وبلىس اكىمى وڭداسىن ورازالين الدىمەن اقتوبەدەگى 700 ورىنعا ارنالعان, حالىقارالىق تالاپتارعا ساي بوي كوتەرگەن «جەكپە-جەك» سارايىندا بولدى. «جەكپە-جەك» سپورت سارايىندا «جوعارعى شەبەرلىك سپورت مەكتەبى» ورنالاسقان. وندا 800-گە جۋىق سپورتشىنىڭ جۇيەلى تۇردە سپورتپەن شۇعىلدانۋىنا مۇمكىندىك جاسالعان. سپورتتىق سارايدا, قازاق كۇرەسى, ەركىن كۇرەس, بوكس, گرەك-ريم كۇرەسى, تاەكۆاندو, ۇستەل تەننيسى سىندى ون بەس سپورتتىڭ تۇرىمەن اينالىسۋعا بولادى.
ءوڭىر باسشىسى, سونىمەن قاتار, اقتوبە مەديتسينالىق ورتالىعىنا باردى. 2017 جىلدان باستاپ وبلىستىق كلينيكالىق اۋرۋحانا, وبلىستىق بالالار كلينيكالىق اۋرۋحاناسى جانە كەڭەس بەرۋ-دياگنوستيكالىق ورتالىعى بىرىكتىرىلگەن. اۋىسىمىنا 500 كەلۋشىگە قىزمەت كورسەتەدى.
الايدا, حالىق ءجيى باس سۇعاتىن مەديتسينالىق ورتالىقتىڭ تازالىعى مەن جيناقىلىعى كوڭىل كونشىتپەيدى. وبلىس اكىمى وسى كەمشىلىكتەرگە قاتىستى سىن-ەسكەرتپە جاسادى. عيمارات الدىندا ارام شوپتەر ءوسىپ, كوپشىلىكتەن قالعان قوقىستاردان تازارتىلماعان. ايماق باسشىسى قۇلاعان ەرنەۋلەر مەن عيماراتقا كىرە بەرىس قاقپانىڭ دۇرىس قويىلماعانىن دا ايتىپ ءوتتى. مەديتسينالىق ورتالىق باسشىلىعىنا كەمشىلىكتەردى تەز ارادا رەتكە كەلتىرۋدى تاپسىردى.
سونىمەن قاتار, وبلىس اكىمىن قالا تازالىعى مەن كەلبەتىنە قاتىستى ماسەلەلەر بەيجاي قالدىرمادى. اباي كوشەسىندەگى تۇرعىندار دەمالاتىن ورىنداردى جاياۋ ارالاعان وبلىس اكىمى كوگالداندىرۋ, اعاشتاردى اقتاۋ, اباتتاندىرۋ جۇمىستارىنىڭ اتقارىلۋىن باقىلادى. وبلىس باسشىسى قالا اكىمى ءىلياس يسپانوۆقا جول جيەگىندەگى قۇلاعان ەرنەۋلەردى قالىپقا كەلتىرۋ, تازالىق ماسەلەسىن باستى نازاردا ۇستاۋ قاجەتتىگىن نىقتاپ تاپسىردى.
