قازاقستان پرەزيدەنتى مەملەكەتىمىزدىڭ ىشكى جانە سىرتقى ساياسي جۇيەسىنىڭ بەرىك نەگىزى رەتىندە قاۋىپسىزدىكتى قامتاماسىز ەتۋ ماسەلەسىنە تۇڭعىش پرەزيدەنت – ەلباسى نۇرسۇلتان نازارباەۆتىڭ ارقاشان ايرىقشا ءمان بەرگەنىن اتاپ ءوتتى.
– ەگەمەندىكتى, قازاقستان رەسپۋبليكاسى اۋماعىنىڭ تۇتاستىعى مەن ۇلتتىق ءمۇددەنى قورعاۋ – ءبىزدىڭ ارميامىزدىڭ جانە كۇشتىك قۇرىلىمداردىڭ باستى باعدارى. بۇل ستراتەگيالىق ماڭىزدى مىندەتتەردى شەشۋ ءۇشىن كومانديرلەر كورپۋسىنا – گەنەرالدار مەن وفيتسەرلەرگە زور جاۋاپكەرشىلىك جۇكتەلەدى. اسكەر مەن قۇقىق قورعاۋ ورگاندارىنداعى احۋال مەن اسكەري داعدىنىڭ ساپاسى سىزدەردىڭ ساۋاتتى باسشىلىقتارىڭىزعا بايلانىستى. سىزدەردىڭ بارلىق كۇش-جىگەرلەرىڭىز, بىلىمدەرىڭىز بەن تاجىريبەلەرىڭىز قارۋلى كۇشتەرىمىزدىڭ جاۋىنگەرلىك قابىلەتىن, قۇقىقتىق ءتارتىپ پەن كونستيتۋتسيالىق قۇرىلىستى قورعاۋ جونىندەگى قۇقىق قورعاۋ ورگاندارى مەن ارناۋلى قىزمەتتىڭ ءتيىمدى جۇمىسىن ارتتىرۋعا باعىتتالۋى ءتيىس, – دەدى قازاقستان پرەزيدەنتى.
قاسىم-جومارت توقاەۆ گەنەرالدار مەن وفيتسەرلەرگە ارناعان سوزىندە بۇل جوعارى شەندەر مەن ارناۋلى اتاقتار ولاردىڭ ەڭبەكتەرىنىڭ لايىقتى جەمىسى ەكەنىن اتاپ ءوتتى.
– بۇل سىزدەردىڭ تەك كاسىبي جانە جەكە سىڭىرگەن ەڭبەكتەرىڭىزدىڭ ەلەنۋى عانا ەمەس, سونداي-اق ودان دا اۋقىمدى مىندەتتەردى شەشۋگە مۇمكىندىك بەرەتىن جاۋاپكەرشىلىكتىڭ جاڭا دەڭگەيىن بىلدىرەدى. قۋاتتى ءارى وركەندەگەن قازاقستاندى قۇرۋ جولىندا بارلىق كۇش-جىگەرلەرىڭىزدى جۇمسايتىندارىڭىزعا سەنىمدىمىن, – دەدى مەملەكەت باسشىسى.
ءراسىم بارىسىندا 2-سىنىپتى مەملەكەتتىك ادىلەت كەڭەسشىسى شەنى – ع.نۇرداۋلەتوۆكە, م. احمەتجانوۆقا; پوليتسيا گەنەرال-لەيتەنانتى ارناۋلى اتاعى – ا.شپەكباەۆقا, ە.تۇرعىمباەۆقا; گەنەرال-لەيتەنانت اسكەري اتاعى – م.التىنباەۆقا; مەملەكەتتىك كۇزەت گەنەرال-مايورى ارناۋلى اتاعى – ءا.ءجۇسىپوۆكە; ۇلتتىق قاۋىپسىزدىك گەنەرال-مايورى ارناۋلى اتاعى – د.ەرعوجينگە, ت.ءالىمجانوۆقا, م.يرمەنوۆكە, ا.تولەۋوۆكە, ب.ءۋالينيازوۆقا; سىرتقى بارلاۋ گەنەرال-مايورى ارناۋلى اتاعى – ب.نايزابەكوۆكە; 3-ساناتتى جوعارى بىلىكتىلىك سىنىبى ق.ءسونتاەۆقا; گەنەرال-لەيتەنانت اسكەري اتاعى – ءا.حالىقوۆقا, گەنەرال-مايور ءاسكەري اتاعى – م.ايماشەۆكە, ا.اشيروۆكە, ف.ءبادەنوۆكە, ا.جۇماعاليەۆكە, ت.قايىربەكوۆكە, ت.مۇراتباەۆقا, ا.مۇستابەكوۆكە; كونتر-ادميرال اسكەري اتاعى – س.بەكجانوۆقا; 3-سىنىپتى مەملەكەتتىك ادىلەت كەڭەسشىسى شەنى – ق.جاقىپباەۆقا, ب.جۇيرىكتاەۆقا, م.سەكسەمباەۆقا; پوليتسيا گەنەرال-مايورى ارناۋلى اتاعى ق.دالبەكوۆكە, ا.دۇيسەمباەۆقا بەرىلدى.
