ۇلى وتان سوعىسىنىڭ ارداگەرى ءابجاپپار دايراباي ۇلى 1927 جىلى 1 قاڭتاردا سىر بويىنداعى تارتوعايدا دۇنيەگە كەلگەن. 1943 جىلى مايدانعا الىنىپ, بەلارۋس, ۋكراينادا, پولشانى ازات ەتۋگە قاتىسقان. « ۇلى وتان سوعىسى» وردەنىمەن, «ەرەن ەڭبەگى ءۇشىن» مەدالىمەن ماراپاتتالعان. ەلگە ورالعاننان سوڭ ۇستازدىق ەتكەن. ارداگەر 3 قىز بەن 2 ۇلدان 6 نەمەرە تاربيەلەپ وتىر. ءابجاپپار دايراباي ۇلىن مەرەكەمەن قۇتتىقتاپ, حال-احۋالىن بىلگەن وبلىس اكىمى ۇلى وتان سوعىس ارداگەرى نەمەت ابدراسيلوۆتىڭ شاڭىراعىندا بولدى. نەمەت قاريا 1922 جىلى 1 قاڭتاردا تۇركىستان قالاسىندا دۇنيەگە كەلىپ, سوعىس جىلدارى 1-گۆارديالىق ارتيللەريالىق ديۆيزيا قۇرامىندا نىساناشى, زەڭبىرەك كومانديرى بولعان. ۋكراينا, بەلورۋسسيا مايداندارى مەن ستالينگراد, كۋرسك شايقاستارىنا قاتىسقان. ءى دارەجەلى «وتان», ءىى جانە ءىىى دارەجەلى «داڭق» وردەندەرىمەن, ەكى «قىزىل جۇلدىز» وردەنىمەن, «گەرمانيانى جەڭگەنى ءۇشىن», «بەرليندى العانى ءۇشىن», «ۆارشاۆانى ازات ەتكەنى ءۇشىن» مەدالدارىمەن ماراپاتتالعان. ارداگەر 5 ۇل مەن 1 قىزدان 20 نەمەرە, 18 شوبەرە ءسۇيىپ وتىر. وبلىس اكىمى ارداگەرلەردىڭ سوعىستا كورسەتكەن ەرلىگىن بۇگىنگى ۇرپاقتىڭ قامى ءۇشىن جاسالعاندىعىن ايتىپ, سىي-سياپات جاسادى. باتىرلارعا دەننىڭ ساۋلىعىن, عۇمىردىڭ ۇزاقتىعىن تىلەدى.
ايتا كەتەلىك, مەرەكە قارساڭىندا وبلىستىڭ بارلىق اۋداندار مەن قالالارىندا جەرگىلىكتى بيۋدجەت ەسەبىنەن ۇلى وتان سوعىسىنا قاتىسۋشىلارعا 100 ايلىق ەسەپتىك كورسەتكىش مولشەرىندە, ياعني 252 500 مىڭ تەڭگەدەن, ولارعا تەڭەستىرىلگەن ازاماتتارعا 5 اەك (12 625 تەڭگە) مولشەرىندە بىرجولعى ماتەريالدىق كومەك بەرىلەدى.
تۇركىستان وبلىسى
