ەسكەرتكىشتىڭ سالتاناتتى اشىلۋىندا قازاقستاننىڭ رەسەيدەگى توتەنشە جانە وكىلەتتى ەلشىسى يمانعالي تاسماعامبەتوۆ «باتىرلىق – باسقا قوناتىن باق ەمەس, جۇرەكتەن ەرلىك بوپ شىعاتىن سىندارلى شاق. ال ءبىزدىڭ حالقىمىز ءۇشىن بۇل – ۇلانىنا عانا ەمەس, قىزدارىنا دا بىردەي دارىعان ۇلتتىق قاسيەت», - دەپ بابالار رۋحىنا تاعزىممەن باستادى ءسوزىن.
«سوندىقتان دا, تاريحىمىزدىڭ ءاربىر بەتى ەل باسىنا كۇن تۋعاندا ەرلەرمەن يىق تەڭەستىرىپ, جاۋعا شاپقان باتىر رۋحتى اپالارىمىزدىڭ ەسىمىمەن حاتتالىپ, ەل ەسىندە ساقتالىپ كەلەدى. بۇگىن, مىنە, سول داڭقتى ءداستۇردى جالعاستىرۋشى, قازاقتىڭ قايسار قىزى – ءاليا مولداعۇلوۆاعا سانكت-پەتەربۋرگ قالاسىنىڭ تورىنەن ەڭسەلى ەسكەرتكىش اشىلىپ وتىر», - دەپ ءسوزىن ساباقتادى ەلشى.
«ءبىز ەرجۇرەك جەرلەستەرىمىزدى ەسكە الىپ قانا قويماي, ۇلى وتان سوعىسىنىڭ بارلىق باتىرلارىنا, سونىڭ ىشىندە لەنينگرادتىڭ قورعاۋشىلارىنا قۇرمەت كورسەتەمىز!» - دەدى يمانعالي نۇرعالي ۇلى.
توتەنشە جانە وكىلەتتى ەلشى «سوعىس تاريح قويناۋىندا قالدى, بىراق ءتۇرلى بۋىنداعى ۇرپاقتار سول قايعىلى جىلدار مەن ميلليونداعان ادامنىڭ قايعى-قاسىرەتىن ءاردايىم ەستە ساقتايتىن بولادى. ءسوز جوق, بۇل شارا – ۇلى جەڭىس مەرەكەسى قارساڭىندا قاھارمان اپامىزدىڭ رۋحىنا كورسەتىلىپ وتىرعان ۇلى تاعزىم عانا ەمەس, ەكى ەلدىڭ بىرلىگى مەن ەرلىگىن, ايبىنى مەن داڭقىن پاش ەتەتىن دارا دۇنيە», - دەپ اياقتادى ءسوزىن.
ءاليا مولداعۇلوۆانىڭ ەسكەرتكىشى سانكت-پەتەربۋرگتىڭ باتىسىنداعى سكۆەرلەردىڭ بىرىندە, كراسنوگۆارديا اۋدانىنداعى ءوز اتىنا بەرىلگەن كوشەنىڭ 5-ۇيىندە ورنالاسقان. بيىكتىگى 3 مەتر قولادان جاسالعان مۇسىندىك كومپوزيتسيا قىزعىلت گرانيتتى تۇعىرعا ورناتىلعان. وندا باتىردىڭ ەسىمى مەن باتىردىڭ جاپسىرما جۇلدىزى بەدەرلەنگەن. پوستامەنتتىڭ سىرتقى جاعىندا مەرگەن قىزدىڭ ەرلىگىنىڭ قىسقاشا سيپاتتاماسى قاشاپ جازىلعان.
ەسكەرتكىشتى تۇرعىزۋ سانكت-پەتەربۋرگ ۇكىمەتىنىڭ, قازاقستاننىڭ رەسەيدەگى ەلشىلىگىنىڭ, اقتوبە جانە اتىراۋ وبلىسى اكىمدىكتەرىنىڭ ىنتىماقتاسا كۇش جۇمساۋىنىڭ ارقاسىندا جۇزەگە استى.
شىعارماشىلىق جوبانىڭ اۆتورى - بەلگىلى قازاق ءمۇسىنشى ەدىگە راحماديەۆ. ونىڭ ايتۋىنشا, جاس جانە سۇيكىمدى قازاق قىزىنىڭ بەينەسىنىڭ نەگىزى رەتىندە ول ءاليانىڭ قانىعىراق ساقتالعان فوتوسۋرەتتەرىن پايدالانعان. پوستامەنت الماتى وبلىسىنداعى كۇرتى كەن ورنىنان جاقسى جانە ساپالى گرانيتتەن جاسالعان. سكۋلپتۋرا مۇسىنىنە ارنالعان قولا دا قازاقستاندا شىققان. ساۋلەت كومپوزيتسياسىن قۇرۋ جۇمىستارى الماتى وبلىسى جامبىل اۋدانى قارعالى اۋىلىندا جۇرگىزىلدى.
ءاليا مولداعۇلوۆا قازاقستاندا دۇنيەگە كەلگەن, بىراق ۇلى وتان سوعىسىنىڭ الدىندا لەنينگراد قالاسىندا تۇرىپ, وقىدى. 1941-1942 جىلعى ۇرەيلى بلوكادالىق قىستا امان قالعان. 1942 جىلدىڭ ناۋرىز ايىندا ياروسلاۆ وبلىسىنا ەۆاكۋاتسيالانعان. 1943 جىلى ورتالىق ايەلدەر سنايپەرلىك مەكتەبىن بىتىرگەننەن كەيىن 18 جاستاعى قىز 54-جەكە اتقىشتار بريگاداسىنىڭ 4-باتالونىنىڭ (22-اسكەر, 2-بالتىق جاعالاۋى مايدانى) مەرگەنى بولدى. جاۋىنگەرلىك ءىس-قيمىلدار بارىسىندا ول جاۋدىڭ 78 سولداتى مەن وفيتسەرىن جويدى. ءاليا مولداعۇلوۆا 1944 جىلى قاڭتاردا لەنينگراد-نوۆگورود وپەراتسياسىن وتكىزۋ كەزىندە پسكوۆ وبلىسىنىڭ كازاچيحا اۋىلىندا شايقاستا ەرلىكپەن قازا تاپتى.
