دومبىراشىلار امانگەلدى اۋدانىنداعى مەكتەپ وقۋشىلارىنان, اۋىل جاستارىنان, ۇستازداردان قۇرالدى. بەس-ون ەمەس, 500 دومبىرانىڭ قۇلاق كۇيىن كەلتىرىپ, تالاپتىلاردى ديريجەر تاياقشاسىنا باعىنۋعا ۇيرەتۋ وڭاي شارۋا ەمەس. وسى مىندەتتى امانگەلدى اۋدانىنىڭ پەرزەنتى, مادەنيەت سالاسىنىڭ ۇزدىگى ساپارعالي احمەتجانوۆ موينىنا الىپتى. مادەنيەت سالاسىندا حالىق شاعارماشىلىعى بويىنشا جارتى عاسىرعا جۋىق ەڭبەك ەتىپ كەلە جاتقان 73 جاستاعى ونەرپاز ساحنا جاۋاپكەرشىلىگىنە ادالدىق تانىتىپ, وسىندا ءوزى تۇراتىن نۇر-سۇلتان قالاسىنان ارنايى ءتورت-بەس رەت كەلىپتى.
– مەن «امانگەلدى اۋدانىنىڭ قۇرمەتتى ازاماتى» عانا ەمەسپىن, تۋعان جەرىمنىڭ پاتريوتىمىن. اۋىل بالالارىنىڭ بارلىعى دا دومبىرانى ەركىن تارتادى. ولار ويناعان كۇيدىڭ اسەرى دۋىلداتىپ, جۇرتتىڭ رۋحىن كوتەرىپ جىبەرگەن جوق پا, – دەيدى ساپارعالي اعا ۇشاتىن قىرانداي قومدانىپ.
ءبىر قىزىعى, اپپاق شاعالاداي بولىپ كيىنىپ, دومبىراسىن باپتاپ ۇستاپ وتىرعان كۇيشىلەردى فەستيۆالعا سىرتتان كەلگەن تۋريستەر اراسىنان «راسىندا, سانى 500 بە؟» دەپ, سىرتتاي ساناپ تا شىققاندار بولدى. ال امانگەلدى اۋدانىنىڭ اكىمى ءامىرحان اسانوۆ ەندى ساحناعا مىڭ دومبىراشى شىعارۋدى ويلاستىرىپ تا قويىپتى. ساپارعالي اعا اكىم باستاماسىن قۇپ الىپ, بىلەك سىبانىپ وتىر.
– شىلدە ايىندا «دومبىرا كۇنى» قۇرمەتىنە ساحناعا مىڭ كۇيشى شىعاتىن بولادى. ولاردىڭ بارلىعىن دا اۋىلداردان جينايمىز. اۋىلدا دومبىرا شەرتپەيتىن قازاق جوق, ولارعا ون شاقتى كۇي ءۇيرەتىپ, ساحناعا دايىنداۋ ءوز قولىمدا! – دەيدى ساپارعالي احمەتجانوۆ.
مىڭ امانگەلدىلىك ءبىر ساتتە ساحناعا شىققاندا بۇكىل قازاق دالاسىنا دومبىرا شاناعىنان كۇي شاشىلعانداي بولار, ءبالكىم.
قوستاناي وبلىسى,
امانگەلدى اۋدانى
