– وسى بەس الەۋمەتتىك باستاما ومىرگە جولداما العالى پارتيانىڭ وبلىستىق فيليالى قوعامدىق كەڭەستىڭ التى وتىرىسىن وتكىزدى. ەندى تۇرعىن ءۇي باعدارلاماسىنىڭ اتقارىلۋ بارىسى جايلى اڭگىمە بولاتىن ءماجىلىستى قۇرىلىس الاڭىندا وتكىزۋدى ءجون كوردىك, – دەدى Nur Otan پارتياسى وبلىستىق فيليالى توراعاسىنىڭ ءبىرىنشى ورىنباسارى جاڭاباي بيسەمباەۆ.
قوستاناي وبلىسىندا «7-20-25» تۇرعىن ءۇي باعدارلاماسى بويىنشا تۇرعىنداردان 453 ءوتىنىش بەرىلگەن. ونىڭ ىشىندە 2 ميلليارد 347 ميلليون تەڭگە تۇراتىن 306 ءوتىنىش ماقۇلدانعان. بۇل كورسەتكىشتەر بويىنشا قوستاناي وبلىسى ەلىمىزدە 7-ءشى ورىندا تۇر. بىلتىر تۇرعىندارعا اتالعان باعدارلاما بويىنشا يپوتەكانى تەك ءبىر بانك بەرسە, بيىل بۇل ىسكە ەكىنشى دەڭگەيلى تاعى التى بانك قوسىلىپ وتىر. جىل اياعىنا دەيىن جەكەمەنشىك قۇرىلىس كومپانيالارى سالعان ۇيلەردەن تاعى دا 368 پاتەر «7-20-25» باعدارلاماسى بويىنشا ساتىلۋ ءۇشىن وسى بانكتەرگە بەرىلەدى. سوندا جىل اياعىنا دەيىن ەلباسىنىڭ الەۋمەتتىك باستاماسى بويىنشا 600 قوستانايلىق قونىس تويىن تويلايتىن بولادى.
وتكەن جىلى وبلىستا باعدارلاما بويىنشا 343 پاتەر يەسىن تابادى دەپ جوسپارلانعان ەدى. ءبىراق بۇل جۇزەگە اسقان جوق. وعان قۇرىلىسشىلار دا, جەرگىلىكتى اتقارۋ ورگاندارى دا كىنالى ەمەس, باسپانالى بولعىسى كەلگەن تۇرعىنداردىڭ قارىزدى وتەۋ الەۋەتىنىڭ السىزدىگى سەبەپ بولعان ەدى.
– تۇرعىندار بانكتەرگە ءوتىنىش بەرگەنىمەن, وزدەرىنىڭ نەسيە تولەمىنە الەۋەتى جەتەتىنىن دالەلدەي المايدى, انىعىن ايتقاندا, قارجىسى از بولادى. ولار وسى باعدارلامانى جاساۋشىنىڭ ءبىرى رەتىندە بىزدەن «تاعى دا جەڭىلدىك بولا ما؟» دەگەن سۇراقتار قويادى. وعان جاۋاپ بەرۋگە مۇرسات جوق, وسى باعدارلامانىڭ ءوزى ۇلكەن جەڭىلدىك ەكەنىن ايتامىز, – دەيدى ۇلتتىق بانكتىڭ وبلىستىق فيليالى قارجىلىق باقىلاۋدى ۇيىمداستىرۋ جانە قارجى قىزمەتىن كورسەتۋدە تۇتىنۋشىلار قۇقىن قورعاۋ ءبولىمىنىڭ باستىعى اسەت قۋانىشباەۆ. باعدارلامانى جۇزەگە اسىرۋعا ەكىنشى دەڭگەيلى بانكتەردىڭ قوسىلۋىنا وراي, ساتىلاتىن پاتەرلەر سانى دا كوبەيتىلدى. قوستاناي قالاسىندا بوي كوتەرگەن جاڭا «يۋبيلەينىي» شاعىن تۇرعىن اۋدانىندا جىل اياعىنا دەيىن ءۇش كوپقاباتتى تۇرعىن ءۇي پايدالانۋعا بەرىلەدى. وبلىستاعى بەلگىلى قۇرىلىس كومپانياسىنىڭ وكىلى ميحايل فەدياشيننىڭ ايتۋىنشا, اتالعان مەملەكەتتىك تۇرعىن ءۇي باعدارلاماسى الەۋەتتى ساتىپ الۋشىلار قاتارىن كوبەيتكەن. ياعني, تۇرعىندار عانا ەمەس, بيزنەس سالاسى دا ۇتىپ وتىر.
وبلىستا «7-20-25» باعدارلاماسىنا قاتىسقان بانكتەر اراسىندا «تسەنتركرەديت بانكتىڭ» وبلىستاعى فيليالى الدىڭعى ورىندا كەلەدى. بانك تۇرعىنداردان 195 ءوتىنىش قابىلداپ, ونىڭ 169 ءوتىنىشىن ماقۇلداعان. ال ۇلتتىق بانك اقپاراتىنا قاراعاندا, ەلىمىزدە «7-20-25» باعدارلاماسىن جۇزەگە اسىرۋ اياسىندا تۇرعىنداردان 12000 ءوتىنىش قابىلدانىپ, ونىڭ ىشىندە 83 ميلليارد تەڭگەنى قۇرايتىن 7 مىڭنان استامى ماقۇلدانعان.
قوستاناي
