اۋەلى «بالاساعۇن» ورتالىق كونتسەرت زالىندا جامبىل وبلىستىق مادەنيەت, ارxيۆتەر جانە قۇجاتتاما باسقارماسىنىڭ باسشىسى ءدۇيسەنالى بىقىباەۆ, مادەنيەت قايراتكەرى, ءانشى, دۇيسەنبەك ءومىراليەۆ, مادەنيەت قايراتكەرى, ءانشى ەربولات شالدىبەكوۆ, مادەنيەت قايراتكەرى, الىبەك ءامزە ۇلىنىڭ قاتىسۋىمەن ءباسپاسوز كونفەرەنتسياسى ۇيىمداستىرىلدى. بۇدان كەيىن كەنەن ازىرباەۆ اتىنداعى جامبىل وبلىستىق فيلارمونياسىنىڭ ديرەكتورى سەيتقاسىم تۇكتىباەۆقا كومپوزيتوردىڭ ۇلى باقىتجان كەنەن ۇلى « ۇلى دالا جىرشىسى» كىتابى مەن «كوڭىل كەپتەرى» اتتى مۋزىكالىق توپتامانى سىيعا تارتتى. ءىس-شارا اياسىندا كەنەن ازىرباەۆتىڭ شىعارماشىلىعى مەن ومىرىنە ارنالعان بۇرىشتىڭ تۇساۋى كەسىلدى. قاتىسۋشىلارعا باقىتجان كەنەن ۇلى مەن ءتورتكەن كەنەنقىزى ساتتىلىك تىلەپ, باتا بەردى. سونداي-اق كونكۋرس بارىسىندا اقىن-كومپوزيتوردىڭ ءومىرى مەن شىعارماشىلىعىنا ارنالعان «الاتاۋدىڭ اقيىعى» اتتى دەرەكتى فيلم كورسەتىلىپ, اقىننىڭ ۇرپاقتارىمەن كەزدەسۋ ءوتتى.
ەلىمىز عانا ەمەس, شەتەلدەردەن دە كەلگەن ونەرپازدار كەنەن اندەرىن ناقىشىنا كەلتىرە ورىنداپ, اۋليەاتا اسپانىن انگە بولەدى. قاسيەتتى قارا دومبىرانىڭ قۇلاق كۇيىن كەلتىرىپ, اسقاق اۋەندى اسپانداتقان ونەرپازدار كەنەننىڭ كوركەم كەڭىستىگىن جامبىل جۇرتشىلىعىنا تاعى دا ءبىر ايگىلەدى. ءناتيجەسىندە بايقاۋدىڭ باس ءجۇلدەسىن الماتى وبلىسىنان كەلگەن ساۋلە جۇمابايقىزى جەڭىپ الدى. سونىمەن قاتار ءبىرىنشى ورىندى جامبىل وبلىسىنان ماديار شالاباەۆ پەن تۇركىستان وبلىسىنان بالجان باعداۋلەتقىزى يەلەنسە, ەكىنشى ورىن قىزىلوردالىق بيسەنبەك تولەۋباەۆ پەن قاراعاندىلىق الۋا قالىمبەكوۆاعا بۇيىردى. ال قىتاي حالىق رەسپۋبليكاسىنان كەلگەن ونەرپازدار تاڭنۇر ءمانۋرا مەن سىمبات ەلتوق جۇلدەلى ءۇشىنشى ورىندى يەلەندى. الماتىلىق اقجول وسەرباي, كەنتاۋلىق ەلبول قۋانبەك, الماتىلىق ايدانا اسانباەۆا, نۇر-سۇلتان قالاسىنان تولعاناي كەڭەس, جامبىلدىق ەربوسىن قاسىمبەكوۆ, وزبەكستان رەسپۋبليكاسىنان بەك نۇريددين ۇلى جانە ەرداۋلەت جامبىلوۆ, تارازدىق ايگۇل ەسەكەەۆا سىندى ونەرپازدار بايقاۋ ديپلومانتتارى اتاندى. قالعان ونەرپازدار ارنايى العىس حاتتارمەن ماراپاتتالدى. بايقاۋ جەڭىمپازدارى مەن ءجۇلدەگەرلەرىنە قارجىلاي سىيلىقتار تابىس ەتىلدى.
جامبىل وبلىسى
