ورتا ازيا بىرىنشىلىگىنەن كەم تۇسپەگەن تۋرنير كورىگىن گرۋزيا, وزبەكستان, تاجىكستان, تۇركىمەنستان, قىرعىزستان مەملەكەتتەرىنەن ارنايى ات ارىلتىپ كەلگەن بىلعارى قولعاپ شەبەرلەرى قىزدىردى. قازاقستان بوكس قۇراما كومانداسى مۇشەلەرىن قوسقاندا, 80-نەن استام بوكسشى 10 سالماق دارەجەسىندە ءوزارا مىقتىلاردى انىقتادى.
اقتىق سىندا 49 كەلى سالماق دارەجەسىندە مۇحامەدسابىر بازارباي ۇلى بەكزات امانگەلدينوۆتان ايلاسىن اسىرسا, 52 كەلىدە بەيبارىس پەرنەبەك تالعات سىرىنبەتوۆكە جول بەردى. ال, 56 كەلىدە ونەر كورسەتكەن بەيبارىس جەكسەن اسحات تاستانبەكتەن باسىمدىعىن انىق بايقاتتى. 60 كەلى سالماق دارەجەسىندەگى تارتىستى كەزدەسۋدە ايتجان ءاشىرحان وزبەك بوكسشىسى راحماتوللا توشپۋلاتوۆتىڭ جولىن كەستى. الايدا, 64 كەلىدە شارشى الاڭعا شىققان دارحان دۇيسەباي وزبەكستاندىق جاۆلونبەك يۋلداشوۆتان اسا المادى. دەگەنمەن, ونىڭ كورشىدە كەتكەن ەسەسىن 75 كەلىدەگى ەراسىل جاكپەكوۆ قايتاردى دەسەك تە بولادى. ول وزبەكستان مىقتىسى كوميلجان يۋسۋپوۆتى ەكىنشى راۋندتا-اق نوكاۋتپەن جەڭىسكە جەتتى. 69 كەلىدە مارعۇلان ايدار ۇلى قارسىلاسى ءمادي التىنبەكوۆتى التىننان ايىردى. 81 كەلىگە دەيىنگى جارتىلاي اۋىر سالماق قۋاندىق ماقسۇت ۇپاي سانىمەن جەڭىمپاز اتاندى. الايدا, قازاقستان قۇراما كومانداسىنىڭ مۇشەسىنە توتەپ بەرگەن باقداۋلەت قۇرالدىڭ جۇدىرىقتاسۋ ءتاسىلى جۇرتتى ءسۇيسىندىردى. تۇركىستان وبلىسىنىڭ اتىنان سىنعا تۇسكەن سپورتشىنىڭ كاسىبي بوكسشىداي سوققى العان سايىن كۇشەيىپ, قارسىلاسىن اۋىر سوققىلارىمەن كەرى شەگىنۋگە ءماجبۇر ەتكەن قايسارلىعى جانكۇيەرلەردى ءتانتى ەتتى. 91 كەلىدە ساعىندىق توعامباي نۇرماعامەد يۋسۋپوۆتى جەڭدى. ال اسا اۋىر (91+) سالماقتا امانات سابىرعالي گەورگي اكۋشەۆتىڭ جەڭىمپاز اتانۋىنا مۇمكىندىك بەرمەدى.
– بۇعان دەيىن بۇل تۋرنير جاسوسپىرىمدەر, كادەتتەر اراسىندا وتكىزىلگەن. ەندى جاستار اراسىندا ۇيىمداستىرىلىپ, جىلدان جىلعا جارىستىڭ مارتەبەسى ارتىپ كەلەدى. ونىڭ ايقىن دالەلى رەتىندە مىقتى بوكسشىلاردىڭ شارشى الاڭدا ونەر كورسەتۋىن ايتۋعا بولادى. التى ەلدىڭ ءبىرىنشى ءنومىرلى بوكسشىلارى سىنعا ءتۇستى. وسىنداي جوعارى دارەجەدە ۇيىمداستىرۋعا ەڭبەك سىڭىرگەن بوكستان جاستار اراسىندا قازاقستان قۇراماسىنىڭ اعا جاتتىقتىرۋشىسى قايرات ءساتجانوۆ جالعاسىن تاباتىن ءتۋرنيردىڭ كەلەسى جەڭىمپازدارىنا سپورت شەبەرى اتاعىن بەرۋدى جوسپارلاپ وتىرعانىن جەتكىزدى. مۇنداي ارەكەتتىڭ شەتەلدىك سپورتشىلاردىڭ دا قىزىعۋشىلىقتارىن ارتتىرىپ, بوكسشىلارىمىزدىڭ دەڭگەيىن وسىرەتىنى ءسوزسىز. ازىرگە بۇل تۋرنير موڭعوليادا وتەتىن ازيا چەمپيوناتىنا دايىندىق, – دەيدى قازاقستان كوكپار فەدەراتسياسىنىڭ پرەزيدەنتى, داڭقتى بوكسشى مۇحتارحان دىلدابەكوۆ.
شىمكەنت
