مەن دە ىشتە اڭگىمە-ءدۇكەن قۇرىسىپ, شاي ۇستىندە وتىرعاندارعا تەزىرەك قوسىلا كەتۋىم كەرەك ەدى. بىراق ەكى قولىنا ەكى شەلپەك ۇستاعان الگى كىشكەنتاي قىزدان كوزىمدى ايىرا الماي قاراپ تۇرىپ قالدىم. الگى قىز قولىنداعىسىمەن وڭ جاق ءبۇيىردەگى قاراما-قارسى كوپ قاباتتى ءۇيدىڭ الدىنا شەيىن بارىپ كەلدى. ول الاڭقايدا جان ادام جوق. شەلپەكتى قىز قاسىنداعى بىرگە ويناپ ءجۇرگەن ءۇش-ءتورت قۇربىسىن كۇتتىرىپ قويىپ, ەندى سول جاق ءبۇيىردەگى كوپ قاباتتى ءۇيدىڭ كولىكتەر سامساپ تۇرعان اسفالتتى الاڭقايىنا بارىپ, جان-جاعىنا قارايلاپ ءجۇر. ول جاقتا دا ەشكىم جوق ەكەنىن مەن كورىپ تۇرمىن. جاڭا پىسكەن شەلپەكتىڭ ءيىسى مۇرىن جاردى ما ەكەن, كىم ءبىلسىن, قولىنداعى ءبىر شەلپەكتىڭ شەتىنەن شىداماي ءبىر تىستەپ جەپ, كەلەسى ءۇي الدىنا قاراي بۇرىلىپ بارا جاتقان قىزدىڭ سوڭىنان ەندى ونى وشارىلا كۇتىپ, ورتاداعى ويىن الاڭقايىندا ءۇنسىز تەلمىرىپ تۇرعان دوستارى بىرگە ىلەستى. ءبىر-بىرىنە پاراللەل جانە قاراما-قارسى ورنالاستىرىلعان كوپ قاباتتى ءتورت تۇرعىن ۇيدەن تۇراتىن بۇل ورامنىڭ ورتاسى بيىك قاباتتاردىڭ بالكوندارىنان قاراعانعا الاقانداعىداي. ەكى جاپىراق قۇدايى ناندى تاراتاتىن ادام تاپپاي ءارى-ءسارى بولعان كىشكەنتاي قىزدى اياعانىم سونشا, سىلەكەيى شۇبىرىپ سوڭىندا جۇرگەن قاسىنداعى دوستارىڭا بەرە بەر دەپ ايتقىم كەلدى. ءوز ءۇيىم ەمەس, ونىڭ ۇستىنە جوعارى قاباتتان ايقايلاسام, داۋىسىم تاڭعى تىنىق اۋانى جارىپ, بۇكىل اۋلانى جاڭعىرتىپ, تانىمايتىن كورشى-قولاڭداردى ۇركىتىپ جۇرەرمىن دەپ ءبىر ۇيالدىم. سوندا دا جاقىنداۋ كەلسە ايتايىن دەپ بوگەلىڭكىرەپ ەم, الگى قىز قاسىنداعىلارعا ناننان ءۇزىپ بەرمەك تۇرسىن, قارايلاماي, اۆتوكولىكتەردىڭ جولىن كەسىپ ءوتىپ, كەلەسى ورامنىڭ تروتۋارىنا ءتۇسىپ كەتە باردى. ارتىنا, جان-جاعىنا اينالا بۇرىلىپ, ادام ىزدەپ بارادى. وبال-اي! ءيىس شىعارىپ, جەتى شەلپەكتى ءپىسىرۋىن ءپىسىرىپ, جۇمادا باسقالارىمىزدان بۇرىن ءوز ايەلدىك ىسىنە پىسىقتىعىن تانىتقان جاس كەلىنشەككە قانشا ريزا بولسام, ونىڭ جۇمساپ جىبەرگەن قىزىنا جانىم سونشا اشىدى. ويىن بالاسىنىڭ قانشا ۋاقىتى بوسقا كەتتى. ەكى شەلپەكتى تاراتاتىن ادام تاپپاي ارى-بەرى قانشا اۋرە بولدى. انە, ول قىز انااوووۋ, كوز ۇشىندا كىشكەنتاي نۇكتەگە اينالىپ الىستاپ كەتىپ بارادى. قاراعىشتاپ, اينالشىقتاپ جۇرگەن ونىڭ جولىندا ءالى ءبىر ۇلكەن ادام كەزىككەن جوق. شىداماي باعانا ءبىر تىستەپ العان جەرى كەرتىلىپ تۇرعان شىعار. بىراق «جەتى شەلپەكتىڭ» تىلسىم قاسيەتىن بىلەتىن كىشكەنتاي بالاپان قانشا جەپ قويعىسى كەلسە دە ءوزىن تىيىپ, ءتاتتى شەلپەكتى وزگەگە ۇلەستىرىپ, «قۇدايى قابىل بولسىن!» دەگەن تىلەكتى ەستۋ ءۇشىن ادام ىزدەپ كەتتى. اينالايىنىم-اي!..
ءۇمىت بيتەنوۆا,
قازاقستان جازۋشىلار وداعىنىڭ مۇشەسى
