ايماقتار • 16 مامىر، 2019

قوستانايدا ىسكەر ايەلدەر پەرزەنتحانا اۋلاسىنا گۇل ەكتى

725 رەتكورسەتىلدى

وبلىستىق ىسكەر ايەلدەر قاۋىمداستىعىنىڭ مۇشەلەرى وبلىستىق پەرزەنتحانانىڭ اۋلاسىنا اعاش جانە گۇلدەر كوشەتىن وتىرعىزدى. بۇل اكتسيا حالىقارالىق وتباسى كۇنىنە ارناپ وتكىزىلدى.

ءومىردىڭ ءتۇرلى سالاسىندا بەلسەندى قىزمەت ەتىپ جۇرگەن ايەلدەر اكتسيالاردى ءجيى وتكىزەدى. وتباسىلىق قۇندىلىقتى دارىپتەۋ ءۇشىن، گۇلدەر مەن اعاش كوشەتىن وزدەرى الىپ كەلىپ، ونى وتىرعىزۋ جۇمىستارىنىڭ بارلىعىن اتقاردى.

«وتباسى – شاعىن مەملەكەت» دەگەن قاناتتى ءسوز بار. بۇل تەگىن ەمەس. وتباسى حالقىمىزدىڭ ەڭ قىمبات قۇندىلىعى دەپ سانايمىز. مەملەكەتتىڭ ءوزى وسى وتباسىلاردان قۇرالادى، ونىڭ ىرگەتاسى دەسەك بولادى. قازىر جاستار اراسىندا اجىراسۋ كورىنىسى بەلەڭ الىپ وتىر. سوندىقتان وتباسىلىق قۇندىلىقتى ناسيحاتتاۋ ماقساتىندا وسى اكتسيانى وتكىزۋدى ءجون كوردىك. بۇل پەرزەنتحانادا ايەلدەر باقىتتى سابيلەردى دۇنيەگە اكەلە بەرسىن، باقىتتى وتباسىلار قاتارى كوبەيسىن دەگەن جاقسى نيەتتەن تۋعان باستاما بولدى»، دەيدى وبلىستاعى ىسكەر ايەلدەر قاۋىمداستىعى ءتورايىمىنىڭ ورىنباسارى بالبوپە ەرتاەۆا.

اكتسياعا ىسكەر ايەلدەر قاۋىمداستىعىمەن قاتار ستۋدەنتتەر دە قاتىستى. اعاش، گۇل وتىرعىزىلعان ورىننىڭ كۇتىمىن ولار ءوز مىندەتىنە الدى. جىل سايىن كوكتەمدە وسى گۇلزاردا گۇل ەگەتىن بولادى. جاقسى باستاما جالعاسىن تابادى.

قوستاناي

سوڭعى جاڭالىقتار

باسىلىم باسشىلارى - ەركىن قىدىر (1962)

باسىلىم باسشىلارى • كەشە

ۇقساس جاڭالىقتار