ماسەلەن, بۇل جولعى ارنايى وپەراتسيا «جۋسان-2» دەپ اتالعان. ەلگە قايتارىلعانداردىڭ كوبى ايەلدەر مەن بالالار ەكەن. بالالاردىڭ بىرقاتارىنا قاقتىعىس ايماقتارىندا وق ءتيىپ, ەلگە اۋىر جاعدايدا جەتكىزىلگەن. ارناۋلى قىزمەت وكىلدەرىنىڭ ءبىرى بالانى كوتەرىپ كەلە جاتىپ: «اۋىرىپ جاتقان جوق پا؟» دەپ ءتىل قاتادى. ءسىرا, بالا اشىق جاراقاتتان قانسىراپ كەلە جاتسا كەرەك. سونداي-اق ءىس-شارا بارىسىندا حالىقارالىق تەرروريستىك ۇيىمداردىڭ 16 وكىلى دە قوسا جەتكىزىلگەن. الاگەۋىم ۋاقىتتا تۇسىرىلگەن (نە تاڭ, نە كەشكى ۋاقىتتاعى كادرلار ەكەنى ازىرگە ايتىلعان جوق) بەينەلەردەن كەيبىرىنىڭ اۆتوبۋستارعا بالداققا سۇيەنىپ كىرگەنى, ەندى ءبىرىنىڭ زەمبىلمەن جەتكىزىلگەنى اڭعارىلادى. ال جاڭاعى تەرروريستەرمەن بايلانىسى بار دەگەن ادامدارعا قاراڭعى كوزىلدىرىك كيگىزىلىپ, كىسەن تاعىلعانى دا بايقالىپ قالدى. بالالاردىڭ كوپشىلىگى ارنايى جاساق وكىلدەرىنىڭ قۇشاعىندا ءجۇر. سول ۋاقىتتا بالالارعا ويىنشىقتاردىڭ تاراتىلعانى كورىنىپ تۇردى.
تاعى ءبىر اتاپ وتەرلىگى, قۇتقارۋشىسىنىڭ ساۋالىنا قىسقا جاۋاپ بەرگەن, بەت-اۋزى تۇمشالانعان كەلىنشەك ءوزىنىڭ 23 جاستا ەكەندىگىن, قولىنداعى شاراناسىنىڭ ءۇشىنشى بالاسى, ال الدىڭعى ەكەۋى اكەسىمەن بىرگە راككا قالاسىندا اۋە شابۋىلى كەزىندە وپات بولعاندىعىن ايتىپ بەردى.
بەينەكادرلار بەتىندەگى تيترلەردە قازىر قۇتقارىلعان ايەلدەر مەن بالالاردىڭ ارنايى مامانداندىرىلعان كارانتيندىك ورتالىققا ورنالاستىرىلىپ, دارىگەرلەر مەن پسيحولوگتاردىڭ باقىلاۋىنا العانى كورسەتىلگەن.
سوڭىندا وكسىپ جىلاپ تۇرعان كەلىنشەك جانە تازا سۋدى قۇمارلانا ءىشىپ تۇرعان مەكتەپ جاسىنا جەتپەگەن ءبۇلدىرشىننىڭ اكە-شەشەڭ قايدا دەگەن ساۋالعا «ەشكىمىم جوق» دەگەن شىمىر جاۋابى بەرىلگەن.
جالپى, سيريادان قازاقستاندىقتاردى قايتارۋ وپەراتسياسى جالعاسا بەرەتىنى ءسوزسىز. بۇل ءبىزدىڭ ەلىمىزدىڭ الەمدىك جانە حالىقارالىق بەيبىتشىلىكتىڭ جاقتاۋشىسى عانا ەمەس, شەتەلدەردە قيىن-قىسپاقتا قالعان ءوز ازاماتتارىنىڭ تاعدىرىنا بەيجاي قاراي المايتىنىنىڭ دا كورىنىسى بولىپ وتىر.
