گۋرا-ۆىكۋلايدا كەڭەس وداعىنىڭ باتىرى قاناش قامزيننىڭ ەسكەركىشى ورناتىلماق

اقسۋ قالاسىندا  باتىرعا ارنالعان ەسكەرتكىش اشىلدى.

           مەكتەپتەگى داڭق مۋزەيىندە باتىردىڭ ومىرىنە, مايدانداعى جولىنا ارنالعان تاريحي قۇجاتتار, سۋرەتتەر ساقتالعان.

         قۇجاتتاردىڭ جانە ەستەلىك سۋرەتتەردى تۋعان ءىنىسى شورا مەن كەلىنى بيعايشا تاپسىرىپتى. مۋزەيدە قاناش اتامىزدىڭ ۇلكەن پورترەتى تۇر.

        1941 جىلى الماتىداعى قازاق پەداگوگيكالىق ينستيتۋتىن تامامداعانى تۋرالى اتتەستاتى, ستۋدەنتتىك شاعىنداعى ۇستازدارىمەن جانە دوستارىمەن بىرگە تۇسكەن فوتولارى قويىلىپتى.

         سونىمەن بىرگە,  مارقۇم جۋرناليست تولەۋبەك قوڭىردىڭ «الىستا قالعان اعا» اتتى  سارعايعان گازەت ماقالاسى بار. باتىردىڭ اكەسى قامزا سەكسەنباەۆتىڭ ءوز قولىمەن جاساپ, بالاسىنا بەرىپ كەتكەن ەسكى دومبىراسى ساقتالعان.

        1942 جىلى سوعىسقا اتتانعان قاناش قامزين 52-ءشى اتقىشتار ديۆيزياسىنىڭ 429-شى اتقىشتار پولكىنىڭ  كومانديرى بولعان.

          مولداۆيانى ازات ەتۋدە جانە دنەستر وزەنىنىڭ ماڭىندا بولعان شايقاستا ەرلىك كورسەتكەنى قۇجاتتاردا جازىلعان.

             1944 جىلدىڭ ءساۋىر ايىندا لەيتەنانت قامزيننىڭ روتاسى دنەستر وزەنىن ءوتىپ بارىپ, مولداۆيانىڭ تيراسپول اۋدانىنا قاراستى گۋرا-ۆىكۋلاي دەرەۆنياسى ماڭىنداعى شايقاستا ەرلىكپەن قازا تاۋىپ, سول جەردە جەرلەنگەن.

         1944 جىلى قىركۇيەك ايىندا كسرو جوعارعى كەڭەسى پرەزيديۋمىنىڭ وكىمىمەن كەڭەس وداعىنىڭ باتىرى اتاعى بەرىلەدى.

           ال, 1966 جىلى پاۆلودار وبلىستىق اتقارۋ كوميتەتىنىڭ شەشىمىمەن جولقۇدىق اۋىلىنا قاناش قامزين ەسىمى بەرىلەدى.

          بىراق, كەيىن  جولقۇدىق اۋىلىنىڭ اتاۋىنا قايتا ورالادى.

اۋىلدىق جەرلەستەرى ءالى كۇنگە دەيىن   بۇل «وزگەرىستىڭ»  سەبەبىن تۇسىنە المايدى.

         قازىر  جولقۇدىقتاعى قاناش قامزين اتىنداعى مەكتەپتە باتىردىڭ تۋعانىنا 100 جىل تولۋىنا وراي شارالار باستالعان.

       8-ءشى سىنىپ وقۋشىسى ميراس مەدەۋ باتىر اتاسى تۋرالى عىلىمي جوبا جازۋدا.

        سونداي-اق, 2015 جىلى مولداۆيانىڭ گۋرا-ۆىكۋلاي دەرەۆنياسىنا  بارعان جەرلەستەرى باتىردىڭ زيراتىنان الىپ كەلگەن ءبىر ۋىس توپىراعى ارنايى ىدىستا ساقتاۋلى تۇر.

            گۋرا-ۆىكۋلاي دەرەۆنياسىنا  1974 جىلى ءىنىسى شورا قامزين,ودان كەيىن قاناش قامزين اتىنداعى مەكتەپ وقۋشىلارى مەن ۇستازدارى بارىپ قايتقان.

           الدىڭعى جىلى  اقسۋ قالالىق ارداگەرلەر كەڭەسىنىڭ توراعاسى زالمۇحان ارىن باستاعان دەلەگاتسيا بارىپ, باتىردىڭ باسىنا زيارات جاساپ كەلدى.

        جەرلەستەرى مارقۇمنىڭ ارۋاعىنا قۇران باعىشتاپ وقىتىپ, اس بەرگەن.

      جولقۇدىقتان الىپ بارعان ءبىر ۋىس  توپىراقتى  باتىردىڭ بەيىتىنە سەۋىپ, باسىنا 10 ءتۇپ الما اعاشىن وتىرعىزادى.

          گۋرا-ۆىكۋلاي دەرەۆنياسىنىڭ ءبىر كوشەسىنە قاناش قامزيننىڭ اتى بەرىلىپ, مۋزەي اشىلعان.

           بيىل  گۋرا-ۆىكۋلايدا قاناش قامزيننىڭ  ەسكەرتكىش اشىلىپ, تۋىستارى, جەرلەستەرى ارنايى بارىپ قاتىسادى دەپ جوسپارلانۋدا.

پاۆلودار وبلىسى,

جولقۇدىق اۋىلى