بۇگىندە 255 ەلدى مەكەنگە ورتالىقتاندىرىلعان سۋ قۇبىرلارى تارتىلماعان. ياعني, اۋىلدىقتاردىڭ بەستەن ءبىرى ءالى ساپالى اۋىز سۋعا ءزارۋ. اكىمدىكتىڭ وتىرىسىندا ەسەپ بەرگەن ەنەرگەتيكا جانە تۇكش باسقارماسىنىڭ باسشىسى ادىلبەك اۋباكىروۆ 2011-2018 جىلدار ارالىعىندا 1,9 مىڭ شاقىرىم قۇبىر تارتىلىپ, 56 ەلدى مەكەن قامتىلعانىن باياندادى. بيىل بۇل سالاعا 9,1 ميلليارد تەڭگە ءبولىنىپ,32 ەلدى مەكەنگە سۋ قۇبىرى تارتىلادى.
الايدا, قاراجات قوماقتى بولعانىمەن, يگەرىلۋى كوڭىل كونشىتپەيتىنىن ايماق باسشىسى قۇمار اقساقالوۆ اتاپ كورسەتتى. قاجەتتى جوبالىق-سمەتالىق قۇجاتتار باياۋ ازىرلەنەدى, ساراپتامالار ۋاقىتىلى جۇرگىزىلمەيدى. 5 اۋدان عانا جوبالىق-سمەتالىق قۇجاتتاردى ۇسىنعان.
«كورسەتكىش كوڭىل كونشىتپەيدى. جۇمىس قارقىنى تومەن. اۋدان اكىمدەرى جوعارى جاۋاپكەرشىلىك تانىتۋى ءتيىس. سونداي-اق قولدانىستاعى سۋ تاراتۋ نىساندارىن سەنىمدى باسقارۋعا بەرۋ جايى دا ءتيىستى دەڭگەيدە اتقارىلماي كەلەدى. 175 نىساننىڭ تەك 92-ءسى عانا كاسىپكەرلەردىڭ قاراماعىنا بەرىلگەن», دەدى قۇمار ىرگەباي ۇلى.
جيىندا «قىزىلجار سۋ» جانە «پەتروپاۆل جىلۋ جەلىلەرى» سەرىكتەستىكتەرىنىڭ جاۋاپسىزدىعى دا اتاپ كورسەتىلدى. بۇل كاسىپورىندار جاڭادان اسفالت توسەلگەن جەرلەردى قايتا قازىپ, قۇبىرلاردى الماستىرۋدى ءتيىستى ورىندارمەن كەلىسپەستەن اتقاراتىن كورىنەدى. قازعان جەرلەردى قالىپقا كەلتىرمەۋ دە ادەتكە اينالىپ كەتكەن.
ق. اقساقالوۆ وسىنداي ولقىلىقتار قايتالاناتىن بولسا, مونوپوليستەردى جازالاپ, ايىپپۇل سالۋ كەرەكتىگىن قاتاڭ ەسكەرتتى.
سولتۇستىك قازاقستان وبلىسى
