دەنساۋلىق ساقتاۋ ءمينيسترى ە. ءبىرتانوۆتىڭ ايتۋىنشا, سوڭعى ءۇش جىلدا وڭىرلەر جالپى سوماسى 52 ملرد تەڭگەگە 111 دەنساۋلىق ساقتاۋ سالاسىنداعى ءمجا شارتىن جاساستى. كونكۋرستىق راسىمدەردى وتكىزۋ ساتىسىندا تاعى دا 93 جوبا بار, 83 جوبا ازىرلەنىپ جاتىر.
«وڭىرلەر باسىمدىقپەن امبۋلاتوريالىق-ەمحانالىق قىزمەت وبەكتىلەرىن سالۋ جانە ونى پايدالانۋعا بەرۋ جوبالارىن, سونداي-اق مەديتسينالىق تەحنيكامەن جاراقتاندىرۋ جوبالارىن ىسكە اسىرىپ جاتىر», — دەدى ە. ءبىرتانوۆ.
امبۋلاتوريالىق-ەمحانالىق جانە ستاتسيونارلىق وبەكتىلەر قۇرىلىسىنىڭ جوبالارىن ىسكە اسىرۋ ءۇشىن مەديتسينالىق قىزمەتتەر ءۇشىن ءتاريفتى تولەۋمەن «سەرۆيستىك ءمجا» مودەلىن, سونداي-اق وبەكتىنى مەملەكەتتىك مەنشىككە بەرگەن جاعدايدا ينۆەستيتسيالاردى وتەۋمەن كەلىسىمشارتتاردى پايدالانۋ ۇسىنىلادى.
2019 جىلعى ماۋسىمنىڭ سوڭىنا دەيىن وزەكتەندىرىلگەن وڭىرلىك دامۋ جوسپارلارى نەگىزىندە قر دەنساۋلىق ساقتاۋ ينفراقۇرىلىمىن دامىتۋدىڭ 2026 جىلعا دەيىنگى بىرىڭعاي پەرسپەكتيۆالىق جوسپارى بەكىتىلەتىن بولادى.
مينيسترلىك حالىقارالىق تاجىريبە بويىنشا ينفراقۇرىلىمدىق ۇلگى نەگىزىندە ءمجا جوبالارىن ىسكە اسىرۋ ءۇشىن زاڭناماعا وزگەرىستەر ەنگىزۋ جوسپارلاعان. سونداي-اق, دەنساۋلىق ساقتاۋ سالاسىنداعى جوبالىق باسقارۋ ءوفيسىن جانە زاڭنامالىق دەڭگەيدە مارتەبەسىن بەكىتە وتىرىپ (زاڭدى تۇلعا), دەنساۋلىق ساقتاۋدىڭ ءىرى ينفراقۇرىلىمدىق جوبالارىن ىسكە اسىرۋ جونىندەگى بىرىڭعاي وپەراتورىن قۇرۋ كوزدەلگەن.
ك. ءشامشيدينوۆانىڭ ايتۋىنشا, بۇگىندە مەملەكەتتىك-جەكەمەنشىك ارىپتەستىك بويىنشا 271 جوبا ىسكە اسىرىلىپ جاتىر, ونىڭ 90% وپەراتسيالىق شىعىنداردى وتەۋ ارقىلى ىسكە اسىرىلسا, تەك 10% ينۆەستيتسيالىق شىعىنداردى وتەۋ ارقىلى جۇزەگە اسىرىلعان.
مەملەكەتتىك-جەكەمەنشىك ارىپتەستىك جوبالارىنىڭ نەگىزگى ۇلەسى مەكتەپكە دەيىنگى ءبىلىم سالاسىندا ىسكە اسىرىلىپ جاتىر.
«سونىڭ ناتيجەسىندە, 2013 جىلدان باستاپ جەكەمەنشىك مەكتەپكە دەيىنگى ۇيىمداردىڭ سانى 1 045-تەن 3 640-قا دەيىن ءوستى. 2018 جىلدىڭ قورىتىندىسى بويىنشا 3 جاستان 6 جاسقا دەيىنگى بالالاردى قامتۋ 95%-دى قۇرادى», — دەدى ءبىلىم جانە عىلىم ءمينيسترى.
وسىلايشا, جەكە سەكتوردى تارتا وتىرىپ, مەملەكەت شامامەن 615 ملرد تەڭگەنى ۇنەمدەدى, سەبەبى 307 مىڭ بالانى قامتۋ ءۇشىن جاڭا ءبىر مىڭنان استام بالاباقشا سالۋ قاجەت بولار ەدى. وسى جاعدايلاردى جاساۋدىڭ ناتيجەسىندە قازاقستاندا 15 جاڭا جەكەمەنشىك مەكتەپ اشىلدى, بۇل وقۋشى ورىندارىنىڭ تاپشىلىعىن 5 مىڭ ورىنعا قىسقارتۋعا مۇمكىندىك بەرەدى. جىل سوڭىنا دەيىن تاعى 18 مەكتەپ اشىلادى.
مەملەكەتتىك-جەكەمەنشىك ارىپتەستىك اياسىندا تەحنيكالىق جانە كاسىپتىك ءبىلىم بەرۋ سالاسىندا كوللەدجدەردى ءىرى كاسىپورىندارعا سەنىمگەرلىك باسقارۋعا بەرۋ, سونداي-اق, قوسارلى ءبىلىم بەرۋدى دامىتۋ جوسپارلانعان.
بۇدان وزگە, ءمجا تەتىگى ستۋدەنتتەر جاتاقحاناسىن سالۋدا ءساتتى قولدانىلىپ جاتىر. بيىل جوسپارلانعان 5 مىڭ ورىننىڭ ورنىنا 9 مىڭنان استام ورىن پايدالانۋعا بەرىلەدى.
وڭىرلەردە اتقارىلىپ جاتقان جۇمىستار تۋرالى قىزىلوردا وبلىسىنىڭ اكىمى ق. كوشەرباەۆ جانە سولتۇستىك قازاقستان وبلىسىنىڭ اكىمى ق. اقساقالوۆ باياندادى.
