رۋحانيات • 12 مامىر، 2019

تاراز قالاسىندا «داڭق» زالى اشىلدى

902 رەت كورسەتىلدى

9 مامىر – ۇلى جەڭىستىڭ 74 جىلدىعى جامبىل وبلىسىندا جوعارى دەڭگەيدە اتالىپ ءوتتى. مەرەكەگە ارنالعان وبلىس ورتالىعىنداعى سالتاناتتى شارالار لەگى قالاداعى ەسكەرتكىشتەرگە گۇل شوقتارىن قويۋ راسىمىنەن باستاۋ الدى. ا.سۋحامباەۆ، ى.سۇلەيمەنوۆ، ز.كوسمودەميانسكايا، ت.تاستانديەۆ ەسكەرتكىشتەرىنە، ءال-فارابي كوشەسىندەگى وبەليسكىگە گۇل شوقتارىن قويۋ راسىمىنە وبلىس اكىمىنىڭ ورىنباسارلارىنان باستاپ، باسقارما، مەكەمە باسشىلارى، ارداگەرلەر كەڭەسىنىڭ توراعالارى، اسسامبلەيا حاتشىلىعىنىڭ، زيالى قاۋىم وكىلدەرى جانە تاعى باسقالار، بارلىعى 5 مىڭعا جۋىق ادام قاتىستى.

  بۇدان كەيىن «قاھارمان ۇلت-بەسسمەرتنىي پولك» شەرۋى ءوتتى. شەرۋگە قاتىسقان 2 مىڭنان اسا ادام ا.سۋحامباەۆ ەسكەرتكىشىنەن د.قوناەۆ – ءى.جانسۇگىروۆ كوشەلەرى ارقىلى جەڭىس ساياباعىنا دەيىن ءجۇرىپ ءوتتى. جەڭىستىڭ 74 جىلدىعىنا ارنالعان شەرۋگە كوپشىلىكپەن بىرگە وبلىس اكىمى اسقار مىرزاحمەتوۆ تا ارنايى قاتىستى. بۇدان سوڭ اكىم اسقار مىرزاحمەتوۆ،  وبلىستىق ءماسليحات حاتشىسى باعلان قاراشولاقوۆ، وبلىستىق ارداگەرلەر كەڭەسىنىڭ توراعاسى ەركىنبەك سولتىباەۆ جانە قازاقستان رەسپۋبليكاسى قارۋلى كۇشتەرىنىڭ قۇرلىق اسكەرلەرى باس قولباسشىسى، گەنەرال-مايور مارات قۇساينوۆتىڭ قاتىسۋىمەن «ماڭگىلىك الاۋ» جانە باۋىرجان مومىش ۇلى ەسكەرتكىشىنە سالتاناتتى گۇل قويۋ ءراسىمى  ءوتتى. ول «ەرلىك» مەموريالدى كەشەنىندەگى مەرەكەلىك شاراسىنا ۇلاستى. مەرەكەلىك شارا بارىسىندا قاتىسۋشىلار ۇلى وتان سوعىسى قۇرباندارىن، جەرلەس جاۋىنگەرلەردى ءبىر مينۋت ۇنسىزدىكپەن ەسكە الدى. وبلىس اكىمى جينالعانداردى جەڭىس مەرەكەسىمەن قۇتتىقتاپ، بەيبىت كۇننىڭ باعاسىن بىلۋگە شاقىردى.