قازاقستان پرەزيدەنتى قاسىم-جومارت توقاەۆ اسكەري جانە قۇقىق قورعاۋ سالاسىنىڭ قىزمەتكەرلەرىنە مەملەكەتتىك ناگرادالار تاپسىردى.
مەملەكەت باسشىسى مەملەكەتتىك ناگرادالار تاپسىرۋ بارىسىندا سالتاناتتى شارانىڭ وتان قورعاۋشى جانە جەڭىس كۇنى مەرەكەلەرى قارساڭىندا ءوتۋىنىڭ دە ءمانى زور ەكەنىن ايتتى. قازاقستان پرەزيدەنتى قاۋىپسىزدىك پەن قورعانىس سالاسىنىڭ اسا ماڭىزدى ەكەنىنە توقتالدى.
– تاۋەلسىزدىكتىڭ العاشقى جىلدارىندا ەلىمىزدە جوعارى ساناتتى, بىلىكتى ساردارلار مۇلدە از بولدى. تۇڭعىش پرەزيدەنتىمىز ءار ساربازدى جىگەرلەندىرە وتىرىپ, ايبىندى اسكەر قۇردى. بۇگىندە ءبىزدىڭ كۇشتىك قۇرىلىمدارىمىز زاماناۋي تەحنيكا مەن تەحنولوگيانى مەڭگەرگەن. ولار كەز كەلگەن قاۋىپ-قاتەرگە قارسى سوققى بەرە الاتىن ايبىندى ءارى ءموبيلدى كۇشكە اينالدى. جاقىندا عانا وتكەن «ايبالتا-2019» وقۋ-جاتتىعۋى – سونىڭ ايقىن دالەلى, – دەدى قازاقستان پرەزيدەنتى.
سونىمەن قاتار قاسىم-جومارت توقاەۆ ادام ءومىرىن ورتتەن, سۋدان اراشالاپ قالعان بەيبىت كۇننىڭ باتىرلارىنىڭ ەرلىكتەرى تۋرالى دا ايتتى.
– سىزدەردىڭ بەيبىت كۇندەگى ەرلىكتەرىڭىز بەن يگى ىستەرىڭىز وسكەلەڭ ۇرپاققا ۇلگى بولۋى ءتيىس. سوندىقتان بۇگىن ءبىز ءمىنسىز ءاسكەري قىزمەتىمەن, ەرەن ەرلىگىمەن دارالانعان ازاماتتاردى ماراپاتتاۋ ءۇشىن جينالىپ وتىرمىز, – دەدى مەملەكەت باسشىسى.
سالتاناتتى شارادا ءى دارەجەلى «داڭق» وردەنىمەن قارۋلى كۇشتەر باس شتابى باستىعىنىڭ ورىنباسارى ادىلبەك قاليبەك ۇلى الدابەرگەنوۆ, باس پروكۋروردىڭ ورىنباسارى ەرلىك ءابدىراقىم ۇلى كەنەنباەۆ, قارۋلى كۇشتەردىڭ قۇرلىق اسكەرلەرى باس قولباسشىسىنىڭ ورىنباسارى ۆاسيلي نەسىپقازى ۇلى رىسباەۆ ماراپاتتالدى.
ءىى دارەجەلى «داڭق» وردەنى ىشكى ىستەر مينيسترلىگى قوستاناي وبلىسى پوليتسيا دەپارتامەنتىنىڭ باستىعى بەكەت يمان ۇلىنا ايماعامبەتوۆ, الماتى وبلىسى بويىنشا ۇلتتىق قاۋىپسىزدىك كوميتەتى دەپارتامەنتىنىڭ باستىعى ءسابيت تۇڭعىشباي ۇلى قۇرماناليەۆكە تاپسىرىلدى.
