«رۋحاني جاڭعىرۋ» باعدارلاماسى اياسىندا قولعا الىنىپ, كەڭ-بايتاق قازاق جەرىنىڭ ادەبي مۇراسىن زەرتتەپ, جارىققا شىعارۋدى دىتتەيتىن جاڭا جوبانىڭ ماقساتى جايلى قالامگەرلەر ومىرزاق مۇقاي مەن ارمان المەنبەت جان-جاقتى بايانداپ بەردى.
«ادامزات بالاسىنىڭ تاقىمى العاش اتقا تيگەن ايىرتاۋ اۋدانىن ارالادىق. تۇنىپ تۇرعان تاريح ەكەن! شوقاننىڭ قيالىنا قانات بىتىرگەن ءبىر سىرىمبەتتىڭ وزىنەن كوپتەگەن ماعلۇماتتار الدىق. اۋزى دۋالى اقساقالدارمەن, جالىندى جاستارمەن اڭگىمەلەستىك. «ادەبي ولكەتانۋ» جوباسى اياسىندا جارىق كورەتىن باسىلىمعا وسىنداي سۇيەكتى تاقىرىپتار قامتىلادى», دەدى «پاراسات» جۋرنالىنىڭ باس رەداكتورى, جازۋشى ومىرزاق مۇقاي.
جاڭا بۋىن قالامگەرلەرىنىڭ وكىلى ارمان المانبەت ەلدىڭ شەتىندە, جەلدىڭ وتىندە تۇرعان, قازاعىنان قوناعى باسىم وڭىردە ءتىل, ءدىل ماسەلەلەرىنە قاتىستى وي قوزعادى. جازۋشىلار وداعىنىڭ جاڭا جوباسى تۋرالى ەستىپ, تەرىسكەيگە ادەيى سۇرانىپتى. ماعجان, ءسابيت, عابيتتىڭ ءىزى قالعان سۇرلەۋمەن ءجۇرىپ, كوپ نارسەگە قانىعىپتى. ساپار بارىسىندا ماعجاننىڭ تۋعان اۋىلىنا بارىپ, مۇراجايىنداعى قۇندى جادىگەرلەرمەن تانىسىپتى. ول شىعارماشىلىققا ارقاۋ بولار دەرەكتەردىڭ جەتكىلىكتى ەكەنىن ايتتى.
كەزدەسۋگە قاتىسقان «پاميات» قوعامدىق قورىنىڭ توراعاسى بولات ساعىندىقوۆ, ارداگەرلەر كەڭەسى توراعاسىنىڭ ورىنباسارى جانگەلدى ءتاجين, ولكەتانۋشى احمەتجان قۋانتاەۆ قىزىلجار ءوڭىرىنىڭ قاسيەتى تۋرالى وي تولعاپ, قالامگەرلەرگە وزدەرىن مازالاعان ساۋالدارىن جولدادى.
سولتۇستىك قازاقستان وبلىسى
