جەڭىستى چەحوسلوۆاكيادا قارسى الادى, كەڭەس اسكەرىندە قىزمەت ەتىپ, ەلگە 1950-ءشى جىلى ورالادى. سوعىستا جۇرگەندە 62 رەت پاراشيۋتپەن سەكىرەدى. ەلگە ورالعان سوڭ قاسىمحان اعا الدىمەن مەكتەپتە ۇستازدىق ەتەدى, ودان كەيىنگى جىلدارى ءومىرىن تۇتاس جۋرناليستيكاعا ارنايدى. سونىمەن قاتار, قاسىمحان اعايدى قوستانايلىقتار ايتىس اقىنى رەتىندە دە جاقسى بىلەدى. ول سوناۋ 50-ءشى جىلداردان باستاپ وسى بەكزات ونەردىڭ قوستاناي وڭىرىندە دامۋىنا ۇلەس قوستى. رەسپۋبليكالىق ايتىستارعا دا قاتىستى.
قازىر قارتتىعىنا قاراماستان قاسىمحان اعاي تىڭ, دەنساۋلىعىنىڭ ارقاسىندا بالالارىنىڭ, نەمەرە-شوبەرەلەرىنىڭ اراسىندا ءجۇرىپ جاتىر. ول جىل سايىن مەرەكەدە جەڭىس ساياباعىنا كەلىپ, وسى كۇنگە, ەلىمىزدىڭ تاۋەلسىزدىگىنە جەتە الماعان مايدانداستارىنىڭ, بوزداقتاردىڭ رۋحىنا ارناپ, گۇل شوعىن قويادى. ساياباقتىڭ ىشىندەگى كوگالدا وتىرىپ, سولدات بوتقاسىنان ءداماۋىز تاتىپ, وتكەن كۇندەردى ەسكە الادى, بالالارىنا اڭگىمەلەيدى.
بيىل قاسىمحان اعا قوستاناي قالاسىنىڭ اكىمى قايرات احمەتوۆپەن بىرگە تاعى دا ماڭگىلىك وت باسىنا گۇل سەبەتىن قويىپ,ەرلىككە تاعزىم ەتتى.
«بۇل اسا قاسيەتتى كۇن. الاپات سوعىس قانشا ادامنىڭ ءومىرىن جۇتتى, قانشا بالا جەتىم قالدى, انا جەسىر قالدى. سونداي اۋىر كۇندەردى باستان كەشتىك. جەڭىس بولماعاندا ەلدىڭ كۇنى نە بولار ەدى دەپ ويلايمىن قازىر. مىنە, بۇگىن مامىراجاي زامان, ءبارى دە بار. بەيبىت ەلدە بارىنە دە شۇكىرشىلىك ايتۋ كەرەك» دەيدى قارت مايدانگەر.
جاسى ءجۇزدى شامالاپ قالعان قاسىمحان اعا جەڭىس مەرەكەسى كۇنى ساياباقتاعى ماڭگىلىك وت باسىنا كەلگەن ساۋساقپەن سانارلىق ارداگەردىڭ ءبىرى بولدى. بۇگىندە قوستاناي قالاسىندا 50 سوعىس ارداگەرى عانا تۇرادى, وبلىس وڭىرىندە 113 مايدانگەر قالدى. ولاردىڭ باسىم كوپشىلىگى جاسى كەلگەندىكتەن, اۋرۋدان ۇيدەن شىعا الماي, وتىرىپ قالعان قاريالار. ولارعا جەرگىلىكتى اتقارۋ ورگاندارى تاراپىنان قۇرمەت كورسەتىلدى.
