وندا ءۇش ماسەلە قارالدى. سونىڭ ىشىندە قازاقستان مەن ليتۆا اراسىندا باس بوستاندىعىنان ايىرىلعان ادامداردى جانە مەديتسينالىق سيپاتتاعى ماجبۇرلەۋ شارالارى قولدانىلعان ادامداردى بەرۋ جانە قايتارۋ تۋرالى شارتتى راتيفيكاتسيالاۋ تۋرالى زاڭ جوباسى قارالدى. زاڭ جوباسى تۋرالى نەگىزگى باياندامانى باس پروكۋروردىڭ ورىنباسارى مارات احمەتجانوۆ جاسادى.
بۇل شارت سوتتىڭ شەشىمىمەن باس بوستاندىعىنان ايىرىلعان جانە مەديتسينالىق ماجبۇرلەۋ شارالارى قولدانىلاتىن ادامداردى بەرۋ تۋرالى. شارتقا 2018 جىلعى 24 ساۋىردە ۆيلنيۋس قالاسىندا قول قويىلعان. وسى قۇجاتقا سايكەس ليتۆا سوتى قازاقستان ازاماتىن باس بوستاندىعىنان ايىرسا نەمەسە ماجبۇرلەپ ەمدەۋ جازاسىن بەلگىلەسە ونىڭ جازاسىن وتەۋى ءۇشىن ەلىمىزگە قايتارا الامىز. قازاقستاندا سوتتالعان ليتۆا ازاماتتارى دا وسى تارتىپپەن قايتارىلادى. شارتتىڭ تالابى بويىنشا جازاسىن وتەۋگە بەرىلۋى ءۇشىن سوتتالعان ادامنىڭ نەمەسە ونىڭ زاڭدى وكىلىنىڭ كەلىسىمى كەرەك. سونىمەن بىرگە ەكى ەل دە سوتتالعان ازاماتتىڭ ءىس-ارەكەتىن قىلمىس دەپ تانۋى كەرەك. سونداي-اق شارتتا سوتتالعانداردىڭ بەرىلمەۋ ءتارتىبى دە قاراستىرىلعان. ەگەر سوتتالعانداردى قايتارۋ ەلدىڭ ەگەمەندىگىنە, قوعامدىق تارتىپكە نۇقسان كەلتىرەتىن بولسا, ۇلتتىق زاڭناما مەن مەملەكەت مۇددەسىنە قايشى بولسا, سونداي-اق سوتتالعان ادام كەلتىرگەن زالالىن وتەمەگەن بولسا, وندا سوتتالۋشى بەرىلمەيدى. وسىنداي كەلىسىمدەرگە قازاقستان بۇرىن 18 ەلمەن قول قويعان. بىراق ليتۆا ەلىمەن جاسالعان مىنا كەلىسىمنىڭ ءبىر ەرەكشەلىگى بار. مۇندا ليتۆا تاراپىنىڭ ۇسىنىسىمەن سوت- مەديتسينالىق ماجبۇرلەۋ شارالارىن بەلگىلەگەن ازاماتتار دا قايتارىلادى.
جالپى كەلىسىم ءۇش حالىقارالىق كونۆەنتسيا شەڭبەرىندە جاسالعان. بايانداما اياقتالعان سوڭ سۇراق بەرۋ ءراسىمى باستالىپ, دەپۋتات ب.جىلقىشيەۆ ليتۆامەن جاسالعان شارتتا عانا مەديتسينالىق سيپاتتاعى ماجبۇرلەۋ شارالارى بەلگىلەنگەن ادامداردى بەرۋ جانە قايتارۋعا كەلىسىلدى, باسقالاردا ول نەگە جوق دەگەن سۇراق قويدى. وعان حالىقارالىق كونۆەنتسياعا سايكەس مەديتسينالىق ماجبۇرلەۋ شارالارى بەلگىلەنگەن ادامداردى بۇرىن دا قايتارۋعا بولاتىن. سوندىقتان ءبىز ونى بۇرىن ناقتى كورسەتپەگەن ەدىك. ال ليتۆا تاراپى وسىنداي ۇسىنىس جاساعان سوڭ ونى كەلىسىمگە ەنگىزدىك دەپ جاۋاپ بەردى م.احمەتجانوۆ.
دەپۋتات قۇدايبەرگەن ەرجان: قايتارۋ تۋرالى ءوتىنىشتى قىلمىسكەردىڭ جۇبايى بەرە الادى دەلىنگەن. ال ءبىزدىڭ قىلمىستىق كودەكستە سۇراۋ سالۋدى جاساۋ قۇقى سوتتالعان ادامداردىڭ جاقىن تۋىستارىنا بەرىلگەن. ال جۇبايلار مەن زايىپتار جاقىن تۋىستار قاتارىنا ەنبەيدى. سوندا قىلمىسكەردىڭ جۇبايلارى قانداي زاڭعا سۇيەنىپ سۇراۋ جاساي الادى دەپ سۇرادى دەپۋتات. وعان راتيفيكاتسيالانۋدان وتكەن حالىقارالىق شارتتاردىڭ دارەجەسى ءبىزدىڭ ۇلتتىق زاڭنامامىزدان جوعارى. سوندىقتان حالىقارالىق شارتتارعا سۇيەنىپ قىلمىسكەردىڭ جۇبايى سۇراۋ سالا الادى دەپ جاۋاپ بەرىلدى.
دەپۋتات گەننادي شيپوۆسكيح بەرۋ مەن قايتارۋ تۋرالى كەلىسىمگە قول قويىلسا دا قايتارىلماعان سوتتالۋشىلار بار-جوعىن سۇرادى. وعان ءبىزدىڭ ەلىمىزدىڭ مۇددەسىنە نۇقسان كەلتىرىلىپ, وتەلمەگەن شىعىندارى بولسا, ونداي سوتتالۋشىلار قايتارىلمايدى, دەگەن باس پروكۋروردىڭ ورىنباسارى بيىل عانا ەكى رەسەي جانە ءبىر قىرعىزستان ازاماتىن قايتارۋدان باس تارتىلعانىن ايتتى. ويتكەنى ولاردىڭ كەلتىرگەن شىعىندارى وتەلمەگەن ەكەن.
زاڭ جوباسى بويىنشا قوسىمشا باياندامانى دەپۋتات اسىلبەك سماعۇلوۆ جاساپ, زاڭ جوباسىن قولداۋ جونىندە ۇسىنىس ءتۇسىردى. شاعىن تالقىلاۋدان كەيىن زاڭ جوباسى ماقۇلدانىپ, سەناتتىڭ قاراۋىنا جىبەرىلدى.
بۇدان باسقا كەزەكتى جالپى وتىرىستا ءماجىلىس قارجى نارىعىن رەتتەۋ مەن دامىتۋ جانە ميكروقارجىلىق قىزمەت ماسەلەلەرىن, سونىمەن بىرگە, جۇمىلدىرۋ دايىندىعى مەن جۇمىلدىرۋ ماسەلەلەرى بويىنشا تۇزەتۋلەرگە قاتىستى زاڭ جوبالارىن جۇمىسقا قابىلداپ, ولار تۋرالى قورىتىندى ازىرلەۋ مەرزىمدەرىن بەلگىلەدى. كۇن تارتىبىندەگى ماسەلەلەر قارالىپ بولعان سوڭ ءماجىلىس دەپۋتاتتارى ب.سماعۇل, ك.مۇسىرمان, ز.امانجولوۆا, ر.كيم, ن.التاەۆ قۇزىرلى مەملەكەتتىك ورگاندارعا دەپۋتاتتىق ساۋالدار جولدادى.