  سونداي-اق، بۇل كۇنى جەڭىس ساياباعىنداعى «دانق» زالىنىڭ اشىلۋ سالتاناتى ءوتتى. «دانق» زالىنىڭ قۇرىلىسى ساياباقتىڭ وتكەن جىلى باستالعان جاڭعىرتۋ جۇمىستارىنىڭ جالعاسى بولىپ تابىلادى. جالپى اۋماعى 1500 شارشى مەتردى قۇرايتىن زال ەكى قاباتتان تۇرادى. قۇرىلىستى مەردىگەر «جاسىل ەل تاراز» جشس-گى جۇرگىزگەن. جوبا قۇنى – 546 ميلليون 769 مىڭ تەڭگەنى قۇرايدى. «دانق» زالىنىڭ ءبىرىنشى قاباتى ۇلى وتان سوعىسى جىلدارىن بەينەلەيتىن فوتوسۋرەتتەر مەن ەكسپوناتتارعا تولى. وندا 1000 شارشى مەترگە بارلىعى 1 ميلليون 500 مىڭنان  استام فوتوشەجىرەلەر توپتاستىرىلعان. زالدىڭ ءبىرىنشى بولىگىندە ورنالاسقان 1941، 1942، 1943، 1944 جانە 1945 جىلدارعا ارنالعان قابىرعالارداعى سۋرەتتەر سول كەزەڭدەگى سوعىس كورىنىستەرىن  ەرىكسىز كوز الدىڭا الىپ كەلەدى. اتاپ ايتساق، 1941-جىلعا ارنالعان قابىرعادا «باربوروسا» جوسپارىنىڭ كارتاسى، ماسكەۋ ءۇشىن شايقاسىنىڭ، گەنەرال-مايور ي.پانفيلوۆتىڭ، «وتان انا»، ب.مومىش ۇلىنىڭ، ن.بەلاشەۆتىڭ جانە باسقا دا بارلىعى 100-دەن استام فوتوسۋرەتتەر مەن 200-دەن اسا قۇجاتتار قويىلعان. ال، زالدىڭ 1942-جىلعا نەگىزدەلگەن قابىرعاسى  «لەنينگراد بلوكاداسىنا» ارنالعان. وندا جىر الىبى – جامبىل جاباەۆتىڭ سۋرەتى، اقىننىڭ «لەنينگرادتىق ورەنىم» اتتى وتتى ولەڭى جانە وزگە دە دۇنيەلەر ورىن العان. 1943-جىلعا ارنالعان قابىرعادا ستالينگراد، كۋرسك شايقاستارىنا ارنالعان ۇلكەن فوتولار جيناعى ورنالاسقان. سول سەكىلدى 1944-45 جىلدارعا ارنالعان قابىرعادا قىزىل اسكەردىڭ ەۆروپانى ازات ەتۋىن بەينەلەيتىن فوتولار جيناعى بەرىلگەن. سونداي-اق، زالدا «رەيحستاگقا تۋ تىگۋ» بارەلەفى قويىلىپ، تىلداعى ەڭبەككەرلەردىڭ ومىرىنەن سىر شەرتەتىن، 1945 جىلعى 24 ماۋسىمداعى ماسكەۋ قالاسىندا وتكەن جەڭىس شەرۋى جانە جەڭىستىڭ 70 جىلدىعىنا ارنالعان استانا قالاسىندا وتكەن سالتاناتتى شارانىڭ سۋرەتتەرى دە كورىنىس تاپقان. جەرگىلىكتى مايدانگەرلەردىڭ 500-گە جۋىق مەدالى دە زالدان ورىن العان. نىساننىڭ ەكىنشى قاباتىندا «باۋىرجانتانۋ» عىلىمي-زەرتتەۋ ورتالىعى ورنالاسقان. ورتالىقتا ب.مومىش ۇلىنىڭ بالالىق شاعىنان  كەمەڭگەرلىك جاسىنا دەيىنگى ءومىرىن بەينەلەيتىن  مۋزەي جانە كوركەمسۋرەت بۇرىشى قۇرىلعان. وندا نەگىزىنەن مايدانگەر-قالامگەردىڭ شىعارماشىلىق-تۇلعالىق بولمىسىن ايشىقتاۋعا باسىمدىق بەرىلگەن. ورتالىق ىشىندە باۋكەڭنىڭ شىعارماشىلىعىنا ارنالعان كىتاپحانالىق بۇرىش پەن جيىن وتكىزۋگە ارنالعان كونفەرەنتسيا زالى جاساقتالعان. سونىمەن قاتار، دەرەكتەر جيناقتايتىن ماماندارعا ارنالعان ءۇش قىزمەتتىك بولمە مەن ءبىر فوتولابوراتوريا قاراستىرىلعان.

  «دانق» زالىنىڭ لەنتاسىن قيۋ راسىمىنە داڭقتى باۋىرجان مومىش ۇلىنىڭ كەلىنى زەينەپ احمەتوۆا، قر مەملەكەتتىك سىيلىعىنىڭ يەگەرى، پروفەسسور،  مەكەمتاس مىرزاحمەت ۇلى، ۇلى وتان سوعىسىنىڭ ارداگەرى تىلەۋقابىل تورەبەكوۆ قاتىستى. سونداي-اق، وسىدان سوڭ ساياباقتا «سولدات بوتقاسى» اتتى شارا ءوتىپ، 500 ادامعا بوتقا تاراتىلدى. مەرەكەلىك شارالار سوڭى كونتسەرتتىك باعدارلاماعا ۇلاستى. ايتا كەتەيىك، بۇل كۇنگى ءىس-شارالارعا بارلىعى 11 مىڭنان اسا قالا تۇرعىندارى مەن قوناقتارى قاتىستى.

 جامبىل وبلىسى

سوڭعى جاڭالىقتار

ۇرلانعان 28 كولىك تابىلدى

وقيعا • بۇگىن، 15:11

اتىراۋدا 23 ادامدى شايان شاققان

ايماقتار • بۇگىن، 13:35

سپورت جاڭالىقتارىنا شولۋ

سپورت • بۇگىن، 09:11

سۋرەتشىلەر ءۇيى اشىلدى

ايماقتار • بۇگىن، 09:08

بال بۇلاق بولىپ اقتى

ايماقتار • بۇگىن، 09:07

وڭايلىقپەن ەم قونبايدى

مەديتسينا • بۇگىن، 09:05

بارەكەلدى، ۆيكتوريا!

سپورت • بۇگىن، 09:02

ۇقساس جاڭالىقتار