ءىى دارەجەلى «ايبىن» وردەنىمەن مەملەكەتتىك كۇزەت قىزمەتى پرەزيدەنت كۇزەتى قىزمەتىنىڭ باس ينسپەكتورى ۆيكتور يۋرەۆيچ بالياسنيكوۆ, سىبايلاس جەمقورلىققا قارسى ءىس-قيمىل ۇلتتىق بيۋروسى اقمولا وبلىسى بويىنشا دەپارتامەنت باسشىسى قۋانىش بازار ۇلى بەكباسوۆ, ۇلتتىق قاۋىپسىزدىك كوميتەتى دەپارتامەنتى باستىعىنىڭ ءبىرىنشى ورىنباسارى رينات تولەۋحان ۇلى قوقىمباەۆ, قورعانىس مينيسترلىگى 48386 اسكەري ءبولىمىنىڭ كومانديرى تالعات اقتان ۇلى قۇسايىنوۆ, ىشكى ىستەر مينيسترلىگى كريمينالدىق پوليتسيا دەپارتامەنتى باستىعىنىڭ ورىنباسارى ەرلان بولات ۇلى وماربەكوۆ, قورعانىس مينيسترلىگى 28738 اسكەري ءبولىمىنىڭ كومانديرى جانات ەسىم ۇلى راسقۇلوۆ, اتىراۋ قالاسىنىڭ جول-پاترۋلدىك پوليتسيا باتالونىنىڭ ينسپەكتورى رۇستەمبەك بيسەمباي ۇلى سۋندۋتوۆ, قازاقستان رەسپۋبليكاسى قارۋلى كۇشتەرى اسكەري-اۋە كۇشتەرى قولباسشىسىنىڭ ورىنباسارى نۇربولات ەركەباي ۇلى توپاەۆ, قورعانىس مينيسترلىگى 03858 اسكەري ءبولىمىنىڭ كومانديرى مەيرام وردالى ۇلى حامزين ماراپاتتالدى.
ءىىى دارەجەلى «ايبىن» وردەنى مەملەكەتتىك كۇزەت قىزمەتىنىڭ وبەكتىلەردى قورعاۋ قىزمەتى «ايبىن» پرەزيدەنتتىك پولكىنىڭ اعا مامان – اتقىشى امانگەلدى مىرزاباي ۇلى قۇسايىنوۆقا تاپسىرىلدى.
«قۇرمەت» وردەنىمەن باس پروكۋراتۋرانىڭ قىزمەت باستىعىنىڭ ورىنباسارى راديمحان دۋباەۆا ماراپاتتالدى.
«ەرلىگى ءۇشىن» مەدالى ىشكى ىستەر مينيسترلىگى ۇلتتىق ۇلاننىڭ «ورتالىق» وڭىرلىك قولباسشىلىعى 6697 اسكەري ءبولىمىنىڭ ساربازى مەدەت سەرىكالى ۇلى بالابيەۆكە, ىشكى ىستەر مينيسترلىگى نۇر-سۇلتان قالاسى توتەنشە جاعدايلار دەپارتامەنتى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ №1 ءورت ءسوندىرۋ ءبولىمى باستىعىنىڭ ورىنباسارى ايانبەك باۋىرجان ۇلى كەنجەشوۆكە, قورعانىس مينيسترلىگى 35411 اسكەري ءبولىمى ارتيللەريالىق ديۆيزيونىنىڭ مامانى قۋاندىق قانات ۇلى قاناتوۆقا, ىشكى ىستەر مينيسترلىگى قاراعاندى وبلىسى توتەنشە جاعدايلار دەپارتامەنتىنىڭ ءورت ءسوندىرۋ جانە اۆاريالىق-قۇتقارۋ جۇمىستار قىزمەتى №1 ءورت ءسوندىرۋ ءبولىمىنىڭ بولىمشە كومانديرى الەكساندر گەنناديەۆيچ ميناەۆقا, ىشكى ىستەر مينيسترلىگى سولتۇستىك قازاقستان وبلىسىنىڭ پوليتسيا دەپارتامەنتى تايىنشا اۋدانى پوليتسيا ءبولىمىنىڭ ۋچاسكەلىك ينسپەكتورى ەرلان ماۋلي ۇلى ىبىراەۆقا تاپسىرىلدى.
«جاۋىنگەرلىك ەرلىگى ءۇشىن» مەدالىمەن ورتالىق كوماندالىق پۋنكتى باستىعىنىڭ ورىنباسارى – قارۋلى كۇشتەر باس شتابى ورتالىق كوماندالىق پۋنكتىنىڭ جەدەل كەزەكشىسى ۆلاديمير ميحايلوۆيچ ابراموۆ, ۇلتتىق قاۋىپسىزدىك كوميتەتىنىڭ باسقارما باستىعى جاسلان تالعاتبەك ۇلى جانايداروۆ, قورعانىس مينيسترلىگى 35950 اسكەري ءبولىمى شتابىنىڭ اعا وفيتسەرى اسحات جاڭبىرشى ۇلى مادياروۆ, قورعانىس مينيسترلىگى 55652 اسكەري ءبولىمى اۆياتسيالىق ەسكادريلياسى اۆياتسيالىق بۋىنىنىڭ اعا ۇشقىشى كوبەگەن ەرسىنتاي ۇلى مىرزاتاەۆ, قورعانىس مينيسترلىگى 35748 اسكەري ءبولىمى تانك باتالونىنىڭ كومانديرى اسىلبەك ناتى ۇلى ونتاقوۆ ماراپاتتالدى.
شارا سوڭىندا قاسىم-جومارت توقاەۆ ماراپاتتالۋشىلارعا ءمىنسىز قىزمەتى ءۇشىن العىسىن ءبىلدىرىپ, ولارعا زور دەنساۋلىق, وتباسىلارىنا بەرەكە, جاڭا تابىستار تىلەدى.
