سالتاناتتى شاراعا باتىس قازاقستان وبلىسىنىڭ اكىمى التاي كولگىنوۆ قاتىسىپ, ساربازداردى ءتول مەرەكەسىمەن قۇتتىقتادى.
- وتان قورعاۋشىلار كۇنى – ەلىمىزدەگى بارلىق بۋىن وكىلدەرىنىڭ باسىن بىرىكتىرەتىن مەيرام. ءبىز وتانىمىزدىڭ تاريحىنداعى ەرلىككە تولى كەزەڭدەردى ءاردايىم قاستەر تۇتىپ, باتىر اكەلەرىمىز بەن قاھارمان اتالارىمىزدىڭ جانقيارلىق ەرلىگىن ماڭگىلىك ەستە ساقتايتىن بولامىز. سونىمەن قاتار, بۇگىندە وتان ساقشىسى بولىپ, ەلدەگى بەيبىت ءومىر مەن تىنىشتىق كۇزەتىندە تۇرعان ارىس ازاماتتارىمىزعا قۇرمەتىمىز شەكسىز. سوندىقتان, ساربازدار, سىزدەردىڭ وتانعا دەگەن سۇيىسپەنشىلىگىڭىز, بويلارىڭىزداعى پاتريوتتىق رۋح بۇگىنگى ءوسىپ كەلە جاتقان جاستارعا ۇلكەن تاربيە, ونەگە», – دەدى ءوڭىر باسشىسى قۇتتىقتاۋ سوزىندە.
مەرەكە كۇنى ۇلتتىق ۇلان قاتارىندا قوعامدىق ءتارتىپتى ساقتاۋ, ازاماتتاردىڭ قاۋىپسىزدىگىن قورعاۋ مىندەتىن ابىرويلى اتقارىپ جۇرگەن ءبىر توپ اسكەري سالا قىزمەتكەرى I, II, III دارەجەلى «ءمىنسىز قىزمەتى ءۇشىن» مەدالدارىمەن جانە باتىس قازاقستان وبلىسى اكىمىنىڭ العىس حاتىمەن ماراپاتتالدى. «باتىس» وڭىرلىك قولباسشىسى گەنەرال-مايور الىبەك سەراليەۆ ساردارلار مەن ساربازداردىڭ وتان تىنىشتىعى ءۇشىن قالتقىسىز قىزمەت ەتۋگە دايىن ەكەندىگىن باياندادى.
مەرەكەلىك شارا بارىسىندا قوناقتار اسكەري ءبولىمنىڭ تەحنيكالارى مەن قارۋ-جاراعىمەن تانىسىپ, جاۋىنگەرلەر بوتقاسىنان ءدام تاتتى. بۇل كۇنى اسكەري بولىمگە كەلگەن مەكتەپ وقۋشىلارى رپگ-7ۆ گراناتاتقىشى, كالاشنيكوۆ اۆتوماتى مەن پۋلەمەتى, دراگۋنوۆ مەرگەن ۆينتوۆكاسى سياقتى ناعىز اسكەري قارۋدى تۇڭعىش رەت ۇستاپ كوردى. جيىن سوڭىنان 5517 اسكەري ءبولىم ساربازدارى ساپ تۇزەپ, روتا بويىنشا الاڭدا سالتاناتتى شەرۋمەن ءوتتى.
باتىس قازاقستان
