيدى جاس قالامگەر.
ماڭعىستاۋ وبلىسى
